Yi chipaltil yi eꞌ wiꞌtz ajcaw cwent Israel iꞌtz chibuchleꞌn wunak
2
1 Lastum yi eꞌ ajcaw yi na baj cuꞌn akꞌbal cyaꞌn tan xtxumleꞌn yi mbi cuꞌn ẍchibneꞌ tan cambeꞌn eꞌchk meꞌbiꞌl, nin na jal puntil cyaꞌn, na at yi caꞌwl ẍchikꞌab.2 Na ko na el cyalmaꞌ te jalaj chin cojbil, na chixcyeꞌ tan majleꞌn. Nin ko na el cyalmaꞌ te caꞌl junt, na chixcyeꞌ tan cambeꞌn. Na na choꞌc tan chibuchleꞌn yi eꞌ wunak tu chinajal, nin na chixcyeꞌ tan majleꞌn len chimeꞌbiꞌl.
3 Poro je na tal yi Kajcaw yi kaRyosileꞌj: “Nchaꞌtz in, na chintzan tan xtxumleꞌn yi mbi cuꞌn tzimbneꞌ tan telseꞌn xel scyeꞌj yi eꞌ ajcawaꞌtz. Tzꞌopon jun chin caws waꞌn squibaj, yi cyaꞌl nin jun tzꞌelpon liwr tkꞌab. Yil tzꞌopon yi cawsaꞌtz quiꞌt tzun lcyocsaj quibtz nim tu cyajtzaꞌkl. Na chin xoꞌwbil nin sbneꞌ yi jun tiempaꞌtz.
4 Tul yi jun tiempaꞌtz tircuꞌn yi eꞌ wunak chocpon tan chixochleꞌn, nin je scyaleꞌeꞌj: ‘Yi oꞌ ketz ja keꞌl cuꞌn swutz. Lastum yi katnumil yi iꞌtz tetz Ryos sajleꞌn, ma yi jaluꞌ ja jal junt taw, nin cyaꞌl jun xcyek cyen tan majleꞌneꞌl tzaj. Na tircuꞌn yi eꞌchk kacojbil ja jatxlij ẍchikꞌab yi eꞌ kacontr,’ cheꞌch sbneꞌ.”
5 Chaꞌstzun te eꞌuꞌ yi at caꞌwl ẍchikꞌabuꞌ jaluꞌ, quiꞌt choꞌcuꞌ cyajlal yi eꞌ tanum Ryos, nin quiꞌt chixconuꞌ tan jatxleꞌn eꞌchk amaꞌl cwent Israel.
Yi eꞌ yi qui na cyaj quibit yi yol Miqueas
6 Je na cyal yi eꞌ wunakeꞌj: “Quiꞌt na kaj kubit yi eꞌchk takleꞌn yi na cẍtzan tan xtxoleꞌn skeꞌj. ¡Na yi eꞌchk ilaꞌtz quiꞌc rmeril tan tuleꞌn skawutz!” 7 “¿Ko na tzun aꞌwij tan tuleꞌn il skawutz ketz, yi oꞌ ketz yi oꞌ mero xonl kꞌajtzun Jacow? Quiꞌc rmeril. ¿Ja ptzun icyꞌ paj Kataj Ryos skeꞌj? ¿Yaꞌtz ptzun puntil na ban Katajtz skeꞌj ketz? Quiꞌ loꞌ. ¿Qui peꞌ na takꞌ Kataj chibanl yi eꞌ yi chin jicyuch nin te cyajtzaꞌkl, chi kutaneꞌn ketz?” cheꞌch na bantz.
8 Ma jaluꞌ, yi eꞌ cyeruꞌ ja chibanuꞌ cyajbiluꞌ scye yi eꞌ intanum, na na choꞌcuꞌ tan majleꞌn len yi eꞌchk balaj beꞌchok yi na chicambaj yi eꞌ sanlar yi na chipakxij tan oyintziꞌ. Wech le wutz cyetz cyajtzaꞌkl yi ja wiꞌt cheꞌl liwr yi na chuꞌl le chitanum. Poro quiꞌ, na list nin quitaneꞌnuꞌ tan majleꞌn len yi eꞌchk takleꞌn yi ja chicambaj le oyintziꞌ.
9 Nchaꞌtz na choꞌcuꞌ tan chilajeꞌn len yi eꞌ prow xmaꞌlcaꞌn scyuchꞌ chinitxajil xeꞌak chicaꞌl kale ajleꞌt chicꞌuꞌl. Nin tan yi xtxolbilaꞌtz ja el chikꞌej yi eꞌ nitxaꞌ cyanuꞌ chi eꞌ tuꞌk txuc.
10 Chaꞌstzun te quiꞌt lchaꞌtijuꞌ tul yi amaꞌleꞌj tan ujleꞌn, ma na cheꞌlkuꞌ tzoneꞌj. Quil chixcyeꞌ cunuꞌ mas. Na chin xoꞌwbil nin yi eꞌchk takleꞌn yi na chibanuꞌ tul yi amaꞌleꞌj, yi quiꞌc nin muꞌẍ banl at cyanuꞌ.
11 Je na cyal yi eꞌ yi na cyocsaj quib elsanl stziꞌ Ryoseꞌj: “Skakꞌeꞌ win tu xcꞌalaꞌ scyeruꞌ,” cheꞌch. Nin jalcunin na xom nin chiwiꞌuꞌ-tz scyeꞌj, nin na kꞌukeꞌ chicꞌuꞌluꞌ te chiyol, wech na laꞌjil tuꞌ na cyal. Ma yi yol yi na wal wetz, yi iꞌtz yi mero bintzij, qui na cyajuꞌ cyocsajuꞌ.
Tzꞌocpon Kataj Ryos tan chimolcheꞌn junt tir yi eꞌ tetz tanum
12 Je yol Katajeꞌj: Chicpon injutzꞌil junt tir yi eꞌ xonl Jacow, yi eꞌ xonl Israel. Chuꞌl injutzꞌil yi coboxaꞌtz yi ẍchiclaxok cyen.a Chocpon injutzꞌil tul jun ntziꞌ peꞌm,b chi na choꞌc jutzꞌiꞌn cobox awun, nka chi na chimolxij tan chiwaneꞌn tul jun amaꞌl. Coboxeꞌn tal chixoneꞌn ẍchiclaxok cyen, poro ẍchiẍchꞌink chi ik jun cꞌoloj cunin eꞌ.
13 Sbajxok Kataj Ryos ẍchiwutz yi eꞌaꞌtz tan jakleꞌn chibeꞌ, nin ẍchixomok nin wutz coc iꞌ. Nin cyaꞌl jun xcyek tan chimakleꞌn, na cheluꞌl liwr lakak tnum kale ateꞌt. Yi chiReyil yi Kataj Ryos sbajxok iꞌ tan jakleꞌn yi beꞌ ẍchiwutz.