2
1 Nin je junt yol Katajeꞌj: “Yi eꞌ aj Moab ja chijuchlen quil tzinwutz yi chin juntlen nin, chaꞌstzun te ilenin ẍcheꞌ incawseꞌ. Na nin eꞌ oc tan pateꞌn cuꞌn yi bakil yi kꞌajtzun rey cwent Edom, wech na nsken wiꞌt mukxij, poro jalt stzaꞌjil cyaj cyentz cyaꞌn.2 Chaꞌstzun te tzꞌocpon kꞌaꞌkl tircuꞌn yi chicaꞌl yi eꞌ wiꞌtz ajcaw yi at le tnum Moab, nin iteꞌn nin yi kꞌakꞌaꞌtz xcyek tan xiteꞌn cuꞌn eꞌchk caꞌl yi nim wutz tkan kale na chicolwit quib yi eꞌ sanlar tan oyintziꞌ le chumam chitnumil Queriot. Na sjalok jun chin wutzileꞌn oyintziꞌ nin wiꞌnin ẍchiẍchꞌink yi eꞌ sanlar nin copon eꞌchk chun yil choꞌc nil tan chibiyleꞌn cuꞌn yi eꞌ aj Moab.
3 ¡Copon imbiyol yi rey scyuchꞌ cyakil yi eꞌ wiꞌtz ajcaw!” Yi xtxolbilaꞌtz jun cuꞌn sbajok na iꞌtz yol Kataj Ryos.
4 Ej, nin je yol Katajeꞌj: “Yi eꞌ aj Judá ja chijuchlen quil tzinwutz yi chin junt len nin, chaꞌstzun te ilenin ẍcheꞌ incawseꞌ. Na quiꞌc xac inchusuꞌn ban ẍchiwutz nin qui nin eꞌ oc cꞌulutxum jakꞌ incaꞌwl. Ma na nin eꞌ oc tan cꞌuꞌlajeꞌn yi chiryosil yi chitaj chitxuꞌ yi banij cuntuꞌ taneꞌn.a
5 Chaꞌstzun te tzꞌocpon kꞌaꞌkl tircuꞌn yi amaꞌl waꞌn cwent Judá, nin iteꞌn nin yi kꞌakꞌaꞌtz xcyek tan xiteꞌn cuꞌn yi eꞌchk balaj chicaꞌl yi eꞌ rey scyuchꞌ yi eꞌ wiꞌtz ajcaw cwent Jerusalén.”
Yi chicaws yi eꞌ xonl Israel
6 Ej, nin je yol Katajeꞌj: “Yi axwok xonl Israel ja ijuchlen wiꞌnin itil tzinwutz yi chin junt len nin, chaꞌstzun te ilenin xincawseꞌ. Na ja cxoꞌcwok tan chicꞌayeꞌn yi eꞌ yi quiꞌc jun takleꞌn ploj nchiban, tan tuꞌ yi qui nin nchixcyeꞌ tan ẍchojleꞌn yi muꞌẍ tal chitxꞌokꞌbeꞌn tzitetz. Na ja ben icꞌayil yi eꞌ tal prow meꞌbaꞌ tan icambal tuꞌ jamel jun lmuj suquij wutz yi qui nin nchixcyeꞌ yi eꞌ tal meꞌbaꞌaꞌtz tan ẍchojleꞌn tzitetz.
7 Nin na cxoꞌcwok tan xileꞌn cyeꞌj nin tan chibuchleꞌn yi eꞌ meꞌbaꞌ txil. Ej nin at axwok tu icyꞌajl yi iteꞌn nin xun na iwitbej itib tuchꞌ. Nin tan yi jun ajtzaꞌklaꞌtz na el kꞌej imbiꞌ itaꞌn yi wiꞌnin xanil.
8 Nchaꞌtz na cxbenak tulak eꞌchk tyoẍil iryosil, nin na cxcoyeꞌ cuꞌn tibaj eꞌchk beꞌchok yi at cyen tikꞌab, yi iꞌtz prentil tuꞌ xtxꞌokꞌbeꞌn jun tal prow wunak. Ej nin na ilokꞌ xcꞌalaꞌ tan eꞌchk mult yi quiꞌc xeꞌ yi na icambaj scyeꞌj tal prow wunak, nin na bajtz itaꞌn lakak waꞌaꞌn tan takꞌleꞌn kꞌej eꞌchk iryosil.
9 Wech in noꞌcnak tan chibiyleꞌn cuꞌn yi eꞌ amorreo ẍchiwutz yi eꞌ imam iteꞌ, nin ja cheꞌl cuꞌn tircuꞌn waꞌn swutz, yi eꞌaꞌtz yi chin wutz quikan nin, yi chin cham nin eꞌ chi taneꞌn jun wiꞌ bakch yi nim benak taꞌkl ttxꞌotxꞌ.
10 Nchaꞌtz in eꞌ elsan tzaj yi eꞌ imam iteꞌ jakꞌ chicaꞌwl yi eꞌ aj Egipto, nin ja noꞌc tan chiqꞌuicyꞌleꞌn tetz caꞌwunak yob tul yi amaꞌl tzꞌinunin tuꞌ, jalen yi jeꞌn poneꞌn yi tiempil tan wakꞌol yi chiꞌamaꞌl yi eꞌ amorreo-aꞌtz scyetz.
11 Axwok jun cꞌoloj xonl Israel, quiꞌt peꞌ na ul txꞌakx ticꞌuꞌl yi xtxolbileꞌj, yi ja chibixeꞌ cobox icyꞌajl waꞌn tan chixconeꞌn tetz elsanl intziꞌ. Nin nchaꞌtz ja chibixeꞌ coboxt waꞌn tan chixconeꞌn tetz nazareo.”b Yi xtxolbilaꞌtz iꞌtz yol Kataj Ryos.
12 “Poro yi ax itetz, ja cxoꞌcwok tan banleꞌn puers scyetz yi eꞌ nazareo tan bajeꞌn win cyaꞌn, nka tan bajeꞌn xcꞌalaꞌ cyaꞌn. Nin qui nin mmitakꞌ amaꞌl scyetz yi eꞌ elsanl intziꞌ tan chitxolil yi wetz wajbil tzitetz.
13 Ma jaluꞌ bin, nocpon tan iyakꞌpeꞌn cunin chi na xcyeꞌ jun careꞌt yi nojnak cuꞌn tan ixiꞌn tan puchꞌleꞌn cuꞌn eꞌchk cꞌub kale na icyꞌ cuꞌnt.
14 Quiꞌc na ban kol cxeꞌlwok ojkuj, na quil clax jun tzitetz. Yi eꞌ yi chin cham nin eꞌ, quiꞌct chiwalor sbneꞌ. Nin quil chiclax yi eꞌ yi qui na chixob tetz jun.
15 Yi eꞌ aj cꞌoxonl flech, chelpon ojkuj poro quil chiclax. Nchaꞌtz yi eꞌ yi naꞌwnakeꞌt tan ojkeꞌl quil chiclax, scyuchꞌ yi eꞌ yil cheꞌl ojkuj teꞌj chej quil chiclax.
16 Yil tzꞌul yi jun kꞌejlalaꞌtz chelpon ojk yi eꞌ sanlar tan coloꞌn ib, nicyꞌt nin yi eꞌ yi chin cham nin eꞌ tzꞌelpon cyen chicꞌoxol yi eꞌchk chimaꞌcl, tan biꞌl coloꞌn ib.” Yi xtxolbilaꞌtz jun cuꞌn sbajok na iꞌtz yol Kataj Ryos.