NAHÚM
Wiꞌnin xanil Kataj Ryos
1
1 Yi Nahúm iꞌ jun aj Elcos. Nin yi eꞌchk xtxolbil yi cyaj stzꞌibal, choꞌn tilol tul wutzicyꞌ taneꞌn. Nin iꞌtz tan talcheꞌn yi at tulbil chicaws yi eꞌ aj Nínive.2 Na jeꞌ swutz Kataj Ryos yi eꞌ yi qui na xom chiwiꞌ teꞌj. Nin na ticyꞌsaj cꞌuꞌl scyeꞌj. Na wiꞌnin na chiꞌch cꞌuꞌl scyeꞌj yi eꞌ tetz contr.
3 At pasens Kataj poro nchaꞌtz at wiꞌnin porer, nin ilenin stkꞌeꞌ chicaws yi eꞌ yi na chipaj yi tetz caꞌwl.
Na ẍchaj tib yi tetz porer tul cyekꞌekꞌ aꞌbal, nin yi sbakꞌ, niꞌcuꞌn chi puklaj tzakꞌ tetz tkan.
4 Na xcyeꞌ iꞌ tan makleꞌn yi pakꞌbil mar. Ej nin baꞌn na skej eꞌchk mar taꞌn. Nchaꞌtz ban na skej eꞌchk tzanlaꞌ taꞌn. Yi eꞌchk txꞌacꞌaben cwent Basán tu yi eꞌchk chumam wiꞌ tzeꞌ yi at wiꞌwtz Carmelo, baꞌn na skej chixak taꞌn. Nchaꞌtz baꞌn na chicuꞌ mol cyakil yi eꞌchk buch yi at wiꞌwtz Líbano taꞌn.
5 Na chucan cyakil yi eꞌchk wutz swutz Kataj Ryos, nin na cheꞌl aꞌ yi eꞌchk juꞌwtz swutz iꞌ. Wiꞌnin na chucan yi munt swutz iꞌ, cyakil yi eꞌ yi najlcheꞌ wi munt chilucneꞌ yil quil nin wutz.
6 Cyaꞌl jun xtxꞌaj yi ẍchiꞌchbeꞌn cꞌuꞌl iꞌ. Cyaꞌl jun na xtxꞌaj yi na jeꞌ lajpuj wiꞌ. Na yi na jeꞌ lajpuj wiꞌ, niꞌcuꞌn na ban chi jun chin kꞌakꞌ yi sbejnin lsaj skeꞌj, nin yi eꞌchk wutz cꞌub, cob cuntuꞌ na cheꞌl swutz iꞌ.
7 Poro yi Kataj Ryos chumbalaj nin iꞌ, na yi na ul eꞌchk sotz cꞌuꞌlal skawutz, list atit iꞌ tan kacolcheꞌn, nin na oc tan chicolpeꞌn yi eꞌ yi nter nin kꞌuklij chicꞌuꞌl teꞌj.
8 Nchaꞌtz niꞌcuꞌn iꞌ tu jun chin tzanlaꞌ yi na eluꞌl jakxuj, yi na xcyeꞌ tan jicyleꞌn nin tircuꞌn yi na nojquen le beꞌ, nin na xcyeꞌ tan chixiteꞌn cuꞌn yi eꞌ yi na choꞌc tan pileꞌn yi tetz ẍchamil. Ntin scyetzajeꞌ yi amaꞌl yi chin tzꞌoꞌtz nin.
9 ¿Nxac na chitzanuꞌ tan xtxumleꞌn tan makleꞌn wutz iꞌ? Na iꞌ tetz xcyek tan chixiteꞌnuꞌ. Cyaꞌl nin jun xcyek tan pileꞌn Kataj Ryos cob tir.
10 Jalcuꞌn ẍchiloꞌonkuꞌ chi na ban jun yaj yi at aꞌ twiꞌ, nko chi na ban txꞌiꞌx tu chꞌim yi chin skejt nin yi jalcunin na cuꞌ mol tan kꞌakꞌ. Yaꞌstzun sbajok scye yi eꞌ yi na choꞌc tan pileꞌn Kataj.
11 Ma jaluꞌ axwok aj Nínive, choꞌn jal yi aj ocsanl cꞌuꞌlal tzixoꞌlwok, yi jun yi chin junt len nin tajtzaꞌkl. Yi junaꞌtz yi moꞌc tan oyintziꞌ teꞌj Kataj.
12 Nin je na tal Kataj: “Quiꞌc na ban yi ko chin cham nin eꞌ asirio nin quiꞌc na ban yi ko jun cꞌoloj cunin chixoneꞌn, ẍchixitok len, nin quiꞌt kil chiwutz. Ma yi axwok aj Judá, in nnoꞌcnak tan ibuchleꞌn, poro quiꞌt tzimban junt tir.
13 Tzꞌelpon incyꞌal yi yucuꞌ yi at teꞌj ikul, nin tzꞌelpon impakꞌlul yi caren yi at te itkan,” stzun Kataj.
14 Ma jaluꞌ, je yi xtxolbileꞌj yi sajeꞌn tlol Kataj te chireyil yi eꞌ aj Nínive: “Quiꞌt ljal axonl tan beneꞌn loꞌon yi abiꞌ. Ej nin copon inxitul yi eꞌchk ryos yi banij cuntuꞌ taneꞌn tan tzeꞌ, tu yi eꞌchk ryos yi chꞌichꞌ cuꞌn, yi at tul atyoẍ. Nin nocpon tan mukleꞌn cuꞌn yi awankil, na quiꞌc muꞌẍ axac tzinwutz,” chij Kataj bantz.
Yi stziblal yi tzotzajeꞌn Nínive
15 ¡Axwok aj Judá, xmayninwok yi jun yi tzꞌul wiꞌwtz! Cyaꞌn yi balaj stziblal taꞌn, yi sjalok tzatzin paz. Cxtzatzink tzunwoktz. Nin baꞌn cxeꞌlwok cuꞌn te iyol yi isuknak tetz Ryos yi atix tzaj wutz peꞌm. Na quiꞌt chuꞌl yi eꞌ mal nak junt tir tan ixiteꞌn cuꞌn, na ja chisotz chicyakil cuꞌn.