Cyaꞌl jun sclaxok tkꞌab yi caws
9
1 Ej i tzun bantz, nin wil chi tul wutzicyꞌ taneꞌn yi choꞌn txiclij Kataj Ryos xlaj yi altar, i tzun taltz:“Chuqueꞌn yi eꞌchk tkan chitemplo, bantz sajeꞌn nil yi eꞌchk ptzoꞌm, bantz sajeꞌn nil tircuꞌn yi caꞌlaꞌtz squibaj yi eꞌ wunak. Ma yi eꞌ yil chiclax cyen, ẍchiquimok waꞌn tan spar tul oyintziꞌ. Mpe nink chijoy puntil tan cyeleꞌn ojkuj, quil chiclax. Tircuꞌn ẍchisotzok len.
2 Mpe nink cyew cuꞌn quib jalen xe tzeꞌ kale ateꞌt yi eꞌ almaꞌ, noponintz tan chijeꞌseꞌn tzaj. Mpe nink chiben jalen tcyaꞌj, chinjeponintz tan chikinleꞌn cuꞌn tzaj.
3 Kol chijoy puntil tan cyewal quib jalen yi wiꞌwtz Carmelo, chinjeponintz tan chitzꞌamleꞌn. Nin penink chiben tan ew ib jalen xe mar, ẍchin cawunk nin tetz yi jun chin txuc yi at xe mar yi chin xoꞌwbil nin tan toqueꞌn tan chisotzajeꞌn cuꞌn.
4 Nin kol chiben ticyꞌleꞌn cyaꞌn chicontr le junt tnum, chincawunk nin tan chisotzajeꞌn cuꞌn tan spar. ¡Ilen nin tzinjoyeꞌ puntil tan chixiteꞌn cuꞌn, nkꞌeꞌtz tan jaleꞌn chibanl!”
5 Yi wiꞌtz ajcaw yi kaRyosil, yi cyaꞌl na xcyeꞌ quen teꞌj, wi kꞌab tuꞌ maconeꞌn yi wuxtxꞌotxꞌ, nin tzꞌelpon aꞌ, nin tircuꞌn yi eꞌ wunak ẍchokꞌok tan xoꞌw, niꞌcuꞌn sbneꞌ yi txꞌotxꞌ chi na ban yi tzanlaꞌ Nilo yi nternin na mulkꞌin.
6 Ja bnix yi tetz najbil taꞌn jalen tziꞌn tcyaꞌj, nin ja xcon yi tcyaꞌj taꞌn chi ik jun scabteꞌ. Nin iꞌ yi jun yi na xcyeꞌ tan xtxꞌixpeꞌn yi aꞌ yi piꞌlij tul mar tetz sbakꞌ tan toqueꞌn tetz aꞌbal wiꞌak cojbil. Kataj Ryos biꞌ iꞌ.
7 Je yol Katajeꞌj: “Axwok aj Israel, quil cxoꞌc tan xtxumleꞌn yi atk mas ikꞌej ẍchiwutz yi eꞌ aj Etiopía. Na chi imbanak tan itelseneꞌl tzaj Egipto, iteꞌn nin mimbanaꞌs tan cyelseneꞌl tzaj yi eꞌ filistey Creta. Nin iteꞌn nin imbanakaꞌs scyeꞌj yi eꞌ arameo yi choꞌn cyeleꞌn tzaj waꞌn le tnum Quir. Quiꞌc bin mas itetz ikꞌej ẍchiwutz yi eꞌ wunakaꞌtz.
8 Bitwok tzaj bin: Yi in wetz yi in Ryos, na chintzan tan itilweꞌn, na in contr scyeꞌj cyakil tnum yi na chijuch quil, nin nocpon tan itelseꞌn cuꞌn swutz. Poro yi axwok itetz, yi axwok xonl kꞌajtzun Jacow quil cxtzaj icyakil cuꞌn waꞌn.” Yaꞌstzun yol Kataj Ryos.
9 “Axwok aj Israel bitwok tzaj, chincawunk nin tan toqueꞌn itxaꞌtzeꞌn, chi na oc xtxaꞌtzeꞌn ixiꞌn tan telseꞌn len yi stzꞌisil, nin cyakil yi eꞌ yi niꞌcuꞌn eꞌ tu yi tzꞌis chelpon cuꞌn swutz.
10 Tircuꞌn yi eꞌ yi chin juchul il nin eꞌ ẍchixoꞌl yi eꞌ intanum, ẍchiquimok tul oyintziꞌ, tircuꞌn yi eꞌaꞌtz yi na cyal: Yi oꞌ ketz quil tzꞌul eꞌchk il skawutz, quil kaloꞌon tan jun takleꞌn. Tircuꞌn yi eꞌaꞌtz ẍchisotzok,” chij Kataj.
Ẍchiquiwixk junt tir cobox scyeri eꞌ xonl Israel
11 “Poro tul jun kꞌejaꞌtz nocopon tan xtxicybajeꞌn junt tir yi caꞌwl yi at tzaj tkꞌab kꞌajtzun Rey Luwiy yi taneweꞌn ban. Nin swakꞌeꞌ amaꞌl scyetz yi eꞌ xonl Luwiy tan chicawuneꞌn squibaj yi eꞌ mas wunak, chi nchiban te yi tiemp tetz Luwiy. 12 Ej nin axwok xonl Israel tzicambajeꞌ junt tir yi amaꞌl yi at cwent Edom tu cyakil yi amaꞌl yi at beneꞌn tziꞌn wi munt, yi iꞌtz wetz banak, nin chocpon cyakil wunak jakꞌ icaꞌwl. Yi in wetz yi in yi wiꞌtz ajcaw ja insuk yi jun inyolaꞌtz tzitetz nin nelpon cuꞌn teꞌj,” chij Kataj Ryos.
13 “Tzꞌul jun tiemp yi iẍnin ateꞌt wunak tan jeꞌseꞌn yi cosech tetz triw, yil tzꞌult yi tiemp tan ẍchꞌocl txꞌotxꞌ junt tir. Ej nin tul yi jun tiempaꞌtz, technin wutz uva sjalok. Na ẍchꞌuyok balaj uva wiꞌak juꞌwtz nin lakak jocoꞌj, nin stkꞌeꞌ wiꞌnin taꞌal chi ik yi aꞌ yi na tzaj chul wiꞌwtz. 14 Nocpon tzuntz tan quicꞌleꞌn tzaj yi eꞌ intanum yi najlcheꞌ beneꞌn tziꞌn. Nin chocpon tan jeꞌseꞌn junt tir yi eꞌchk tnum yi cuꞌnak wocꞌ, nin ẍchinajanktz tul, nin chocpon tan tawleꞌn eꞌchk cojbil tan uva, nin sbajk yi taꞌal cyakꞌun. Ej nin chocpon tan tawleꞌn eꞌchk loꞌbaj, nin sbajk yi wutz cyaꞌn. 15 Ẍchicyajk cyen waꞌn tul yi cyetz chitanum nin quil cheꞌl lajuꞌn sbneꞌ opon tunintz tul yi amaꞌl yi akꞌij waꞌn scyetz.” Jun cuꞌn sbajok yi xtxolbileꞌj, na yaꞌstzun yol yi iRyosil.