Abdías i

ABDÍAS

Txꞌolbil Xoꞌl Yi Liwreꞌj

Yi biꞌaj Abdías na elpont “Ẍchakum Kataj Ryos.” Cyaꞌl jun na el xtxum tetz yi mbi tiempil cyajeꞌn cyen stzꞌibal Abdías yi yol Kataj yi na jal tul yi liwreꞌj. At eꞌ na aꞌlon yi qui cunin batz ja tzꞌibxij te yi tiemp yi na cawun tzaj yi rey Joram cwent Jerusalén (—848—841 A.C.).

Yi xeꞌ yi xtxolbil yi na jal tul yi liwr Abdías iꞌtz yi eꞌchk takleꞌn yi chin juntlen nin yi nchiban yi eꞌ aj Edom, scyeꞌj yi eꞌ aj Judá, na yi loꞌoneꞌn yi tnum Jerusalén cyakꞌun chicontr, yi eꞌ aj Edom eꞌ oc tan quichꞌeyeꞌn yi contraꞌtz. Nin ja el ticyꞌleꞌn tircuꞌn yi eꞌchk takleꞌn cyaꞌn yi at Jerusalén. Nchaꞌtz ja chicambaj muꞌẍ te yi amaꞌl cwent Judá.

Na tal Abdías yi stzꞌakꞌlok chicaws yi eꞌ aj Edom tan yi eꞌchk takleꞌn cachiꞌ yi nchiban (-1-14). Nchaꞌtz na tal yi at tulbil yi jun kꞌejlal yi sticyꞌsaj Ryos cꞌuꞌl scyeꞌj yi eꞌ tetz contr, nin yil jal junt tir chikꞌej yi eꞌ aj Judá (-15-21).

Yi liwreꞌj yaꞌstzun yi liwr yi mas tal juy tul cyakil yi Antiw Testament, nin yi chusuꞌn yi na jal kaꞌn tul, iꞌtz yi xtxolbil te yi jun chin caws yi at tulbil tan Kataj squibaj yi eꞌ aj Edom yi eꞌ xonl kꞌajtzun Esaú le wiꞌtzbil tiemp, na sajleꞌnix tunintz, wiꞌnin eꞌ oc tan chibuchleꞌn yi eꞌ xonl Israel.

Yi Weklil Yi Liwreꞌj

Yi bajx wekl (Vs. 1-9) na jilon te yi ẍeꞌn tzꞌel chitxꞌix yi eꞌ aj Edom.

Yi caꞌp wekl (Vs. 10-14) na jilon te yi quil yi eꞌ aj Edom, yi chin juntlen nin.

Yi toxeꞌn wekl (Vs. 15-21) na jilon te yil ticyꞌsaj Kataj Ryos cꞌuꞌl scyeꞌj cyakil nación yi contr teꞌj iꞌ.