Yil jal tzatzin paz tan Kataj Ryos Jerusalén
4
1 Poro je sbajokeꞌj le wiꞌtzbil tiemp.a Yi juꞌwtzb kale atit yi caꞌl Kataj Ryos, chin wutz tkan nin sbneꞌ swutz tircuꞌn eꞌchk mas juꞌwtz. Nimteꞌn cuꞌn kꞌej yi jun juꞌwtzaꞌtz sbneꞌ swutz yi eꞌchk mas juꞌwtz yi at beneꞌn tziꞌn. Nin tircuꞌn yi eꞌchk mas tnum chuꞌl tan takꞌleꞌn kꞌej. 2 Wiꞌnin jilwutz wunak chuꞌl, choꞌn cuꞌn ẍchisajk tulak eꞌchk nación joylaj, nin je scyaleꞌeꞌj: “Chisajkuꞌ skeꞌj, na nkaben wi yi wutzc tetz Kataj, kale atit caꞌl yi Ryosil Jacow, tan ẍchajol iꞌ yi balaj beꞌ sketz, bantz penin skꞌil kaxon,” cheꞌch yi eꞌ wunakaꞌtz sbneꞌ. Na yi eꞌchk caꞌwl tu yi ẍchusuꞌn Kataj choꞌn tzꞌeluꞌl le tnum Jerusalén yi choꞌn at wi juꞌwtz Sión.
3 Nin tzꞌocpon Kataj Ryos tan pujleꞌn xtisyaꞌ ẍchixoꞌl eꞌchk lmak tnum beneꞌn tziꞌn wi munt, nin tzꞌocpon iꞌ tan banleꞌn taneꞌn yi eꞌchk cyoyintziꞌ. Nin tzꞌocpon yi chispar cyaꞌn tetz chꞌoc, nin yi chilans tetz jos.d Cyaꞌl jun tzꞌocpon tan xconseꞌn junt tir yi eꞌchk maꞌcl tan oyintziꞌ teꞌj junt tnum, nin cyaꞌl kubitwit yi najk tzan chichusleꞌn wunak tan chibeneꞌn tan oyintziꞌ.
4 Cyaꞌl nin tzun jun xoboktz tkꞌab jun contr, ma na ẍchijunal len cuꞌn ẍchuꞌjek len jakꞌak mujil eꞌchk wiꞌ uva, nka eꞌchk wiꞌ ibẍ yi sjalok len scyuchꞌ.e ¡Jun cuꞌn yaꞌstzun sbajok, na yaꞌstzun yol Kataj Ryos, yi cyaꞌl na xcyeꞌ quen teꞌj!
5 Yi eꞌchk tnum, iẍnin kꞌukleꞌt chicꞌuꞌl scyeꞌjak cyetz chiryosil. Poro yi oꞌ ketz yi oꞌ xonl Israel kabneꞌ ketz taneꞌn yi yol Kataj yi ketz kaRyosil.
Yil tzꞌoc Kataj tan chicolcheꞌn yi eꞌ tetz tanum
6-7 Je yol Kataj Ryoseꞌj, yi tzꞌelpon cuꞌn teꞌj: “Tul yi jun kꞌejlalaꞌtz yi at tulbil,f chicopon injutzꞌil yi eꞌ tal wawun, yi wakꞌnak chicaws, yi eꞌ yi coꞌx quitaneꞌn, yi kꞌeꞌxnakeꞌt yi elnakeꞌ xit. Scye yi cobox eꞌaꞌtz yi ẍchiclaxok cyen, sbnixok jun chin nación waꞌn yi cyaꞌl nin jun xcyek quen teꞌj. Yi in wetz yi in Ryos, ẍchincawunk tzuntz wi Sión squibaj yi eꞌ intanumaꞌtz sbneꞌ opon tunintz.”
8 Ma jaluꞌ Jerusalén, aẍ yi ẍchamil tu yi tapij yi na xcon tan chicolcheꞌn yi eꞌ wawun, yi eꞌ aj Sión. Cẍocpon bin junt tir tetz yi wiꞌtz tnum tul yi amaꞌl Israel yi wiꞌnin kꞌej sbneꞌ, chi banak tentz.g
9 Poro yi jaluꞌ, axwok aj Jerusalén na cxchꞌinwok chi na ẍchꞌin jun xnaꞌn yi uleꞌn tlen tuꞌ atit yos tuchꞌ. Poro iꞌtz tan paj yi quiꞌt na aꞌw cawuꞌn tan yi ireyil. Ej nin iꞌtz tan paj yi ja chiquim yi eꞌ akꞌol cyajtzaꞌkl yi eꞌ ibajxom.
10 Juncuꞌn copon itolil itib nin cxchꞌinkwok tan yi chꞌon yi tzitijeꞌ, na cxelponwok lajuꞌn tan inajeweꞌn joylaj. Tajweꞌn tan iwiteꞌn xoꞌl chꞌim. Cxopon jalen Babilonia. Poro ilenin tzꞌocpon Kataj Ryos tan icolcheꞌn tul yi jun amaꞌlaꞌtz.
11 Copon chimolol quib wiꞌnin wunak tetz eꞌchk amaꞌl tan oyintziꞌ tziteꞌj. Nin je scyaleꞌeꞌj: “¡Quin! Cheꞌ kaxiteꞌ cunin yi eꞌ aj Jerusalén. Tzꞌelk chitxꞌix kaꞌn, nin kicyꞌseꞌ cunin kacꞌuꞌl scyeꞌj,” cheꞌch sbneꞌ.
12 Poro yi eꞌ wunakaꞌtz yi chimoleꞌ quib, qui na el chitxum tetz yi mbi cuꞌn na xtxum Kataj Ryos scyeꞌj, nin qui na quil yi mbi na xon tzaj ẍchiwutz. Quil tzꞌel chitxum tetz yi tzꞌocpon Ryos tan chimolcheꞌn cuꞌn chi na molxij triw tan toqueꞌn yakꞌpeꞌn tul er.
13 Je staleꞌ Kataj Ryoseꞌj: “¡Axwok jun cꞌoloj aj Sión, quibeneꞌnk tan yakꞌpeꞌn yi triwaꞌtz! Sjalok ichamil chi ẍchamil jun tor yi chi ik chꞌichꞌ cuꞌn yi tucꞌ, nin chi ik brons cuꞌn yi pacꞌ, tan cyelseꞌn cuꞌn eꞌchk naciónaꞌtz swutz. Cxocponwok tan majleꞌn len cyakil chimeꞌbiꞌl tuml yi meꞌbiꞌl yi alkꞌaꞌn tuꞌ ncyulej, nin tzitakꞌeꞌwok tircuꞌn swetz, na in taw cyakil yi munt,” chij Kataj.