NAHÚM
Txꞌolbil Xoꞌl Yi Liwreꞌj
Yi Nahúm iꞌ jun elsanl stziꞌ Ryos banak tentz, te yi tiemp yi na cawun tzaj yi rey Ezequías. At eꞌ na cyal yi ja loꞌ xcon iꞌ tetz jun elsanl tziꞌ Ryos jun cient yob tu niꞌcy te yi nsken wiꞌt quim Jonás. Iꞌtz loꞌ tul yi yob 663—612 te ntaxk ulak Kajcaw Jesucristo.
Yi xtxolbil yi xtxolnak Nahúm, iꞌtz yi at tulbil jun chin caws squibaj yi eꞌ aj Nínive. Ej nin yi tircuꞌn chelpon cuꞌn swutz tan paj yi chin pajol caꞌwl nin eꞌ. Ej nin chin xoꞌwbil nin eꞌ tan chixiteꞌn cuꞌn cyakil yi eꞌ jilwutz wunak yi najlcheꞌ-tz chinakaꞌjil. Chin juntlen nin cyajtzaꞌkl yi eꞌ aj Nínivejaꞌtz
Ej nin yi xoneꞌn tiemp ja ul yi jun sotzeꞌnaꞌtz ẍchiwutz yi alijt cyen tan Nahúm. Ej nin tircuꞌn chitanum xituꞌn cuꞌn ban. Nin quiꞌt na jal jun chixonl yi eꞌ aj Nínivejaꞌtz jaluꞌ.
Yi mero chusuꞌn yi na takꞌ yi liwreꞌj sketz iꞌtz: Yi Kataj Ryos chin tzꞌaknak cunin iꞌ, quiꞌc muꞌẍ tal il cꞌol teꞌj. Chaꞌstzun te na oc tan chicawseꞌn cunin yi eꞌ nación yi eꞌ juchul il. Quiꞌc nin jun yi nink tzꞌel liwr. Nin yi tnum Nínive iꞌtz jun elsawutzil te yi xtxolbilaꞌtz.