Yi tilol Amós jun moꞌtx loꞌbaj yi chin kꞌant nin chi tul wutzicyꞌ taneꞌn
8
1 Je junt xtxolbil yi ẍchaj yi wiꞌtz ajcaw yi kaRyosil swetz chi tul wutzicyꞌ taneꞌn. Nin wil jun moꞌtx yi nojnak cuꞌn tan eꞌchk jilwutz loꞌbaj yi chin kꞌant nin, yi tajweꞌn tan bajeꞌn chan. 2 Sajeꞌn tzun jakol Kataj swetz:—¿Amós mbi na awil nin?
—Jun moꞌtx yi nojnak cuꞌn tan loꞌbaj yi chin kꞌant nin, yi tajweꞌn tan bajeꞌn chan, chinch banintz.
—Yi eꞌ xonl Israel niꞌcuꞌn eꞌ tu yi loꞌbajeꞌj, na tajweꞌn tan chibajeꞌn chan taneꞌn. Na quiꞌt tzincuy junt tir chipaj. 3 Yil tzꞌopon yi jun kꞌejlalaꞌtz tan stzajeꞌn yi balaj bitz yi na kubit lakak palacio, tzꞌocpon tzun yi eꞌchk bitzaꞌtz tetz bis oꞌkl. Na wiꞌnin wunak ẍchiquimok, nin tzꞌelpon cꞌoxij chiwankil solteꞌj yi tnum. Nin tan biꞌl xoꞌw, cyaꞌl jun staleꞌ jun yol.
Yi xtxolbilaꞌseꞌj iꞌtz yol Kataj Ryos nin jun cuꞌn tzꞌelpon cuꞌn teꞌj.
Yil tzꞌoc Kataj Ryos tan chicawseꞌn yi eꞌ aj Israel
4 Bitwok tzaj bin yi xtxolbileꞌj, yi axwok itetz yi na cxtzan tan chibuchleꞌn yi eꞌ wunak, nin yi na cxoꞌc tan chixileꞌn yi eꞌ meꞌbaꞌ. 5 Je na icyꞌ ticꞌuꞌleꞌj yi axwok itetz: “Lok tzꞌicyꞌ chan yi jun kꞌej ujleꞌn yi na je ul yi acꞌaj xaw. Nink tzꞌicyꞌ chan yi eꞌchk ujleꞌn lak sawr bantz kacꞌayil chan yi kuxiꞌn triw. Loꞌk tzꞌicyꞌ chan yi jun kꞌej ujleꞌneꞌj bantz jeꞌn jamel ixiꞌn kaꞌn, nin tan xconeꞌn chan yi kapẍuꞌbil kaꞌn yi nkꞌeꞌtz tzꞌaknak cuꞌn yi maꞌlbil. 6 Kocpon tan xileꞌn cyeꞌj yi eꞌ meꞌbaꞌ, jalen yil chicꞌay quib sketz tetz kaꞌesclaw tan ẍchojleꞌn chitxꞌokꞌbeꞌn yi at sketz. Quiꞌc na ban ko iꞌtz tan paj tuꞌ jun tal lmuj suquij wutz yi quiꞌt na jal jamel cyaꞌn. ¡Ej nin ntin skacꞌayeꞌ yi cꞌolil yi ixiꞌn scyetz!” cxchijwok na ban.
7 Yi in wetz in Ryosil kꞌajtzun Jacow, nin ja wakꞌ kꞌej iꞌ, poro jaluꞌ xconk imbiꞌ tetz stiwil inyoleꞌj: “Axwok xonl Israel sbneꞌ opon tunintz quil tzꞌel te incꞌuꞌl yi eꞌchk takleꞌn cachiꞌ yi na iban.”
8 Ẍchucank yi txꞌotxꞌ tan ipaj, nin cxokꞌokwok icyakil cuꞌn. ¡Yi wutz txꞌotxꞌ niꞌcuꞌn sbneꞌ chi na ban yi tzanlaꞌ Nilo yi nter nin na mulkꞌin!
9 “Tul yi jun kꞌejaꞌtz yi at tulbil, chij yi wiꞌtz ajcaw yi kaRyosil, copon tewal tib yi kꞌej.
Chaj cuꞌn kꞌej cuꞌn tzꞌocpon tzꞌoꞌtz wuxtxꞌotxꞌ.
10 Ej nin yi eꞌchk ikꞌej tetz tzatziꞌn tzꞌocpon tetz bis oꞌkl.
Nin cyakil yi eꞌchk ibitz yi na oc lakak tzatziꞌn tzꞌocpon tetz bitz tetz mukuꞌn.
Xconk beꞌchok itaꞌn yi na ẍchaj yi na cxbisun, nin tzꞌelpon ijukul xiꞌil iwiꞌ tan ẍchajleꞌn bis.
Cxokꞌokwok chi na bajij oꞌkl teꞌj jun ẍutuj cyꞌajol yi na quim.
Chin okꞌbil nin sbneꞌ tircuꞌn yi sbajok tziteꞌj.
11 Nin tul yi jun tiempaꞌtz, chij yi wiꞌtz ajcaw yi kaRyosil, yil jal jun chin weꞌj wuxtxꞌotxꞌ, nkꞌeꞌtz jun weꞌj tan waj, nin nkꞌeꞌtz jun saktziꞌ tan paj yi quiꞌc aꞌ,
ma na iꞌtz jun weꞌj tan tbiteꞌn yi tajbil Kataj.
12 Tircuꞌn wunak nchiben beneꞌn tziꞌn tan joyleꞌn jun yil tal yi wajbil scyetz, bajk chixoꞌmbel yi amaꞌl yi at txoꞌl jun mar tu junt mar.
Nin nchiben jalen jeꞌn tziꞌn nin jalen cweꞌn tziꞌn, poro quil jal jun cyaꞌn yil tal yi wajbil scyetz.
13 Tircuꞌn yi eꞌ wunak ẍchiquimok tan saktziꞌ taneꞌn.
Nicyꞌt nin yi eꞌ xun scyuchꞌ yi eꞌ xicy yi chin cham nin eꞌ, ẍchitzajk len tan saktziꞌ taneꞌn.
14 Cyakil yi eꞌ yi na xcon biꞌ eꞌchk ryos cyaꞌn yi banij cuntuꞌ yi at Samaria tetz stiwil chiyol, ẍchitzajk cyeraꞌtz tetz ben kꞌej ben sak.
Na cyakil yi eꞌ yi na cyal: ‘Sak swutz karyosil yi at le tnum Dan,’ nin cyakil yi eꞌ yi na cyal: ‘Sak ẍchiwutz karyosil yi ateꞌ Beerseba,’ tircuꞌn yi eꞌaꞌtz ẍchitzajk cunin cyeraꞌtz waꞌn,” chij Kataj Ryos.