Yi chunaꞌn yi ban Amós tan paj yi txant tan chimukxeꞌn yi eꞌ aj Israel
5
1 Eꞌuꞌ aj Israel quibitzajuꞌ inyoleꞌj. Quibit tzajuꞌ yi na chin chunan tan paj yi ẍchiquimok chanuꞌ.2 Lastum eꞌuꞌ yi chumbalaj nin chitanumuꞌ, na chelpon cunuꞌ swutz. Chicopon trimpuꞌ tibaj chiluwaruꞌ, nin cyaꞌl jun tzꞌaꞌtok tan chixicylejeꞌnuꞌ.
3 “Ej, nin je inyoleꞌj yi in wetz yi in yi in Cawl itetz, yi iTaj yi iRyosil yi axwok aj Israel: Ko at jun tnum yi na ẍchak nin jun mil sanlar tan oyintziꞌ junteꞌn cient ẍchipakxok. Nin ko at junt tnum yi na ben jun cient sanlar taꞌn tan oyintziꞌ, lajuj teꞌn ẍchipakxok.”
4 Nchaꞌtz je junt yol Kataj Ryoseꞌj scyetz yi eꞌ aj Israel:
“Kol cxpakxij sweꞌj, nin ltziban taneꞌn inyol, qui tzun cxquimtz.
5 Quiꞌt cxbenwok junt tir le kꞌajbil Betel,a tan jakleꞌn ẍchꞌeybil itetz, nin quiꞌt cxbenwok junt tir le kꞌajbil Gilgal. Nin quiꞌt cxbenwok junt tir jalen Beerseba tan jakleꞌn ibanl. Na cyakil yi eꞌ aj Gilgal nchiben ticyꞌleꞌn pres le junt tnum. Nin jalt eꞌch kꞌuchbeꞌn caꞌl sjalok cyentz Betel,” stzun Kataj.
6 Quiꞌt bin chibenuꞌ tul eꞌchk amaꞌlaꞌtz, ma na chipakxokuꞌ teꞌj Kataj, nin chibneꞌuꞌ taneꞌn yi yol iꞌ. Qui tzun chiquimuꞌ-tz. Na ko quiꞌ, tzꞌul jun chin kꞌakꞌb tan Kataj scyeꞌjuꞌ nin quil jal jun le tnum Betel yil xcyeꞌ tan stzajseꞌn yi jun chin kꞌakꞌaꞌtz.
7 ¡Lastum eꞌuꞌ yi na chitzanuꞌ tan poꞌtzeꞌn yi balaj ley yi at ẍchiwutzuꞌ, na ntin bis oꞌkl na jal tan paj!
8 Yi jun yi bnol tetz eꞌchk txꞌuml tcyaꞌj, yi Pléyades tu Orión, nin yi na xcyeꞌ tan tocseꞌn yi tzꞌoꞌtz tetz tkan skil, nin yi jun yi na xcyeꞌ tan tocseꞌn yi tkan skil tetz akꞌbal, yi biꞌ yi junaꞌtz iꞌtz Kataj Ryos. Nin ntin cuꞌn iꞌ na xcyeꞌ tan xtxꞌixpeꞌn yi aꞌil yi mar tetz sbakꞌ tan toqueꞌn tetz aꞌbal wiꞌak cojbil.
9 Nchaꞌtz na xcyeꞌ iꞌ tan chixiteꞌn yi eꞌ yi chin cham nin eꞌ taneꞌn. Nchaꞌtz na xcyeꞌ iꞌ tan xiteꞌn alchok takleꞌn, chi taneꞌn yi eꞌchk caꞌl yi nim wutz tkan kale na chicolwit quib sanlar tan oyintziꞌ.
10 ¡Lastum yi eꞌuꞌ yi na chiꞌch chicꞌuꞌluꞌ scyeꞌj yi eꞌ balaj juez, nin yi chin chilab ninuꞌ chiwutz yi eꞌ balaj stiw yi na cyal yi bintzij!
11 Lastum yi eꞌuꞌ yi na chijakuꞌ nim alcawal scyeꞌj yi eꞌ wunak yi na cyaj chicꞌay quixiꞌn. Qui tzun ltakꞌ Ryos amaꞌl scyeruꞌ tan chinajeweꞌnuꞌ txeꞌ eꞌchk balaj caꞌl yi ja bnix cyanuꞌ, nin quil takꞌ amaꞌl scyeruꞌ tan chibajsaluꞌ yi taꞌal win te yi uva yi awij cyanuꞌ.
12 Na el intxum tetz cyakil itil yi qui nin bajsbeꞌn tetz, na na cxoꞌcwok tan xileꞌn cyeꞌj yi eꞌ balaj wunak, nin na itzꞌam xoꞌc. Nin qui na itakꞌ amaꞌl scyetz yi eꞌ prow meꞌbaꞌ tan chicambal yi cyetz cyajbil swutz yi pujbil xtisyaꞌ.
13 Nin na chiꞌch icꞌuꞌl scyeꞌj yi eꞌ yi at balaj cyajtzaꞌkl, chaꞌstzun te baꞌnt cuꞌn yi quil cyal cyetz jun yol tan makleꞌn iwutz, na chin xoꞌwbil nin yi eꞌchk takleꞌn yi na bajijtz.
14 Banwok bin taneꞌn yi eꞌchk takleꞌn balaj, quil tziban yi eꞌchk takleꞌn ploj, qui tzun xquimwoktz. Na kol tziban taneꞌn yi eꞌchk takleꞌn balaj, baꞌn tzun tzital: “Yi Kataj Ryos, yi cyaꞌl na xcyeꞌ quen teꞌj, yaꞌstzun yi jun yi na tzan tan kaqꞌuicyꞌleꞌn.”
15 ¡Labwok wutz yi eꞌchk takleꞌn ploj! ¡Nin lokꞌwok wutz yi eꞌchk balaj ajtzaꞌkl! Joywok puntil tan jaleꞌn balaj pujul xtisyaꞌ tzixoꞌl, yi baꞌn cyajtzaꞌkl. Ko yaꞌtz tziban, qui cunin batz tzꞌelpon kꞌajab yi Kataj Ryos yi cyaꞌl na xcyeꞌ quen teꞌj, tan quichꞌeyeꞌn yi eꞌ itanum yi ẍchiclaxok cyen.
16 Je yol Katajeꞌj, yi Ryos yi cyaꞌl na xcyeꞌ que teꞌj: “Wiꞌnin chunaꞌn sbajok lakak cꞌaybil, nin wiꞌnin bis sbajok lakak beꞌ. Nin tan paj yi jun cꞌoloj wunak yi ẍchiquimok, at eꞌ ẍchijakeꞌ pawor scyetz yi eꞌ prow wunak tan oꞌkl yil mukxij jun chixonl. Nin nchaꞌtz ẍchichojeꞌ yi eꞌ yi ntinaꞌtz cyakꞌun tan chunaꞌn.c
17 Yil nuꞌl tzaj tan chicawseꞌn, quiꞌt chitzatzin ma na ẍchokꞌok len wiꞌak chicojbil kale na cyaw wit uva.”d Yi xtxolbilaꞌtz iꞌtz yol Kataj Ryos.
Yi tal Amós yi quiꞌc na takꞌ yi eꞌchk takleꞌn kale kꞌukleꞌt chicꞌuꞌl yi eꞌ xonl Israel
18 ¡Lastum yi eꞌ yi nternin na el cyalmaꞌ tan tuleꞌn chan yi kꞌejlal yil tzꞌul tzaj Kajcaw! ¿Qui peꞌ na el chitxumuꞌ tetz yi mbi sbajok te yi jun tiempaꞌtz? Yi jun kꞌejlalaꞌtz chin tzꞌoꞌtz nin tunin sbneꞌ, na quiꞌc tkan skil sjalok.
19 Quiꞌc rmeril yi nink clax jun, na niꞌcuꞌn sbneꞌ yi tiempaꞌtz chi nink tzꞌel ojkuj jun swutz jun león, nin lnojpon tkꞌab jun oso. Nin yil tew quen tib xe jun caꞌl, nin yil kejbaj quen tib swutz xan tan ujleꞌn, taꞌsteꞌn nin tzꞌeltzit jun luꞌbaj tan biyleꞌn cuꞌn.
20 Jun cuꞌn yol chin xoꞌwbil nin sbneꞌ yil tzꞌul tzaj Kajcaw tan takꞌleꞌn chicaws yi eꞌ tetz contr. Chin tzꞌoꞌtz nin sbneꞌ. Chin tcꞌuꞌl nin sbneꞌ tircuꞌn.
21 “Wiꞌnin na chiꞌch incꞌuꞌl te yi eꞌchk tzatziꞌn yi na icyꞌ itaꞌn tan takꞌleꞌn inkꞌej taneꞌn. Chin junt len nin tzinwutz. Na icyꞌ impaj te yi eꞌchk moloꞌn ib yi na iban tan takꞌleꞌn inkꞌej taneꞌn.
22 Qui na waj yi eꞌchk oy yi na ipat tan takꞌleꞌn inkꞌej. Nchaꞌtz yi eꞌchk oy yi ixiꞌn cuꞌn, quiꞌt na waj. Nin quiꞌt na waj yi wacẍ yi nternin kꞌant yi na itoy swetz tan ẍchajleꞌn yi at tzatzin paz skaxoꞌl tzituchꞌ taneꞌn.
23 ¡Quiꞌt na waj lwit nin yi eꞌchk ibitz yi na itakꞌ swetz! ¡Quiꞌt na waj lwit nin wiꞌ yi eꞌchk imaꞌcl tetz bitz!
24 Yi mero wetz wajbil iꞌtz yi puntil cuꞌn chiban yi eꞌ pujul xtisyaꞌ yi chimunl. Nin yi nink jal jun itajtzaꞌkl itaꞌn yi jicyuch teꞌj, choꞌnk sban yi ajtzaꞌklaꞌtz tzixoꞌl chi na ban jun aꞌ yi nternin na mulkꞌin.
25 ”Axwok jun cꞌoloj xonl Israel, te yi caꞌwunak yob yi ncxaꞌtij le amaꞌl yi tzꞌinunin tuꞌ, qui tajweꞌn mban tan itkꞌol eꞌchk itxꞌixwatz tu eꞌchk itoy swetz tan ẍchajleꞌn yi choꞌn kꞌuklij icꞌuꞌl sweꞌj, na yi ax itetz choꞌn nin ajlij iteri cꞌuꞌl sweꞌj. 26 Poro yi jaluꞌ, tan paj yi ja cxoꞌcwok tan naꞌwseꞌn yi teblal yi iryosil Sicut, yi ireyil taneꞌn, tu yi teblal yi iryosil Quiyún, yi iꞌtz jun txꞌuml, tajweꞌn tzun tan beneꞌn itekal yi teblal yi eꞌchk iryosilaꞌtz yil cxben ticyꞌleꞌn pres joylaj. 27 Na nocpon tan ilajeꞌn len joylaj, jalaj cyꞌen yi tnum Damasco.”e Yi xtxolbilaꞌtz iꞌtz yol Kataj Ryos, yi jun yi na biꞌaj: “Yi Ryos yi cyaꞌl na xcyeꞌ quen teꞌj.”