AMÓS
Yi chicaws yi eꞌchk tnum yi ateꞌ nakaꞌjil Israel
1
1 I bin jaluꞌ, je yi xtxolbileꞌj yi cyajnak cyen tlol Kataj Ryos tetz Amós, jun pstor awun yi choꞌn najlij le tal neꞌẍ aldey Tecoa, cwent Judá. Ej nin iꞌtz yi mbi cuꞌn sbajok te yi tnum Israel. Yi stziblaleꞌj ja tbit Amós tetz Ryos cob yob te ntaxk icyꞌ yi coblaj nob, yi at tzaj yi rey Uzíasa tan cawuꞌn cwent Judá, nin te iteꞌn nin tiempaꞌtz yi na cawun tzaj yi rey Jeroboamb yi cyꞌajl Joás cwent Israel. Yi Ryos yi na xcyeꞌ tan xiteꞌn yi eꞌchk takleꞌn
2 Je yi stziblaleꞌj: Yi na ẍchꞌin tzaj Kataj Ryos wi yi juꞌwtz Sión yi at Jerusalén,c niꞌcuꞌn na ban wiꞌ iꞌ tu jun kꞌancyok yi na cuꞌ. Na skꞌej cyakil chiwaꞌ yi awun, nin nchaꞌtz yi eꞌchk luwar yi at wi juꞌwtz Carmelo yi chin txaꞌx nin, na skej taꞌn.
3 Je yol Katajeꞌj: “Yi eꞌ aj Damascod ja chijuchlen quil tzinwutz yi chin junt len nin. Chaꞌstzun te ilen nin ẍcheꞌ incawseꞌ, na niꞌcuꞌntz chi puchꞌij cunink ncyulej yi eꞌ aj Galaad tan eꞌchk chimaꞌcl yi chꞌichꞌ cuꞌn yi na xcon tan bujleꞌn triw.
4 Chaꞌstzun te tzꞌocpon intꞌinol kꞌaꞌkle te balaj caꞌl yi rey Hazael, nin iteꞌn nin kꞌakꞌaꞌtz stzꞌeꞌsank yi eꞌchk caꞌl yi nim wutz tkan cwent yi rey Ben-hadad, yi na xcon tan chicolol quib ẍchikꞌab chicontr.
5 Kopon inkꞌuchil yi eꞌchk puertil yi tnum Damasco, nin squimok yi jun waꞌn yi na cawun cwent Bicat-avén, nchaꞌtz yi jun yi na cawun cwent Bet-edén. Ma yi eꞌ aj Asiria nchiben ticyꞌleꞌn pres le tnum Quir.” Yi xtxolbilaꞌtz iꞌtz yol Kataj Ryos.
6 Je yol Katajeꞌj: “Yi eꞌ aj Gaza ja chijuchlen quil tzinwutz yi chin junt len nin, chaꞌstzun te ilen nin ẍcheꞌ incawseꞌ. Na tircunin wunakil jun tnum ja ben quicyꞌal pres cyakꞌun tan chicꞌayeꞌn scyetz yi eꞌ aj Edom tetz chi-esclaw.
7 Chaꞌstzun te tzꞌocpon kꞌaꞌkl tircuꞌn eꞌchk tapij waꞌn yi at solteꞌj yi tnum Gaza, nin iteꞌn nin yi kꞌakꞌaꞌtz xcyek tan xiteꞌn cuꞌn eꞌchk balaj chicaꞌl yi eꞌ wiꞌtz ajcaw.
8 Nchaꞌtz tzꞌelpon cuꞌn swutz waꞌn yi jun yi na cawun Asdod, tu yi jun yi na cawun Ascalón. ¡Cyakil yi inchamil xconk waꞌn tan oyintziꞌ scyeꞌj yi eꞌ aj Ecrón, nin quiꞌc nin jun filistey tzꞌelpon liwr swutz yi quimichil!” Yi xtxolbilaꞌtz iꞌtz yol Kataj Ryos.
9 Ej nin je yol Katajeꞌj: “Yi eꞌ aj Tiro ja chijuchlen quil tzinwutz yi chin junt len nin, chaꞌstzun te ilen nin ẍcheꞌ incawseꞌ. Na tircunin wunakil jun tnum ja ben cyaꞌn pres jakꞌ chicaꞌwl yi eꞌ aj Edom, wech na bixbaꞌnt jun trat cyaꞌn scyuchꞌ, poro ja chiben cyaꞌn pres jakꞌ chicaꞌwl junt txꞌakajt.
10 Chaꞌstzun te tzꞌocpon kꞌaꞌkl tircuꞌn eꞌchk tapij waꞌn yi at solteꞌj yi tnum Tiro, nin iteꞌn nin yi kꞌakꞌaꞌtz xcyek tan xiteꞌn cuꞌn eꞌchk balaj chicaꞌl yi eꞌ wiꞌtz ajcaw.”
11 Je yol Katajeꞌj: “Yi eꞌ aj Edom ja chijuchlen quil tzinwutz yi chin junt len nin. Chaꞌstzun te ilenin ẍcheꞌ incawseꞌ tan paj yi qui nin meꞌl chikꞌajab scyeꞌj yi eꞌ xonl Israel yi cyoqueꞌn tan chibiyleꞌn cuꞌn tan spar, wech na junit chimam chiteꞌ.f Qui nin cutzaj chitxumuꞌn ma na wiꞌnin chiꞌcheꞌn chicꞌuꞌl bantz scyeꞌj yi eꞌ chixonlaꞌtz, nin yi ẍchiꞌchbeꞌn chicꞌuꞌlaꞌtz chin xoꞌwbil nin ban, na quiꞌc nin makbil tetz.
12 Chaꞌstzun te tzꞌocpon kꞌaꞌkl tircuꞌn yi amaꞌl waꞌn yi at cwent yi tnum Temán, nin iteꞌn nin yi kꞌakꞌaꞌtz xcyek tan xiteꞌn cuꞌn eꞌchk chicaꞌl yi eꞌ wiꞌtz bajxom le chitnumil Bosra.”
13 Nchaꞌtz, je yol Katajeꞌj: “Yi eꞌ aj Amón ja chijuchlen quil tzinwutz yi chin junt len nin, chaꞌstzun te quil tzꞌicyꞌ impaj tan takꞌleꞌn chicaws. Na tan tuꞌ ẍchꞌuyseꞌn tuꞌ yi amaꞌlil yi chitanum, ja choꞌc tan majleꞌn eꞌchk amaꞌl cwent Galaad nin nicyꞌt nin yi eꞌ chꞌon wiꞌ ja jakxij chicꞌuꞌl cyaꞌn tan spar.
14 Chaꞌstzun te tzꞌocpon kꞌaꞌkl tircuꞌn eꞌchk tapij waꞌn yi at solteꞌj yi tnum Rabá, nin iteꞌn nin yi kꞌakꞌaꞌtz xcyek tan xiteꞌn cuꞌn eꞌchk balaj chicaꞌl yi eꞌ wiꞌtz ajcaw. Sjalok jun chin wutzileꞌn oyintziꞌ nin wiꞌnin ẍchiẍchꞌink yi eꞌ sanlar yil choꞌc nil tan xiteꞌn cuꞌn yi tnum chi na ban jun chin salchcam.
15 Chelpon lajuꞌn chireyil scyuchꞌ eꞌchk chibajxom tul yi cyetz chitanum.”