MIQUEAS
Yi chicaws cyakil yi eꞌ xonl Israel
1
1 Je yi xtxolbileꞌj yi talnak Kajcaw chi tul wutzicyꞌ taneꞌna tetz Miqueas yi aj Moreset. Yi jun wutzicyꞌaꞌtz na jop yi mbi sbajok te Samaria, nin yi mbi sbajok te Jerusalén. Ja xcon Miqueas tan Ryos tetz elsanl stziꞌ iꞌ tul yi tiemp yi na chicawun tzaj yi rey Jotam, tu yi rey Acaz tu yi rey Ezequías squibaj yi eꞌ aj Judá. Yi tlol Miqueas yi at tulbil chicaws yi eꞌ aj Samaria
2 Ma jaluꞌ, cyakil yi eꞌuꞌ yi ateꞌuꞌ beneꞌn tziꞌn wi munt, quibit tzajuꞌ yi xtxolbileꞌj. Cyakil yi eꞌuꞌ yi najlcheꞌuꞌ le tnumeꞌj, baꞌn choꞌcuꞌ tan xtxumleꞌn, na yi Kataj Ryos jilonk tzaj xe yi tetz templo tcyaꞌj, yi jun templojaꞌtz yi chin xan nin. Nin tzꞌocpon iꞌ tan talcheꞌn tircuꞌn yi chipaltiluꞌ.
3 Quibit tzajuꞌ: Tzꞌeluꞌl iꞌ le amaꞌl kale najleꞌt, nin cuꞌul wi munt. Syakꞌpeꞌ eꞌchk wutz yil tzꞌicyꞌak tibaj.
4 Tzꞌelpon aꞌ eꞌchk wutzaꞌtz tzakꞌ tkan, chi na ban xcab tan stzꞌaꞌal yi kꞌakꞌ.b Nin copon cobsuj yi eꞌchk jocoꞌj tan yi tkan, chi ik jun chin tzanlaꞌ yi meꞌlul nil tan jatxleꞌn cuꞌn yi eꞌchk amaꞌlaꞌtz.
5 Sbajok cyakil yi xtxolbilaꞌtz scyeꞌj yi eꞌ xonl kꞌajtzun Jacow, yi eꞌ xonl Israel, tan paj yi chin tzeꞌtzuj nin teꞌj cyalmaꞌ. ¿Poro naꞌ nsajeꞌt yi jun yab ajtzaꞌklaꞌtz le iwutz itetz? Choꞌn nsaj ẍchixoꞌl yi eꞌ aj Samaria. ¿Ej nin naꞌ atit cyent kꞌajbil eꞌchk chiryosil yi eꞌ xonl kꞌajtzun Jacow le iwutz itetz yi banij cuntuꞌ taneꞌn? Choꞌn at le mero tnum Jerusalén.
6 Tan paj yi yaꞌtz taneꞌn, je tzun tal Kataj Ryoseꞌj: “Nocpon tan xiteꞌn cuꞌn yi tnum Samaria. Jalt yi eꞌchk kꞌuchbeꞌn scyajk cyen. Tzꞌocpon tetz jun amaꞌl kalel tzꞌawleꞌt uva tuꞌ. Tzꞌelpon inchitol yi eꞌchk cꞌub yi xconak tan jeꞌseꞌn chicaꞌl. Jalt xeꞌ eꞌchk caꞌl slajluchaxk cyen.
7 Cyakil yi eꞌchk chiryosil yi banij cuntuꞌ taneꞌn xitok, nin tzꞌocpon kꞌaꞌkl yi eꞌchk xmil yi na chimejeꞌ cyen swutz. Na yi eꞌ paleꞌ ja chilokꞌ eꞌchk tzeꞌaꞌtz tu eꞌchk chiryosilaꞌtz tan yi pwok yi nchicambaj scyeꞌj yi eꞌ wiꞌtz bnol tetz cwent chityoẍil. Nin mben yi eꞌchk teblalaꞌtz cꞌaꞌy, nin xconk yi pwok cyakꞌun chicontr tan chichojleꞌn wiꞌtz bnol tetz tuꞌ,” stzun Kataj.
Yi oꞌkl yi mban Miqueas tan bis
8 Tan yi eꞌchk xtxolbilaꞌtz, na chimbisun nin na nokꞌ. Quiꞌt xcon inxajab waꞌn, nin quiꞌt tzꞌoc beꞌch wetz sweꞌj. Nokꞌok chi na okꞌ jun xoꞌj lakꞌbal. Nin ẍchinchunank tan bis, chi yi chunaꞌn yi na bajij teꞌj jun almaꞌ.
9 Juncuꞌn ja wiꞌt loꞌon yi tnum Samaria, nin quiꞌct rmeril tan bnixeꞌn junt tir. Nin ja ben loꞌon yi jun ilaꞌtz jalen Judá, nin ja oponeꞌn Jerusalén, yi tnum kale najlcheꞌt yi eꞌ intanum.
10 Quil chibenuꞌ joylaj tan xtxoleꞌn yi mbi mbajij scyeꞌjuꞌ scyetz yi eꞌ aj Gat bantz quil tzꞌel chikꞌajab scyeꞌjuꞌ. Quil chichajuꞌ scyetz yi wiꞌnin na chokꞌuꞌ, ma na chitoleꞌ cuꞌn quibuꞌ tul puklaj tan yi bis oꞌkl yi ateꞌ cun tuꞌ.
11 Nchaꞌtz eꞌuꞌ aj Safir,c chelpon lajuꞌnuꞌ le chitanumuꞌ. Txꞌanl cuntuꞌ ẍchibneꞌuꞌ, nin chin txꞌixwil nin chiwutzuꞌ sbneꞌ, yil cheꞌl ticyꞌleꞌnuꞌ cyaꞌn chicontruꞌ. Ej nin yi eꞌ aj Zaanán,d quil cheꞌl tzaj solteꞌj yi chitnumil tan paj yi xoꞌw yi ateꞌ cuꞌnt. Ej nin yi eꞌ aj Bet-esel ẍchokꞌok tan bis scyeꞌjuꞌ. Poro quil jal ẍchꞌeybil cyeruꞌ ẍchixoꞌl tantuꞌ yi nakaꞌj ateꞌtuꞌ.e
12 Ej nin yi eꞌ yi najlcheꞌ Marot,f nternin na tzꞌuyin chicꞌuꞌl, nin nternin na el cyalmaꞌ tan jaleꞌnt tzatzin paz. Poro quiꞌc rmeril, na nchaꞌtz Jerusalén sloꞌonk tan Kataj Ryos.
13 Nchaꞌtz eꞌuꞌ aj Laquis, chin pajol caꞌwl nin eꞌuꞌ, chi eꞌ banakeꞌ yi eꞌ xonl Israel. Nin tan chipajuꞌ ja jal quil yi eꞌ aj Sión, na ja chixom te cyajtzaꞌkluꞌ. Chocpon yi chichejuꞌ cyanuꞌ sjuꞌak eꞌchk chicareꞌtuꞌ tan cyeleꞌnuꞌ ojk. Poro quil cheꞌluꞌ liwr.
14 Na yi eꞌuꞌ aj Laquis tu yi eꞌ cyeruꞌ yi eꞌuꞌ aj Moreset-gat, ẍchixconkuꞌ cyakꞌun yi eꞌ xonl Israel chi jun oy tan mayseꞌn kloꞌ chicꞌuꞌl yi chicontr. Nin yi eꞌ wiꞌtz ajcaw tetz Israel choꞌn kꞌuklij chicꞌuꞌl scye yi eꞌ aj Aczib tan chiclaxeꞌn kloꞌ ẍchikꞌab chicontr, poro lastum, quinin lchixcyeꞌ teꞌj. Na kꞌubaj cꞌuꞌlalg tuꞌ scyakꞌeꞌ yi eꞌ aj Aczibaꞌtz scyetz.
15 Ma axwok aj Maresa,h je na tal Kajcaw yi kaRyosil tzitetzeꞌj: “Tzinchakeꞌ nin jun cꞌoloj chin sanlar yi ẍchixcyek tziteꞌj, nin ẍchicambajeꞌ itanum. Nin yi eꞌ iwunakil yi at chikꞌej tzꞌocpon cyewal quib tul jun chin picy yi na biꞌaj Tetz Adulam.
16 Chaꞌstzun te axwok aj Sión, jukwok len tircuꞌn xiꞌil iwiꞌ tan ẍchajleꞌn yi wiꞌnin na cxbisun scye initxaꞌ, yil chiben pres. Na nchiben ticyꞌleꞌn cyakil yi eꞌ initxajil pres,” stzun Kataj.