Yi ẍchiꞌcheꞌn cꞌuꞌl Jonás tan paj yi quiꞌt takꞌ Ryos chicaws yi eꞌ aj Nínive
4
1 Ma Jonás quinin tzun tzatzintz te yi mbi cuꞌn bixeꞌ tan Kajcaw. Wiꞌnin tzun ẍchiꞌcheꞌn cꞌuꞌl iꞌ-tz. 2 Toqueꞌn tzuntz tan nachleꞌn Kataj, i tzun taltz:—Tilcuꞌn binuꞌ-tz Taꞌ, yi wal teruꞌ yi atintzaj le wetz intanum yi quil tzꞌelcuꞌnuꞌ te yoluꞌ yi talnakuꞌ. Na yi teruꞌ jalcuꞌn na el kꞌajabuꞌ te alchok.a Bajx na taluꞌ yi stkꞌeꞌuꞌ caws, nin jalcuꞌn na taluꞌ yi quiꞌt. Chaꞌstzun te choꞌn kloꞌ imbeneꞌn wetz jalen Tarsis. 3 Ma jaluꞌ, copon inwutz teruꞌ yi nink chinquim tanuꞌ. Na baꞌn tcuꞌn chinquim, swutz yi itzꞌineꞌt ẍchiwutz yi wunakeꞌj, stzun Jonás bantz tetz Kataj.
4 Ej nintzun tal Kajcaw tetz:
—¿Baꞌn ptzun tzawutz, yi na chiꞌch acꞌuꞌl?
5 Teleꞌn tzun Jonástz le yi tnum. Choꞌn tzun tponeꞌntz xlaj len yi tnumaꞌtz. Nintzun octz tan banleꞌn jun scabteꞌ. Nin cꞌoleꞌcuꞌntz tmujil tan ẍchꞌiweꞌn yi mbi sbajok te yi tnum Nínive. 6 Tkꞌol tzun Kataj Ryos amaꞌl tetz jun tal wiꞌ xojob tan ẍchꞌuyeꞌn tan xconeꞌn tetz muj Jonás. Wiꞌnin tzun stzatzineꞌn quen Jonástz te yi jun tal wiꞌ xojobaꞌtz.
7 Ma le junt eklok, nintzun takꞌ Ryos amaꞌl tetz jun tal amluꞌ tan biyleꞌn yi jun wiꞌ xojobaꞌtz, nintzun skejtz.
8 Ma yi jeꞌnmuleꞌn kꞌej nintzun saj jun chin wutzileꞌn cyekꞌekꞌ tan Kataj, yi chin tzꞌaꞌ nin. Nin yi kꞌej quenin na opon lajp teꞌj Jonás. Sajeꞌn tzun num iꞌ-tz tan paj yi stzꞌaꞌal kꞌej. I tzun taltz:
—Baꞌn tcuꞌn chinquim swutz yi na chintzan tan mucꞌleꞌn kꞌej tzoneꞌj, chij Jonás bantz.
9 Tlol tzun Kataj tetz:
—¿Baꞌn ptzun tzawutz, yi tu na chiꞌch tuꞌ acꞌuꞌl, tan tuꞌ yi ja skej yi jun wiꞌ tzeꞌeꞌj?
—Bintzij, na chiꞌch incꞌuꞌl. Wiꞌnin na chiꞌch incꞌuꞌl. Or chinquim taꞌn, stzun Jonás bantz.
10 Beneꞌnt tzun tlol Kajcaw tetz:
—¿Aẍ ptzun awal tetz yi jun tal wiꞌ xojobaꞌtz? ¿Nin aẍ ptzun nchꞌuysan? Quiꞌ. Yi jun wiꞌ xojobaꞌtz ja chꞌuy waꞌn tul jun intziꞌ akꞌbal. Nin ja skꞌej waꞌn tul jun intziꞌ kꞌej, poro yi aẍatz, na el akꞌajab teꞌj. 11 Iteꞌn nin tzun wutaneꞌntz scyeꞌj yi eꞌ aj Nínive, na na el inkꞌajab scyeꞌj. Nchaꞌtz at mas jun cient tu junak mil wunak,b yi qui na el chitxum te yi mbi na chiban. Nin at wiꞌnin cyawun, yi lastum tuꞌ kol chiquim. Chaꞌstzun te quiꞌt lwakꞌ chicaws, stzun Kataj bantz tetz Jonás.