5
1 “Poro axwok jun cꞌoloj aj Jerusalén, banwok list itib, na ja wiꞌt chuꞌl yi icontr solteꞌj itnumil, nin chocpon tan buchleꞌn cunin yi wiꞌtz itajcawil.Yil jal jun balaj wiꞌtz ajcaw tan Ryos Israel
2 ”Axwok aj Belén yi nchaꞌtz na biꞌaj Efrata, nkꞌeꞌtz yi quiꞌk mas ikꞌej ẍchiwutz yi eꞌ mas tnum cwent Judá, na choꞌn stzꞌitzꞌok jun ajcaw tzixoꞌlwoka yi scawunk tibaj cyakil Judá tu Israel. Na yi iꞌ tetz at tzaj iꞌ sajleꞌnix tunintz.”
3 Poro te yi tiempeꞌj, scyajk cyen colil Kataj yi axwok itetz, yi axwok meꞌl cyꞌajl iꞌ, jalen yil tzꞌul yos tzituchꞌb. Ej copon tzun chimolol quibtz tziteꞌj yi eꞌ itanumaꞌtz yi elnak xit beneꞌn tziꞌn.
4 Tzꞌocpon tzun yi reyaꞌtz tan chipstoreꞌn yi eꞌ tawun, tan yi porer tu yi kꞌej Kajcaw kaRyosil. Penin tzun skꞌil ẍchinajanktz le chitanum, nin sjalok wiꞌnin kꞌej Kataj Ryos ẍchiwutz cyakil wunak beneꞌn tziꞌn wi munt.
5 Sjalok tzun tzatzin paztz taꞌn.c
Yil chiclax yi eꞌ xonl Israel
Poro yil chuꞌl yi eꞌ aj Asiria tan oyintziꞌ scye yi katnum, nin yil choꞌc kloꞌ tul cobox kaꞌamaꞌl tetz coloꞌn ib, nchiben tzun kachakol juk nka wajxak wiꞌtz ajcaw yi wiꞌnin chikꞌej tan makleꞌn chiwutz.
6 Yi eꞌ wiꞌtz ajcawaꞌtz ẍchicawunk tibaj tircuꞌn Asiria,d yi tanum Nimrod, na xconk chispar cyaꞌn tan chicaweꞌn. Nin kelpon liwr cyaꞌn yi eꞌ wiꞌtz ajcawaꞌtz ẍchikꞌab yi eꞌ aj Asiria, yi nsken wiꞌt choꞌc tzaj tul katnumil tan majleꞌn kloꞌ kaꞌamaꞌl.
Yil chixit yi eꞌ contr Israel
7 Ej nin sjalok chibanl yi eꞌ mas amaꞌl beneꞌn tziꞌn wi munt cyakꞌun yi cobox tal xonl kꞌajtzun Jacowaꞌtz yi ẍchiclaxok cyen.e Niꞌcuꞌn ẍchibneꞌ ẍchixoꞌl yi eꞌ wunkaꞌtz, chi kꞌab cheꞌw yi na takꞌ Kataj, nka niꞌcuꞌn ẍchibneꞌ chi aꞌbal yi na cuꞌ tibaj eꞌchk itzaj, yi nkꞌeꞌtz wunak tuꞌ txumul tetz.
8 Ej, nin yi cobox tal xonl kꞌajtzun Jacowaꞌtz yi ẍchiclaxok cyen, chocpon chi ik león yi cyaꞌl xcyeꞌ quen scyeꞌj, nka chi jun león ẍchixoꞌl cobox tal cneꞌr, yi katzij cuꞌn lcheꞌ tulej, nin yi quiꞌc nin jun nink clax tkꞌab. Cheꞌn cunin tzun ẍchibneꞌ yi eꞌ xonl kꞌajtzun Jacowtz.f
9 Chocpon tzuntz tan oyintziꞌ scyeꞌj yi eꞌ yi na chiꞌch chicꞌuꞌl scyeꞌj, nin ẍchixcyek tan chixiteꞌn cuꞌn chicyakil.
10 Je yol Kataj Ryoseꞌj, yi tzꞌelpon cuꞌn teꞌj: “Axwok xonl Israel, tul yi jun kꞌejlalaꞌtz yi at tulbil, chicopon imbiyol cyakil yi ichej tetz oyintziꞌ, tuml yi eꞌchk icareꞌt tetz oyintziꞌ, tircuꞌn xitok waꞌn.
11 Kꞌuchiꞌn cuꞌn swulejeꞌ tircuꞌn yi tapij yi banij itaꞌn solteꞌj yi itnumil tan icolcheꞌn ẍchikꞌab icontr.
12 Nchaꞌtz ẍchitzajk yi eꞌ aj wutz mes waꞌn yi ateꞌ tzixoꞌlwok, scyuchꞌ yi eꞌ yi na choꞌc tan talcheꞌn yi mbi sbajok ek caꞌp.
13 Chicopon inxitul yi eꞌchk iryosil yi banij cuntuꞌ itaꞌn, tuml yi eꞌchk cꞌub yi xan tziwutz, bantz quiꞌt cxoꞌcwok tan cꞌuꞌlajeꞌn sbneꞌ opon tunintz.
14 Chijepon imbukꞌul yi eꞌchk tkan tzeꞌ yi xan tziwutz,g nin xituꞌn cunin swulejeꞌ eꞌchk tnum kale atit yi chicaꞌlil yi eꞌchk iryosil.
15 Nin tan yi ẍchiꞌchbeꞌn incꞌuꞌl, swicyꞌseꞌ cunin incꞌuꞌl scye cyakil wunak yi ateꞌ beneꞌn tziꞌn wi munt, na qui na chicujij tan cyoqueꞌn cꞌulutxum jakꞌ incaꞌw,” chij Kataj Ryos.