Yi oyintziꞌ yi at ẍchixoꞌl Ryos scyuchꞌ yi eꞌ xonl Israel
6
1 Eꞌuꞌ jun cꞌoloj xonl Israel, quibit tzajuꞌ yi mbi na tal Kataj Ryos: “¡Quibeneꞌnk tan takꞌleꞌn part ẍchiwutz yi eꞌchk wutz! Loꞌk quibit yi mbi cunin tzitxoleꞌ scyetz.”2 Bitwok tzaj, axwok jun cꞌoloj wutz. Nchaꞌtz nink tbit tzaj yi xeꞌ yi wuxtxꞌotxꞌ, na yi Kataj Ryos tzꞌocpon tan pujleꞌn xtisyaꞌ scyeꞌj yi eꞌ tanum, yi eꞌ xonl Israel nin tzꞌocpon iꞌ tan chiyajleꞌn.
3 Nin je yol iꞌeꞌj: “Axwok jun cꞌoloj intanum Israel, alwok tzaj bin swetz ¿at peꞌ jun takleꞌn ploj yi mmoꞌc imbnol tziteꞌj, nka ja peꞌ noꞌc tan takꞌleꞌn chꞌon tzitetz?
4 Yi in wetz, in nnoꞌc tan itelseneꞌl tzaj jakꞌ chicaꞌwl yi eꞌ aj Egipto, nin ja cxeꞌltzajwok waꞌn liwr tkꞌab yi buchbeꞌn itetz. Ej nin in nchakon nin Moisés, tu Aarón tu Mariy, tan chixconeꞌn tetz ibajxom.
5 Axwok jun cꞌoloj intanum ulk txꞌakx ticꞌuꞌl yi mbiꞌtz xtxumnak yi rey Balac cwent Moab, tan bnol kloꞌ tziteꞌj, nin yi mbi tal Balaam cyꞌajl Beora tetz. Nchaꞌtz ulk txꞌakx ticꞌuꞌl yi mbi mbajij yi iteleꞌn tzaj le amaꞌl Sitim tan itoponeꞌn tan inajeweꞌn Gilgal.b Txumwok tircuꞌn yi eꞌchk balaj xtxolbilaꞌtz yi mimban tziteꞌj,” chij Kataj Ryos.
Yi mbi na taj Kataj Ryos tan kabnol taneꞌn
6 ¿Mbi tajweꞌn tzincyꞌaj nin yil nopon tan lokꞌeꞌn wutz yi Ryos yi taw yi tcyaꞌj? ¿Baꞌn peꞌ kol nopon tan toyeꞌn cobox tal tor yi junixeꞌt yob cyaꞌn, tan pat-xeꞌn tircuꞌn chiwankil swutz iꞌ?
7 ¿Nka stzatzink ptzun Kataj Ryos sweꞌj yi kol woy jun mil cneꞌr tetz, nka lajuj mil tzanlaꞌ yi aceitil oliw cuꞌn? ¿Nka stzatzink peꞌ Kataj sweꞌj yi kol woy yi bajx incyꞌajl tetz intxꞌixwatz, tan ẍchojleꞌn yi wil?
8 ¡Quiꞌc rmeril! Na bitaꞌnt kaꞌn yi mbiꞌtz yi tajbil Ryos sketz. Iꞌtz yil kaban taneꞌn yi eꞌchk takleꞌn balaj, nin yil tzꞌel kakꞌajab squibil quib, nin yil kocsaj kib juy te yi na keꞌl yi na koꞌc tu Ryos.
Yi quil yi eꞌ xonl Israel tu chicaws yi tzꞌul squibaj
9 Quibit tzajuꞌ na tzan Kataj Ryos tan makleꞌn chiwutz yi eꞌ aj Jerusalén, nin baꞌn kol cyekuꞌ ẍchiꞌ iꞌ. Nin baꞌn yi nink quibituꞌ yi mbi cuꞌn na tzan iꞌ tan talcheꞌn. Na je yol iꞌeꞌj:
“Tircuꞌn yi axwok yi najlquix tnum, scyuchꞌ yi eꞌ wiꞌ banl wiꞌ, bitwok tzaj yi xtxolbileꞌj:
10 At axwok yi wiꞌnin imeꞌbiꞌl xe icaꞌl. Poro nkꞌeꞌtz skoj cuꞌn teꞌj mmiban tan jalseꞌn. Na na xcon maꞌlbil itaꞌn yi nkꞌeꞌtz tzꞌaknak cuꞌn. Wiꞌnin na chiꞌch incꞌuꞌl te yi jun itajtzaꞌklaꞌtz.
11 Quiꞌc rmeril tan incuyul chipaj yi eꞌaꞌtz yi na xcon pẍuꞌbil cyaꞌn yi qui tzꞌaknak yi marquil, nka yi banijt yi pẍuꞌbil cyaꞌn tan qui maꞌlal tzꞌaknak cuꞌn.c
12 Ej, nin yi ax itetz yi axwok ric, yi najlquix le yi tnumeꞌj axwok len aj buchunl scye yi eꞌ meꞌbaꞌ, nin yi eꞌ mas wunak chin laꞌj nin eꞌ, nin chin aj subunl nin eꞌ chicyakil cuꞌn.
13 Chaꞌstzun te nocpon tan icawseꞌn, nin cxelpon cuꞌnwok waꞌn swutz. Na quiꞌct ibanl sbneꞌ, tan paj yi eꞌchk itil yi na cxtzan tan juchleꞌn.
14 Cxwankwok, poro quil noj icꞌuꞌl, ma na ilenin tzitijeꞌ weꞌj. Tzimoleꞌ iwaꞌ, poro quil cxcyeꞌwok tan colcheꞌn muꞌẍ tal. Na kol clax cyen muꞌẍ tal itaꞌn, stzajk waꞌn tan yi eꞌchk lmak oyintziꞌ yi copon.
15 Tzꞌocpon ij itaꞌn ttxꞌotxꞌ, poro quil wutzin. Cxocponwok tan banleꞌn aceit, poro quiꞌc ltakꞌ tzitetz. Cxocponwok tan yakꞌpeꞌn yi wutz uva, poro quil baj yi taꞌalil itaꞌn.d
16 Tzitijeꞌ yi caws tan paj yi ja cxomwok te yi caꞌwl Omri, na ja cxomwok te yi tetz cstumbr. Nchaꞌtz ja cxomwok te tajtzaꞌkl Acab scyuchꞌ yi eꞌ najal. Iteꞌn nin yi cyetz cyajtzaꞌklaꞌtz cyꞌaꞌn itaꞌn. Chaꞌstzun te tzꞌelpon itxꞌix waꞌn nin chin xoꞌwbil nin yi eꞌchk takleꞌn yi sbajok tziteꞌj. Chelpon yab wunak te yi mbi na bajij tziteꞌj, nin chitzeꞌeꞌnk tziteꞌj. Tzꞌelpon inkꞌab te inyol,”e chij Kataj Ryos.