Amós 4

1 Bitwok tzaj yi yol Katajeꞌj yi axwok xnaꞌn yi at ikꞌej yi najlquix Samaria: “Niꞌcuꞌn axwok scyuchꞌ yi eꞌ wacẍ yi chin kꞌant nin eꞌ yi choꞌn na chijal le amaꞌl cwent Basán. Na ntin chibuchleꞌn yi eꞌ prow wunak itaꞌn, nin nchaꞌtz na cxoꞌc tan telseꞌn chikꞌej yi eꞌ yi na chopon tan jakleꞌn jun pawor tzitetz, nin na cxoꞌc tan chicaweꞌn ichmil tan chilokꞌol win tetz itetz.

2 Jun cuꞌn xconk yi imbiꞌ waꞌn yi chin xan nin, tetz stiwil inyol, yi nelpon cuꞌn teꞌj yi xtxolbileꞌj,” chij Kataj Ryos yi Cawl ketz. “Tzꞌul chan jun kꞌej yi copon caren tikul nin cxelpon kinij scyuchꞌ ital. 3 Nin cxeluꞌl txoꞌlak eꞌchk tapij yi cuꞌnak kꞌuch. Itxoliꞌn len itib yil cxeꞌl tzaj, nin tzꞌicyꞌpon akꞌbal itaꞌn xoꞌl tzaꞌl cwent yi wutz Hermón.” Yi xtxolbilaꞌtz iꞌtz yol Kataj Ryos yi jun cuꞌn tzꞌelpon cuꞌn teꞌj.

Yi tlol Amós yi qui na ocpon yi caꞌwl Ryos teꞌj chiwiꞌ yi eꞌ xonl Israel

4 “Baꞌn cxben le kꞌajbil Betel ko yaꞌtz itajbil, nin baꞌn cxben le kꞌajbil Gilgal. Baꞌn bin cxoꞌcwok il tan juchleꞌn itil. Baꞌn tzicyꞌaj nin eꞌchk itxꞌixwatz cyakil jalchan, nin baꞌn tzitakꞌ idiesum ox ox kꞌejiꞌn, ko yaꞌtz itajbil.

5 Nin baꞌn tzitoy pam yi quiꞌc xtxꞌamil tan tyoẍiꞌn, nin baꞌn cxoꞌcwok tan jalseꞌn ikꞌej te yi nicyꞌnaꞌ ofrent na itakꞌ, na tircuꞌn yi eꞌchk xtxolbilaꞌtz yaꞌstzun yi chumbalaj nin tziwutz itetz,” stzun Kataj Ryos.

Yi eꞌ xonl Israel na chicawsij poro qui nin na chibnix

6 “Ja cuꞌ weꞌj waꞌn tzixoꞌl, nin quiꞌc nin jun takleꞌn njal itaꞌn tan iwaneꞌn teꞌj. ¡Poro lastum yi ax itetz qui nin nnuꞌl txꞌakx ticꞌuꞌl!” stzun Kataj Ryos.

7 “Nchaꞌtz qui nin ncuꞌ aꞌbal waꞌn wiꞌak icojbil, na te ntaxk jeꞌ yi cosech qui nin ncuꞌ jun tzꞌujeꞌ aꞌbal waꞌn tetz ox xaw. At loꞌ jun amaꞌl kale ncweꞌt aꞌbal waꞌn, nin junt, kale qui ncweꞌt. Tircuꞌn yi txꞌotxꞌ ja aj pax tan yi skejeꞌn.

8 Tircuꞌn axwok ja cxben lakak tnum tan joyleꞌn itcꞌaꞌ, poro pen tuꞌ na jal muꞌẍ tal, nin qui nin mmicyꞌ saktziꞌ tziteꞌj taꞌn, ¡poro lastum yi ax itetz qui nin nnuꞌl txꞌakx ticꞌuꞌl!” stzun Kataj Ryos.

9 “Ja loꞌon itujul waꞌn tan yablil, nin ja skej, na wiꞌnin tzꞌaꞌ mban. Nchaꞌtz eꞌch wiꞌ loꞌbaj tu eꞌch wutz uva ja skej tircuꞌn. Tircuꞌn yi eꞌchk wiꞌ ibẍ tu eꞌchk wiꞌ oliw ja baj len xak tu yi eꞌchk wutz tan sacꞌ. Ja opon yi eꞌchk takleꞌnaꞌtz waꞌn tziwutz, poro lastum yi ax itetz qui nin nnuꞌl txꞌakx ticꞌuꞌl,” stzun Kataj Ryos.

10 “Ja opon jun chin wutzileꞌn yaꞌbil waꞌn tzixoꞌl chi yi yaꞌbil yi opon waꞌn squibaj yi eꞌ aj Egipto tentz. Ja wakꞌ amaꞌl tan chiquimeꞌn yi eꞌ xicy tul oyintziꞌ nin ja wakꞌ amaꞌl tan chicambal yi chicontr yi chichej. Ja icyꞌpon yi xeweꞌnil yi eꞌ almaꞌaꞌtz. Poro lastum yi ax itetz qui nin nnuꞌl txꞌakx ticꞌuꞌl,” chij Kataj Ryos.

11 “Ja xcuꞌ inxitul tan jun chin il, chi yi jun chin il yi opon waꞌn squibaj yi eꞌ aj Sodoma tu Gomorra tentz. Pentuꞌ nchiclax cobox tzixoꞌl chi jun piẍ tzeꞌ yi na tzan kꞌaꞌkl yi na el tzaj kinij tkꞌakꞌ tan qui stzꞌeꞌeꞌn cunin. Poro lastum yi ax itetz qui nin nnuꞌl txꞌakx ticꞌuꞌl,” stzun Kataj Ryos.

12 “Chaꞌstzun te axwok aj Israel ẍchꞌiwok bajx, na iteꞌn nin xtxolbilaꞌtz tzimbneꞌ tziteꞌj. Banwok bin list itib na nocopon tan icawseꞌn, na in iRyosil.”

Yi Ryos yi na xcyeꞌ tan nucꞌleꞌn eꞌchk takleꞌn

13 Ryos, iꞌ bnol tetz eꞌchk juꞌwtz, nin iꞌ txumul tetz yi kaxew yi oꞌ wunak. Nin iꞌ na chajon sketz yi eꞌchk takleꞌn yi sbneꞌ tzantzaj. Nin iꞌ yi Ryos yi na xcyeꞌ tan jalseꞌn skil nin tan tocseꞌn tzꞌoꞌtz, na iꞌ yi jun yi na cawun tibaj cyakil. Nin yi tetz biꞌ iꞌtz Kataj Ryos, yi cyaꞌl na xcyeꞌ quen teꞌj.