Yi chixiteꞌn cunin yi eꞌ xonl Israel
6
1 ¡Lastum yi axwok bajxom cwent Judá yi choꞌn najlquix wi Sión, yi quiꞌc na ibislej, yi ntin eꞌchk tzatziꞌn na itxum! ¡Nin lastum yi axwok wiꞌtz ajcaw tetz Samaria yi qui na ixob tetz jun, na le wutz itetz itajtzaꞌkl yi ntin axwok chin tzꞌaknak cuꞌn itajtzaꞌkl tan takꞌleꞌn chitxumuꞌn wunak!2 Poro yi axwokaꞌtz ban cxbenwok le tnum Calne, nin le chumam tnum Hamat. Nchaꞌtz ban xcuꞌ cuꞌnwok le tnum Gat, yi chitanum yi eꞌ filistey tan tilweꞌn yi mbajij scyeꞌj. Wech chin cham nin eꞌ, poro ilenin ja chiloꞌon.
3 Lastum axwok yi qui na pujx itaꞌn yi at tulbil jun kꞌej yi cxelponwok cuꞌn swutz, ma na ntin na cxtzan tan banleꞌn eꞌchk takleꞌn yi ntin na tzan tan ipitleꞌn nin tul il.
4 Lastum axwok yi ntin ujleꞌn itaꞌn, tibaj eꞌchk ujbil yi marfil cuꞌn. Nin ntin eꞌchk tzatziꞌn tu eꞌchk lmak waꞌaꞌn na itxum, nin ntin bajseꞌn ẍchiꞌbel neꞌẍ tor tu ẍchiꞌbel neꞌẍ cneꞌr itaꞌn tulak eꞌchk tzatziꞌnaꞌtz.
5 Lastum axwok yi ntin na oc eꞌchk suꞌ itaꞌn yi quiꞌc xtxolbil yi kulil. Na le wutz itetz itajtzaꞌkl yi chumbalaj nin axwok tan banleꞌn maꞌcl tetz kbetz, nin yi axwok itetz na itocsaj itib chi ik jun balaj aj bnol bitz chi banak cyen yi kꞌajtzun rey Luwiy.
6 Lastum axwok, na na cxucꞌaꞌ win tul eꞌchk lmak copa, nin na xcon eꞌchk balaj perfum itaꞌn yi chin car nin. ¡Lastum yi qui na pujx itaꞌn yi tzajeꞌn tlen tuꞌ atit yi itanum!
7 Yi axwokaꞌtz ncxben ticyꞌleꞌn bajx tetz esclaw jakꞌ caꞌwl junt tnum, kalenaꞌs tzun tzaj yi eꞌchk ajtzaꞌklaꞌtz yi chin juntlen nin, na iban jaluꞌ.
8 “Ma jaluꞌ, yi in wetz, in iTaj Ryos yi cyaꞌl jun na xcyeꞌ sweꞌj, xconk yi imbiꞌ waꞌn yi chin xan nin, tetz stiwil inyoleꞌj:
‘Wiꞌnin na chiꞌch incꞌuꞌl te yi inimel yi axwok xonl Jacow. Nin qui na chimpekꞌ te eꞌchk balaj icaꞌl. Chaꞌstzun te swakꞌeꞌ amaꞌl scyetz yi icontr tan chicambal yi itnumil, tu cyakil yi at tul,’ ” chij Kataj.
9 Nin ko at lajuj wunak yi na cyew quib xe jun caꞌl, tircuꞌn yi lajujaꞌtz ẍchiquimok cyakꞌun yi contraꞌtz. 10 Chin xoꞌwbil nin sbneꞌ yi jun chin ilaꞌtz yi sbajok tziteꞌj, na ko at jun yil tzꞌoc tan telseneꞌl tzaj wankil jun xonl xe jun caꞌl, staleꞌ tetz junt xonl yi at-tz xe caꞌl cyen: “¿At peꞌ junt wunak tzoneꞌj?” Yi junaꞌtz staleꞌ: “Cyaꞌl at. Inchuc atin tzoneꞌj,” chij sbneꞌ-tz. Nin staleꞌ yi jun yi njilon bajx: “¡Baꞌnt cuꞌn quil cẍjilon, na ko tzun tzꞌel tzaj biꞌ Kataj le atziꞌ, nin ltzꞌult tan takꞌleꞌn mas kacaws!” 11 Na scawunk tzaj Kataj tan cawseꞌn eꞌchk najal yi quiw chiwutz, nin tan chicawseꞌn yi eꞌchk najal yi ajnak tzaj chiwalor. Chicyakil cuꞌn eꞌ, xituꞌn cuꞌn ẍchibneꞌ.
12 ¿Xcyek peꞌ jun chej tan jeꞌn poneꞌn swutz jun kotxꞌ? Quiꞌc rmeril. ¿Xcyek peꞌ jun tan chꞌoc wi mar? Quiꞌc rmeril. ¡Poro yi ax itetz ja xcyeꞌwok tan xtxꞌixpeꞌn eꞌchk balaj ley, tan toqueꞌn tetz ley yi niꞌcuꞌn tu wenen! Yi ley yi ja bnix sajleꞌn ja takꞌ tzatzin, poro yi ley yi at jaluꞌ ntin bis oꞌkl na takꞌ.
13 Nin yi axwok itetz na itocsaj itib nim tu itajtzaꞌkl, nin na ital: “Ja kaquiwix tan tuꞌ kachamil tu kajtzaꞌkl.”
14 Poro baꞌnt cuꞌn nink tzitbitwok yi yol yi Kajcaw yi kaRyosil yi cyaꞌl na xcyeꞌ quen teꞌj, na je na tal iꞌeꞌj: “Tzꞌul jun chin tnum waꞌn tan ixiteꞌn cuꞌn. Chocpon tan iyakꞌpeꞌn tul cyakil iꞌ-amaꞌl, yi at jalen jeꞌn tziꞌn tu cyakil iꞌ-amaꞌl yi at jalen cweꞌn tziꞌn.”