Jun xtxolbil scyetz yi eꞌ wiꞌtz ajcaw yi ploj na chiban
3
1 Ma jaluꞌ, eꞌuꞌ jun cꞌoloj gobernador, nin wiꞌtz ajcaw cwent Israel, quibit tzajuꞌ yi xtxolbileꞌj yi swaleꞌ nin scyeruꞌ. Tajweꞌn tzꞌel chitxumuꞌ tetz yi mbiꞌtz chimunluꞌ: Iꞌtz yi nicyꞌnintuꞌ chicawunuꞌ squibaj cyakil yi eꞌ nim juy.2 Poro yi eꞌ cyeruꞌ qui na chibanuꞌ taneꞌn yi balaj cawuꞌn, ma na ntin yi eꞌchk ajtzaꞌkl yi junt len na chitzanuꞌ tan banleꞌn taneꞌn. Ntin na chitzanuꞌ tan xileꞌn cyeꞌj yi eꞌ intanum yi chin meꞌbaꞌ-t nin quitaneꞌn tan chipajuꞌ.
3 Niꞌcuꞌntz chi itzꞌenleꞌnk na chibaj jujun cyanuꞌ. Niꞌcuꞌntz chi najk chitzanuꞌ tan xileꞌn len chichiꞌbel. Nin najk choꞌcuꞌ tan wakꞌeꞌn cuꞌn chibakil. Niꞌcuꞌn quitaneꞌn eꞌ intanum ẍchiwutzuꞌ chi ik chiꞌbaj tuꞌ tetz cumir tan beneꞌn tul chiẍwokꞌuꞌ.
4 Poro tzꞌopon jun kꞌej yi copon chiwutzuꞌ tetz Ryos tan jakleꞌn ẍchꞌeybil cyeruꞌ, poro yi iꞌ tetz quil tbit chitziꞌuꞌ. Nin tzꞌelpon tewal tib iꞌ ẍchiwutzuꞌ tan tircuꞌn yi eꞌchk takleꞌn yi chin juntlen nin yi na chitzanuꞌ tan banleꞌn.
Jun xtxolbil scyetz yi eꞌ yi na cyocsaj quib elsanl stziꞌ Ryos
5 Yi eꞌ prow intanum xubsnakeꞌ tu cyajtzaꞌkl tan chipajuꞌ yi eꞌ cyeruꞌ yi na cyocsaj quibuꞌ elsanl stziꞌ Ryos. Ntin na chitzanuꞌ tan chisubleꞌn, na na cyaluꞌ yi tzꞌul tzatzin paz squibaj yi eꞌ yi na cyakꞌ chiwaꞌuꞌ. Poro na jal oyintziꞌ ẍchixoꞌluꞌ scyuchꞌ yi eꞌ yi qui na cyakꞌ chiwaꞌuꞌ. Nin je yol Kataj Ryoseꞌj scyeruꞌ, yi eꞌuꞌaꞌtz yi na cyocsaj quibuꞌ elsanl stziꞌ iꞌ:
6 “Quiꞌt tzinchaj eꞌchk xtxolbil tzitetz lakꞌbal chi tul wutzicyꞌ taneꞌn, nin quiꞌt wakꞌ amaꞌl tzitetz tan itilol tul tzꞌoꞌtz yi mbi na xon tzaj ek caꞌp,” chij Kataj. Nin tan yi eꞌchk xtxolbilaꞌtz tzꞌoꞌtz nin tunin sbneꞌ chiwutzuꞌ yi eꞌuꞌaꞌtz yi na cyocsaj quibuꞌ elsanl stziꞌ Ryos.
7 Tircuꞌn yi eꞌ nacholaꞌtz tzꞌelpon chitxꞌix. Quiꞌct nin jun yol scyaleꞌ. Tircuꞌn eꞌ scyeweꞌ len chiwutz tan yi txꞌixwilil yi ateꞌ cuꞌnt.
8 Ma wetz na i yi espíritu Kataj na tzan tan takꞌleꞌn inchamil tu balaj wajtzaꞌkl, nin iꞌ na akꞌon inwalor tan qui inxobeꞌn tan talcheꞌn cyen cunin scyeruꞌ yi eꞌuꞌ cuꞌn pajol caꞌwl swutz Ryos, nin yi at len chipajuꞌ chitxꞌokꞌbeꞌnuꞌ swutz iꞌ.
Yi chipaltil yi eꞌ bajxom tetz tnum
9 Ma jaluꞌ, eꞌuꞌ jun cꞌoloj gobernador nin wiꞌtz ajcaw cwent Israel, yi eꞌuꞌaꞌtz yi qui na chibanuꞌ taneꞌn eꞌchk caꞌwl yi at ẍchikꞌabuꞌ, nin yi ntin na chitzanuꞌ tan poꞌtzeꞌn yi eꞌchk takleꞌn yi baꞌn atit, quibit tzajuꞌ yi xtxolbileꞌj.a
10 Na chitzanuꞌ tan ẍchꞌuyseꞌn yi tnum Jerusalén wi Sión, poro tan tuꞌ yi na choꞌcuꞌ tan chibiyleꞌn wunak tan majleꞌn len chimeꞌbiꞌl, nin tan paj yi eꞌchk alakꞌ yi na chibanuꞌ scyeꞌj.b
11 Ej, nin yi eꞌ pujul xtisyaꞌ yi ateꞌ ẍchixoꞌluꞌ cuj cyaꞌn yi na akꞌlij pwok scyetz tan quiꞌt takꞌleꞌn castiw jun. Nin yi eꞌ paleꞌ cuj cyaꞌn kol choꞌc tan kachusleꞌn, poro ntin kol cheꞌ kachoj, na pwok tuꞌ chiwutz cyen teꞌj. Nin yi eꞌ elsanl stziꞌ Ryos na chijak pwok ntin tan talcheꞌn tuꞌ yi mbi na xon tzaj swutz jun, nin na cyal yi iꞌtz Kataj Ryos na aꞌlon scyetz, poro quiꞌ. Na je chiyoleꞌj: “Yi Kataj Ryos xomij iꞌ skeꞌj, nin quiꞌc jun il tzꞌul skawutz ketz,” cheꞌch na ban.
12 Chaꞌstzun te, eꞌuꞌ ajpaj, yi tzꞌocpon cyen yi tnum Jerusalén yi at wi yi juꞌwtz Sión tetz jun amaꞌl kale tzꞌawleꞌt ujul tuꞌ. Ntin kꞌuchbeꞌn caꞌl sjalok cyentz. Nin yi amaꞌl kale atit yi templo, snojk tan chꞌim tu xtzeꞌ.c