Chin juntlen nin cyajtzaꞌkl yi eꞌ xonl Israel
7
1 ¡Lastum in! Niꞌcuꞌn in tu jun aj txoyinl yi quiꞌc nin jun tal wutz uva, nka jun tal wutz ibẍ na noj quen swutz, nin yi yaꞌstzun na el talmaꞌ teꞌj tan bajseꞌn. Niꞌcuꞌn tzun wutaneꞌn wetz, na qui na jal jun intanum waꞌn yi baꞌn taneꞌn swutz Ryos.a 2 Ej nin quiꞌc jun wunak beneꞌn tziꞌn wi munt yi jicyuchk teꞌj tajtzaꞌkl, nin yi choꞌnk kꞌuklij cꞌuꞌl te Ryos, ma na eꞌ len cuꞌn biyol nak. Ntin na chitzan tan joyleꞌn puntil tan cweꞌseꞌn tramp ẍchiwutz teꞌn chixonl.
3 Tircuꞌn eꞌ, chin tzꞌaknakt nin le chiwiꞌ yi ẍeꞌn chiban tan banleꞌn eꞌchk yab ajtzaꞌkl. Nin yi eꞌ wiꞌtz ajcaw ntin na chitzan tan jakleꞌn pwok. Nin yi eꞌ pujul xtisyaꞌ ntin xoꞌquiꞌn cyaꞌn. Nin yi eꞌ yi at caꞌwl ẍchikꞌab ntin na chiban yi cyetz cyajbil. Nin na poꞌtij cyakil yi chitanum tan yi eꞌchk ajtzaꞌklaꞌtz.
4 Yi eꞌ yi mas balaj ẍchixoꞌl niꞌcuꞌn eꞌ tu jun wiꞌ txꞌiꞌx. Nin yi eꞌ yi mas jicyuch teꞌj cyajtzaꞌkl ẍchixoꞌl, niꞌcuꞌn eꞌ tu jun wiꞌ laꞌ. Poro tzꞌul chan yi kꞌejlal yil sticyꞌsaj Kataj Ryos cꞌuꞌl scyeꞌj. Yi jun kꞌejlalaꞌtz alijt cyen cyaꞌn yi eꞌ elsanl stziꞌ Ryos sajleꞌn tunintz. Ej nin yil tzꞌul yi jun kꞌejlalaꞌtz, quiꞌt lpujxtz cyaꞌn yi mbil chiban teꞌn.
5 Baꞌnt cuꞌn bin yi quil kꞌukeꞌ chicꞌuꞌluꞌ tan talcheꞌn jun yol tetz jun chiwisinuꞌ, nka tetz jun mero cyamiwuꞌ, nin tuꞌk tetz quixkeluꞌ yi junit eꞌuꞌ tuchꞌ, na qui cunin batz iteꞌn nin chiyoluꞌ xconk cyaꞌn tan contriꞌn scyeꞌjuꞌ.
6 Ej, nin yi eꞌ nitxaꞌ qui na cyakꞌ muꞌẍ tal chikꞌej chitaj, nin yi eꞌ xun na chixcyeꞌ cuꞌn tan oyintziꞌ ẍchiwutz chitxuꞌ. Nin yi eꞌ ilibaj na choyintzin scyeꞌj quilib, na cyakil wunak iꞌtz chixonlteꞌn yi chicontr.b
7 Ma yi in wetz, choꞌn kꞌuklij incꞌuꞌl te inRyosil. Choꞌn ajlij incꞌuꞌl te Ryos yi colpinl wetz, na yi iꞌ tetz na tbit yi intziꞌ tu inkul.
Yil jal junt tir kꞌej yi tnum Israel tetz cyakil tiemp
8 Ma jaluꞌ, yi eꞌ cyeruꞌ yi eꞌuꞌ kacontr, qui bin chitzatzinuꞌ tan yi il yi mmuꞌl skawutz, na quiꞌc na ban yi ko ja keꞌl cuꞌn swutz, sjalok kakꞌej junt tir. Quiꞌc na ban yi ko tul tzꞌoꞌtz na kaxoneꞌt, na tzꞌocpon Kataj Ryos tan xtxekeꞌn kabeꞌ.
9 Bintzij na el katxum tetz yi ja kajuch kil swutz Kataj, poro list kutaneꞌn tan tijleꞌn yi caws yi at tulbil tan iꞌ skibaj. Yil tzꞌicyꞌpon yi cawsaꞌtz kaꞌn tzꞌocpon tzun iꞌ-tz tan takꞌleꞌn chicaws yi eꞌ kacontr. Tzꞌelpon xel cyakil yi eꞌchk takleꞌn yi nchiban kacontr skeꞌj. Nin na el xtxum iꞌ tetz yi mbi tzuntz ja kajuch kil, nin puntil cuꞌn sbneꞌ iꞌ tan kacaweꞌn. Yi Kataj Ryos tzꞌocpon tan cꞌaseꞌn yi kajtzaꞌkl te eꞌchk balaj ajtzaꞌkl, nin skileꞌ yi tetz ẍchamil yil tzꞌoc tan chixiteꞌn yi eꞌ kacontr.
10 Nchaꞌtz yi eꞌ kacontr squileꞌ yi xtxolbilaꞌtz, nin ẍchitxꞌixwok. Na yi eꞌaꞌtz na cyal sketz: “¿Naꞌ atit cyent yi iRyosilaꞌtz yi na ital?” cheꞌch na ban sketz. Poro wiꞌnin skatzatzink yil kil yil tzꞌoc Kataj Ryos tan chiyakꞌpeꞌn chi na ban yi xkꞌol tbeꞌ.
Yil jeꞌ txicbaꞌn junt tir yi tnum Jerusalén
11 Ma jaluꞌ, tzꞌul chan yi tiemp yil tzꞌoc jeꞌseꞌn junt tir yi eꞌchk tapijil yi tnum Jerusalén, nin mben ẍkansaꞌn yi eꞌchk mojomil yi tnum joylaj.
12 Tzꞌul chan yi kꞌejlal yil chimol tzaj quib cyakil yi eꞌ intanum tan cyuleꞌn tan chinajeweꞌn Jerusalén. Cyakil yi eꞌ yi najlcheꞌ cwent Asiria jalen Egipto, nin tircuꞌn yi eꞌ yi najlcheꞌ nakaꞌjil yi tzanlaꞌ Nilo jalen te yi tzanlaꞌ Eufrates chuꞌl len tzoneꞌj Jerusalén. Cyakil yi eꞌ yi najlcheꞌ stziꞌak mar nin yi eꞌ yi najlcheꞌ txoꞌlak wutz chuꞌl len tzoneꞌj Jerusalén tan chinajeweꞌn.c
13 Cyakil yi eꞌchk amaꞌl beneꞌn tziꞌn wi munt xitok waꞌn, poro tan chipaj teꞌn yi eꞌ wunak, tan yi eꞌchk quil yi na chijuch.d
Yi jakol Miqueas chibanl yi eꞌ xonl Israel
14 Ma jaluꞌ Taꞌ, cheꞌ colpeꞌuꞌ yi eꞌ tawunuꞌ, cheꞌ ẍchꞌeyajuꞌ tan cyeleꞌn tzaj colpuj tan yi xtxꞌamijuꞌ na eꞌ teruꞌ. Na chichuc ateꞌ cyen xoꞌl tzeꞌ taneꞌn. Poro at amaꞌl yi chumbalajteꞌn cunin kale atit wiꞌnin chꞌim. Bajxokbinuꞌ ẍchiwutz chi banakuꞌ tentz, yi chibeneꞌn tcyꞌaluꞌ lakak balaj amaꞌl cwent Basán nin cwent Galaad.
15 Ẍchajeꞌuꞌ eꞌchk milawr scyetz chi banak yi cyeleꞌn tzaj tanuꞌ jakꞌ chicaꞌwl yi eꞌ aj Egipto tentz.
16 ¡Nchaꞌtz yil quil yi eꞌ wunak beneꞌn tziꞌn yi eꞌchk milawraꞌtz, ẍchitxꞌixwok na quiꞌc cyetz chiwalor tan makleꞌn! Wech na chin cham nin eꞌ taneꞌn. ¡Quiꞌct nin jun yol scyaleꞌ, nin quil pujxij cyaꞌn yi mbi na bajij scyeꞌj!
17 ¡Loꞌk chibajseꞌn puklaj chi na chiban luꞌbaj tu ẍuluꞌ yi tu na chijut nintuꞌ chiwankil wuxtxꞌotxꞌ! ¡Wiꞌnink chilucneweꞌn sban tan xoꞌw yil chocpon swutzuꞌ, na yi iluꞌ teruꞌ, iluꞌ Ryos!
Yil cuy Kataj Ryos chipaj yi eꞌ tetz tanum
18 Quiꞌc nin junt Ryos cheꞌnk chi iluꞌ Taꞌ,e na yi iluꞌ teruꞌ na cuyuꞌ ketz kapaj nin na el yi kapaj te cꞌuꞌluꞌ yi oꞌ ketz yi coboxteꞌn oꞌ atoꞌ cyen te yi tanumuꞌ.f Wiꞌnin na ẍchajuꞌ yi xtxaxl talmaꞌuꞌ sketz nin jalcunin na cutzaj xtxumuꞌnuꞌ, nin qui na ben tiemp tan yi ẍchiꞌchbeꞌn cꞌuꞌluꞌ skibaj.g
19 Tzꞌelk bin kꞌajabuꞌ junt tir skeꞌj, nink muk cuꞌnuꞌ tircuꞌn yi kil. Joꞌlninuꞌ yi kil jalen xe mar.
20 ¡Quiꞌk stzajscunuꞌ yi lokꞌ ib yi at skaxoꞌl tuchꞌuꞌ, nin ilenink tzꞌocuꞌ tan kuchꞌeyeꞌn chi yi sukiꞌnt tanuꞌ scyetz yi eꞌ kamam Abraham tu kamam Jacow tentz!h