Amós i

AMÓS

Txꞌolbil Xoꞌl Yi Liwreꞌj

Yi Amós choꞌn titzꞌeꞌn le jun tal neꞌẍ aldey cwent Judá yi na biꞌaj Tecoa. Yi takꞌun iꞌ iꞌtz tan chichꞌuyseꞌn awun, poro ja xcon iꞌ tan Kataj tetz elsanl stziꞌ ẍchixoꞌl yi eꞌ aj Israel. Nin tul yi tiempaꞌtz, yi eꞌ aj Israel, iꞌtz jun chin lmak tnum yi at kꞌej, poro ntin eꞌchk yab ajtzaꞌkl at-tz ẍchixoꞌl, na qui na chixom te yi caꞌwl Kataj. Ja chiban chimunl swutz Ryos taneꞌn, poro yujuꞌn tib tu chicstumbr yi eꞌ awer nak, nin ntin subul nakiꞌn cyakꞌun. Yi eꞌ ric wiꞌnin jaleꞌn chimeꞌbiꞌl tan tuꞌ yi na choꞌc tan chisubleꞌn wunak, ma yi eꞌ sloj wunak ntin meꞌbaꞌil ateꞌ cuꞌnt.

Yi Weklil Yi Liwreꞌj

Yi bajx wekl (Cap. 1:1–2:5) na ẍchaj yi mbi sbajok scyeꞌj yi eꞌchk tnum yi ateꞌ nakaꞌjil Israel.

Yi caꞌp wekl (Cap. 2:6–6:14) na ẍchaj cobox xtxolbil tetz Amós chi tul wutzicyꞌ taneꞌn.

Yi toxeꞌn wekl (Cap. 7–9) na ẍchaj yi banl talmaꞌ Ryos tu yi tetz derech yi at tan chicawseꞌn yi eꞌ nación. Nin wiꞌtzbil tlen na lajluchax skawutz yi mero xeꞌ yi chusuꞌn, iꞌtz, yi tzantzaj chocopon yi eꞌ xonl Israel yi ẍchiclaxok cyen tetz jun balaj nación yi quiꞌc bis oꞌkl sbajok tul.