Yi munl jun elsanl stziꞌ Ryos yi tajweꞌn cuꞌn tan bnol taneꞌn
3
1 Chaꞌstzun te axwok jun cꞌoloj xonl Israel, bitwok tzaj yi yoleꞌj, yi yol Kataj Ryos, yi jun yi ocnak tan cyelseneꞌl tzaj yi eꞌ imam iteꞌ le tnum Egipto:2 “Ntin cuꞌn axwok txaꞌijt quix waꞌn ẍchixoꞌl cyakil yi eꞌ wunak yi ateꞌ beneꞌn tziꞌn. Chaꞌstzun te tajweꞌn cunin tzitakꞌ part swetz te tircuꞌn yi eꞌchk takleꞌn yi chin junt len nin yi na cxtzanwok tan banleꞌn.”a
3 Ma jaluꞌ, ko at cob yi chicyꞌaꞌn cyen tuꞌ quib, na elepont yi junit taneꞌn chitxumuꞌn.
4 Nin ko na ẍchꞌin jun león xoꞌl txꞌacꞌaben, na elepont yi ja cambaj jun txuc tetz waꞌ. Nin ko na narneꞌ jun tal neꞌẍ león tul julil iꞌtz tan paj yi ja cambaj waꞌ.
5 Ej nin ko na opon trimpuj jun tal chꞌuꞌl wuxtxꞌotxꞌ, iꞌtz tan paj yi ja cuꞌ jun tramp swutz. Ej nin ko na jeꞌ tzꞌajpuj jun paꞌtx, iꞌtz tan paj yi at jun txuc yi ja txꞌamxij taꞌn.
6 Ej nin yi na ẍchꞌin jun chun tnum, tircuꞌn yi eꞌ wunak na cheꞌl yab teꞌj, nin na chijak yi mbi na bajij. Nin ko at jun takleꞌn mbajij le tnum yi chin xoꞌwbil nin, iꞌtz Kataj Ryos mmakꞌon tzajtz.
7 Qui na ban Kataj Ryos jun takleꞌn scyeꞌj wunak ewun cuntuꞌ, ma na bajx na tal scyetz yi eꞌ elsanl stziꞌ iꞌ tan chitxolil yi tetz tajbil scyetz cyakil wunak.
8 ¿At ptzun jun yi quil xob yil tbit nin yil ẍchꞌin jun chin león? Quiꞌc. ¿Nin at ptzun jun elsanl stziꞌ Ryos yi quil tzꞌoc tan xtxoleꞌn yi tajbil Kataj Ryos, yi Cawl ketz, ko ja cawun iꞌ teꞌj tan xtxolil? Quiꞌc jun.
Yi xtxolil Amós yi tzꞌul chan chicaws yi eꞌ aj Israel
9 Ma jaluꞌ, nimit chiwiꞌuꞌ tan xtxoleꞌn yi xtxolbileꞌj tulak eꞌchk palaciob yi at le tnum Asdod, nin yi at cwent Egipto: “Baꞌn yi nink chibenuꞌ wiꞌak eꞌchk juꞌwtz cwent Samaria tan tilweꞌn yi eꞌchk yab ajtzaꞌkl yi chin juntlen nin yi na chixom yi eꞌ aj Israel teꞌj, nin yi ẍeꞌn cuꞌn buchijcheꞌ yi eꞌ tal prow wunak cyaꞌn.”
10 Jun cuꞌn yol na tal Kataj: “Yi eꞌ cyetz qui na pujx banleꞌn eꞌchk takleꞌn balaj cyaꞌn, na colij yi eꞌchk takleꞌn xe chicaꞌl yi puers nchiban tan majleꞌn len scyeꞌj yi eꞌ prow wunak.”
11 Chaꞌstzun te na tal Kataj Ryos yi Cawl ketz yi xtxolbileꞌj: “At cyulbil jun cꞌoloj chicontr yi chocpon solteꞌj yi chiꞌamaꞌl. Chocpon tan xiteꞌn cuꞌn yi eꞌchk caꞌl yi nim wutz tkan kale na chicolwit quib yi eꞌ sanlar yi ateꞌ tan colcheꞌn yi eꞌchk tnum, nin chocpon tan telseꞌn len tircuꞌn yi eꞌchk takleꞌn balaj yil nojquen ẍchiwutz, yi at lakak chicaꞌl yi eꞌ lmak wunak.”
12 Ej nin je na tal Kataj Ryoseꞌj: “Quib yi na ban jun pstor awun, yi pentlen tuꞌ na jal cyen yi pacꞌ, nka yi juꞌ ẍchin jun awun taꞌn tkꞌab jun león, yaꞌstzun sbajok scyeꞌj yi eꞌ yi najlcheꞌ Samaria, jalt piẍaꞌl chitakleꞌn scyajk cyen.”c
13 Jun cuꞌn yol na tal Kataj Ryos, yi cyaꞌl jun na xcyeꞌ quen teꞌj: “Bitwok tzaj nin baꞌn cxoꞌc tan makleꞌn chiwutz yi eꞌ xonl kꞌajtzun Jacow tan quiꞌt chijuchul quil.
14 Na tzꞌul jun kꞌejlal yil noꞌc tan jakleꞌn scyetz yi mbi cuꞌn mbaj chibnol. Nocpon tzuntz tan xiteꞌn cuꞌn yi kꞌajbil yi at Betel, nin tzꞌelpon cꞌapluꞌn yi eꞌchk tucꞌd yi at teꞌjak yi patbil chitxꞌixwatz, nin scyajk tuꞌ cꞌoxij yi eꞌchk tucꞌaꞌtz wuxtxꞌotxꞌ.
15 Copon inxitul yi eꞌchk chicaꞌl yi na xcon cyaꞌn tul tiemp kꞌalaj, nin copon inxitul yi chicaꞌl yi na xcon cyaꞌn tul tiemp cheꞌw. Nchaꞌtz copon inxitul yi eꞌchk chicaꞌl yi marfile cuꞌn at tetz yubel, nin xitok yi eꞌchk chipalacio waꞌn.” Jun cuꞌn sbajok yi xtxolbileꞌj na iꞌtz yol Kataj.