Yil tzꞌoc Ryos tan chicawseꞌn cyakil nación
3
1 Je sbajok yil tzꞌucuꞌl yi jun tiempaꞌtz, chij Kajcaw: “Sjalok junt tir chibanl yi eꞌ aj Judá wakꞌun, tu yi tnum Jerusalén.2 Ej nin chicupon injutzꞌil cyakil nación le yi amaꞌl cwent Israel, le jun jocoꞌj yi na biꞌaj Josafat. Nin choꞌn nocopontz tan xtisyaꞌiꞌn scyeꞌj tan takꞌleꞌn chicaws, tan paj yi eꞌchk takleꞌn cachiꞌ yi mbaj chibnol scyeꞌj yi eꞌ wetz intanum yi eꞌ xonl Israel. Na ja baj el chilajul yi eꞌ intanumaꞌtz swutz chiꞌamaꞌl. Nin ja choꞌc tan jatxleꞌn cuꞌn ẍchiwutz.
3 Yi cyoqueꞌn tan chijatxleꞌn yi eꞌ intanum ẍchiwutz, suertiꞌn cuꞌn eꞌ ban scyeꞌj. Nin ja baj chicꞌayil yi eꞌ xicy nin yi eꞌ xun scyetz awer nak. Ma yi pwok yi nchicambaj scyeꞌj, ja baj chisotzal tan xcꞌalaꞌiꞌn tu xnaꞌniꞌn.
4 ”Ma jaluꞌ axwok aj Tiro, tu aj Sidón,a nin axwok filisteyb ¿mbi na itajwok jaluꞌ? ¿Na peꞌ itajwok xoyintzin sweꞌj? ¿Na peꞌ itaj tziticyꞌsaj icꞌuꞌl sweꞌj? Baꞌn binaꞌtz, na nchaꞌtz in na waj yil wakꞌ icaws. 5 Na ja baj italkꞌal yi insakal tu in oro, nin cyakil yi inmeꞌbiꞌl yi colij wakꞌun, ja ben itcyꞌal nin ja opon itaꞌn le caꞌlil yi itetz iryosil. 6 Ja chiben itcyꞌal yi eꞌ intanum yi eꞌ aj Jerusalén tu yi eꞌ aj Judá. Ja chiben itcyꞌal joylaj, nin ja chiben cꞌaꞌy scyetz yi eꞌ griego tan cyoqueꞌn tetz chiꞌesclaw. 7 Poro nocopon tan quichꞌeyeꞌn yi eꞌ wetz intanum, na cheluꞌl incyꞌal jakꞌ chicaꞌwl yi eꞌ awer nak kale eꞌ benakit icꞌayil. Ma axwok itetz ax teꞌn wok tzitijeꞌ yi qꞌuixcꞌuj yi nchitij yi eꞌ wetz intanum. 8 Na cheꞌ incꞌayeꞌ yi eꞌ initxajil scyetz yi eꞌ aj Judá, nin yi eꞌ aj Judá, mben chicꞌayil yi eꞌ initxajilaꞌtz scyetz yi eꞌ aj Sabeo yi najlcheꞌ joylaj. Juncuꞌn sbajok yi xtxolbilaꞌtz, na in na chintzan tan talcheꞌn,” stzun Kajcaw.
9 “Poro nchaꞌtz alwok yi xtxolbileꞌj scyetz yi eꞌchk mas nación. Banwok list itib tan oyintziꞌ. Xanswok yi jun oyintziꞌaꞌtz tan takꞌleꞌn kꞌej yi iryosil. Txocwok yi eꞌ sanlar yi chin cham nin eꞌ tan oyintziꞌ. Chisajken yi eꞌ yi qui na chixob tan oyintziꞌ.
10 Banwok imaꞌcl tetz oyintziꞌ te yi itasaron, ma yi ijos oken tetz spar.c Nin yi eꞌ yi quiꞌc chiwalor tan oyintziꞌ, baꞌn lcyocsaj quib tetz cham.
11 Cyakil axwok nación yi najlquixwok nakaꞌj, baꞌn cxuꞌlwok lajkeꞌl. Baꞌn tzimolsaj itib tan isajeꞌn tan oyintziꞌ, na kabaneꞌ taneꞌn itil. Mpe ik yi eꞌ yi quiꞌc chiwalor tan oyintziꞌ, baꞌn lcyocsaj quib tetz wiꞌtz aj oyintzinl.
12 Or bin itetz yi axwok nación. Baꞌn cxuꞌlwok tzoneꞌj le jocoꞌj yi na biꞌaj Josafat, na yaꞌstzun yi amaꞌl kale chincꞌoleweꞌt tan pujleꞌn xtisyaꞌ scyeꞌj cyakil yi eꞌ nación.
13 ”Ma jaluꞌ, axwok inchakum, or ikꞌab tan akꞌun te yi jos na ja wiꞌt kꞌanax yi cosech tetz uva.d Catzamwok tan yakꞌpeꞌn yi uvajaꞌtz. Na na waj yil noj yi eꞌchk cuꞌlbil taꞌal uva, nin na waj yil tzꞌel pul tibaj yi cuꞌlbilaꞌtz na chin mal nin eꞌ.e
14 Ẍchijalok jun cꞌoloj wunak le yi jun jocoꞌjaꞌtz yi na biꞌaj Josafat, le amaꞌl kalel bixeweꞌt yi chicaws wunak. Na txant tan tuleꞌn yi kꞌejlal yil tzꞌul tzaj Kajcaw tan takꞌleꞌn chicaws yi tetz contr le jun amaꞌlaꞌtz.
15 Ma yi kꞌej tu yi xaw tzꞌocpon muj swutz, ma yi eꞌchk txꞌuml quiꞌt chitxekun. Yaꞌstzun sbajok yi ntaxk ul yi jun kꞌejaꞌtz.”
Yil cheꞌl liwr yi eꞌ aj Judá
16 Ẍchꞌink tzaj Kajcaw le tnum Sión.f Chin wiꞌ nin iꞌ sbneꞌ chi na ban jun león yi na ẍchꞌin tan weꞌj. Ẍchilucnek tzun cyakil yi eꞌ yi ateꞌ tcyaꞌj tu yi eꞌ yi ateꞌ wuxtxꞌotxꞌ, na tzꞌocpon iꞌ tan chicolcheꞌn yi eꞌ tetz tanum. Nin tzꞌocopon iꞌ chi jun chin colbil ibaj scyetz yi eꞌ xonl Israel.
17 “Tzꞌelepon tzun itxum tetz yi in Jehová yi iRyosil, nin yi choꞌn najlchin wi Sión, yi wiꞌwtz yi chin xan nin. Tzinxanseꞌ yi tnumaꞌtz yi nchaꞌtz na biꞌaj Jerusalén. Nin quiꞌt wakꞌ amaꞌl scyetz awer nak tan chixcyeweꞌn teꞌj,” stzun Ryos.
18 I tzun sbajok te yi jun tiempaꞌtz. Sjalokt wiꞌnin wiꞌ uva lakak juꞌwtz, nin quiꞌc caril lech sbneꞌ. Nin cyakil yi eꞌchk beꞌ aꞌ yi at Judá snojk junt tir tan aꞌ.
Ej nin stzꞌitzꞌok jun aꞌ tzakꞌ yi caꞌl Kajcaw, yi xcyek tan sijleꞌn yi ẍkꞌajlaj cwent Sitim.g
19 Xitok yi tnum Egipto, nin tzꞌocopon yi amaꞌl Edom tetz skajwutz, yi chin tzꞌinunin tuꞌ. Yaꞌstzun sbajok scyeꞌj, na ocnakeꞌ tan chibuchleꞌn yi eꞌ xonl Judá, nin ja chiquim wiꞌnin tal prow cyaꞌn yi quiꞌc quil.h
20-21 “Wicyꞌseꞌ incꞌuꞌl scyeꞌj cyakil yi eꞌ yi ocnakeꞌ tan chibiyleꞌn yi eꞌ intanum, nin quil tzincuy chipaj yi eꞌ juchul ilaꞌtz. Poro ẍchinajank yi intanum tul yi amaꞌl cwent Judá tu Jerusalén tetz ben kꞌej ben sak. Nin yi in wetz yi in Jehová, ẍchinnajank ẍchixoꞌl wiꞌwtz Sión.
Ej nin jun cuꞌn sbajok yi xtxolbileꞌj, na in na chintzan tan talcheꞌn,” stzun Kajcaw bantz.