Yi tilol Amós chi tul wutzicyꞌ taneꞌn yi na tzan Kataj tan chinucꞌleꞌn jun cꞌoloj sacꞌ
7
1 Je yi xtxolbileꞌj yi ẍchaj yi wiꞌtz ajcaw yi kaRyosil swetz, chi tul wutzicyꞌ taneꞌn. I tzun bantz te yi nsken wiꞌt jeꞌ yi cosech yi na akꞌlij tetz yi rey nin te yi inak tzan jeꞌn muleꞌn yi caꞌp wek ujul nintzun wil yi na tzan Kataj tan chinucꞌleꞌn jun cꞌoloj sacꞌ, tan bajseꞌn yi ujulaꞌtz. 2 Ej, i tzun te yi txant tan teleꞌn cuꞌn swutz tircuꞌn eꞌchk ujul cyakꞌun yi jun cꞌoloj sacꞌaꞌtz, nintzun waltz:—¡Wajcaw, max cꞌuꞌluꞌ skibaj, cuyuꞌ kapaj! ¿Ẍeꞌn kaclax tkꞌab yi jun chin ilaꞌtz yi ja ul skawutz? Na yi oꞌ ketz yi oꞌ xonl kꞌajtzun Jacow coboxeꞌn tal kaxoneꞌn, nin quil tzꞌicyꞌpon yi jun ilaꞌtz kaꞌn.
3 Ej, taneweꞌn nin tzun ban Kataj tan takꞌleꞌn yi jun chin ilaꞌtz, tul inwutzicyꞌ, i tzun taltz:
—¡Yi xtxolbil yi mmawil quil bajij tziteꞌj! stzun Kataj bantz swetz.
Yi tilol Amós jun chin kꞌakꞌ chi tul wutzicyꞌ taneꞌn
4 Je junt xtxolbileꞌj yi ẍchaj yi wiꞌtz ajcaw yi kaRyosil swetz. I tzun bantz nin ben wilol jun chin kꞌakꞌ yi nternin na lamcan, yi ja xcyeꞌ tan skejseꞌn cuꞌn yi mar yi nim xeꞌ, nin yi ja xeꞌtij tan wiꞌtzeꞌn cuꞌn cyakil yi eꞌchk amaꞌl yi txaꞌx wutz. 5 I tzun waltz tetz Kataj:
—¡Max cꞌuꞌluꞌ Taꞌ, quiꞌt sbanuꞌ yi xtxolbilaꞌtz skeꞌj!
6 Taneweꞌn nin tzun ban Katajtz, i tzun taltz:
—¡Yi xtxolbil yi mmawil quil bajij tziteꞌj! stzun Kataj bantz swetz.
Yi tilol Amós jun plomaꞌ tetz alwanil chi tul wutzicyꞌ taneꞌn
7 Je junt xtxolbileꞌj yi ẍchaj Kataj swetz. I tzun bantz nin ben wilol Kataj Ryos yi choꞌn txiclij xlaj jun tapij nin cyꞌaꞌn jun plomaꞌ taꞌn le kꞌab. 8 I tzun saj jakoltz swetz:
—¿Mbi na awil tzaj le inkꞌab?
—Jun plomaꞌ tetz alwanil, chinch banintz tetz.
—Tan yi plomaꞌeꞌj nocpon tan maꞌleꞌn cyajtzaꞌkl yi eꞌ intanum, yi eꞌ aj Israel, tan tilweꞌn yi ko jicyuch teꞌj cyajtzaꞌkl, poro quiꞌt tzincuy chipaj junt tir. 9 Nin nocpon tan xiteꞌn eꞌchk kꞌajbil yi ja xcon cyakꞌun yi eꞌ ixonl, yi eꞌ xonl Isaac sajleꞌn tunintz. Jalt kꞌuchbeꞌn eꞌchk kꞌajbil scyajk cyentz. ¡Nin nocpon tan chibiyleꞌn cuꞌn cyakil yi eꞌ xonl yi ireyil Jeroboam! chij Kataj bantz swetz.
Yi tponeꞌn Amós tan yol tetz Amasías
10 I tzun bantz yi Amasías yi wiꞌtz paleꞌ cwent Betel nin tzun ben mantartz tan talcheꞌn yi xtxolbileꞌj tetz Jeroboam yi rey cwent Israel: “At jun yaj yi na biꞌaj Amós, yi na xon beneꞌn tziꞌn Israel, tan chimolcheꞌn wunak tan oyintziꞌ teꞌjuꞌ, nin yi eꞌ wunak quiꞌt na cyaj quibit yi jun xtxolbilaꞌtz. 11 Na je cunin xtxolbil na tzan tan xtxoleꞌneꞌj: ‘Copon biyij Jeroboam tan spar, nin tircuꞌn yi eꞌ wunak cwent Israel nchiben ticyꞌleꞌn pres le junt amaꞌl.’ Yaꞌstzun na tzan Amós tan xtxoleꞌn,” stzun Amasías bantz. 12 Ej nintzun oc kloꞌ Amasías tan lajeꞌn len Amós:
—¡Ẍkan len tzoneꞌj nachol! Ko na awaj tzatxꞌac awaꞌ tan tuꞌ xtxoleꞌn yi mbi sbajok tzantzaj, baꞌnt cuꞌn quiloꞌk le atanum Judá. 13 Qui na kaj yil cẍaꞌtij tzoneꞌj Betel, na iꞌtz yi amaꞌl kale na uleꞌt yi rey tan nachleꞌn Ryos, nin yi amaꞌleꞌj yaꞌstzun yi amaꞌl yi wiꞌnin xanil cwent tircuꞌn katanum.
14 —Yi in wetz nkꞌeꞌtz in jun elsanl stziꞌ Ryos yi pwok tuꞌ inwutz quen teꞌj. Nin nkꞌeꞌtz chusij chint tetz elsanl stziꞌ Ryos, na yi in wetz na jal jamel inwaꞌ waꞌn tan chichꞌuyseꞌn awun, nin tan yi wutz sicómoro yi na incꞌay. 15 Poro yi Kataj Ryos ja tal iꞌ swetz tan quiꞌt imbnol yi jun jilwutz akꞌunaꞌtz, nin ja tal iꞌ swetz: “Quiloꞌk tan xtxoleꞌn yi wajbil scyetz cyakil yi eꞌ intanum yi eꞌ aj Israel,” stzun iꞌ bantz swetz.
16 Chaꞌstzun te tbiteꞌuꞌ yi yol Kajcaw, na yi yol teruꞌ iꞌtz: “Quil tzawal tan biꞌ Ryos, je sbajok teꞌj Israel. Nchaꞌtz quil tzawal, je sbajok scyeꞌj yi eꞌ xonl Isaac.” 17 Poro tbiteꞌuꞌ yi yol Kajcaw: “Yi txkeluꞌ tzꞌocpon tetz jun wiꞌtz bnol tetz le tnum. Nin yi eꞌ nitxajiluꞌ ẍchiquimok tan spar tul oyintziꞌ. Nin tircuꞌn yi eꞌchk cojbiluꞌ sjatxlok ẍchikꞌab awer nak. Nin yi iluꞌ teruꞌ choꞌn squimokuꞌ le junt amaꞌl kale qui cyajskeꞌn wunak Kataj Ryos, nin tircuꞌn yi eꞌ aj Israel nchiben ticyꞌleꞌn pres joylaj tul junt tnum.”