MIQUEAS
Txꞌolbil Xoꞌl Yi Liwreꞌj
Yi Miqueas iꞌ jun elsanl stziꞌ Ryos yi xconak tan Kataj wajxak cient yob te yi ntaxk itzꞌij Kajcaw Jesucristo. Nchaꞌtz te iteꞌnin tiempaꞌtz ja aꞌtij Isaías, junt elsanl stziꞌ Ryos.
Ocnak iꞌ tan talcheꞌn scyetz yi eꞌ tanum yi eꞌ aj Judá, yi txant tan tuleꞌn chicaws scyuchꞌ yi eꞌ aj Israel yi najlcheꞌ cwent Samaria tan paj yi chin pajol caꞌwl nin eꞌ.
Ej nin nchaꞌtz tal scyetz yi eꞌ tetz tanum, yi eꞌ aj Judá yi yaꞌstzun sbajok scyeꞌj cyetz, na niꞌcuꞌn cyajtzaꞌkl scyuchꞌ yi eꞌ aj Samaria-aꞌtz.
Ocnak Miqueas tan xtxoleꞌn, yi chin xan nin Kataj Ryos, nin yi at tulbil iꞌ tan takꞌleꞌn chicaws, chi alijt cyen cyakꞌun yi eꞌ mas elsanl stziꞌ Ryos. Poro cyaj cyen tlol yi wiꞌtzbilt len yi scuyeꞌ Kataj Ryos chipaj nin stkꞌeꞌ chikꞌej tu tzatzin paz scyetz junt tir.
Ej nin na tzaj wiꞌ yol Miqueas tan jun xtxolbil yi na xcon taꞌn tan makleꞌn chiwutz yi eꞌ tetz tanum.
Poro nchaꞌtz ja tal iꞌ yi at chichꞌiw te jun balaj tiemp kalel jaleꞌt kꞌej junt tir yi tnum Judá tu Israel.
Yi Weklil Yi Liwreꞌj
Yi bajx wekl (Cap. 1–3) na tal yi tzꞌocopon Ryos tan chicawseꞌn yi eꞌ tetz tanum.
Yi caꞌp wekl (Cap. 4–5) na tal yi ẍeꞌn chopon cyakil eꞌ nación tan takꞌleꞌn kꞌej Kataj Ryos le tnum Jerusalén.
Yi toxeꞌn wekl (Cap. 6–7) na ẍchaj sketz yi ẍeꞌn toqueꞌn Ryos tan chiyajleꞌn yi eꞌ tetz tanum tan paj yi qui nin eꞌ xom te yi tetz tajbil.