Yi xoꞌwbilil yi kꞌej yil tzꞌoc Ryos tan chicawseꞌn cyakil nación
2
1 Ma jaluꞌ axwok intanum, oken eꞌchk chun itaꞌn le wiꞌwtz Sión, yi wiꞌnin xanil. Oken eꞌchk tampor tu eꞌchk maꞌcl itaꞌn, tan cꞌaseꞌn cyajtzaꞌkl wunak, na txant tan tuleꞌn yi jun kꞌejlalaꞌtz, yil tzꞌoc Kataj Ryos tan chicawseꞌn yi eꞌ contr. Ej nin tan paj yi chin xoꞌwbil sbneꞌ, wiꞌnin ẍchilucneꞌ cyakil wunak beneꞌn tziꞌn wi munt.2 Iꞌtz jun kꞌej yi chin tzꞌoꞌtz nin sbneꞌ. Iꞌtz jun kꞌej yi chin muj nin sbneꞌ, na wiꞌnin sbakꞌ sbneꞌ. Na chuꞌl jun cꞌoloj sanlar yi chin cham nin eꞌ. Yil chuꞌl, snojk cuꞌn cyakil yi cojbil cyaꞌn. Choꞌn cuꞌn sbneꞌ chi na ban yi na jeꞌul yi kꞌej tibaj cyakil yi eꞌchk amaꞌl, yi cheb cuntuꞌ na xcyeꞌ tan lajluchaxeꞌn cyakil tan yi tetz pakꞌpuchal. Yi jun xtxolbilaꞌtz, qui otoj na bajij, nin sbneꞌ opon tunintz, quiꞌc junt tir yi yaꞌtzk sbneꞌ.
3 Yi jun cꞌoloj sanlaraꞌtz, niꞌcuꞌn eꞌ tu kꞌakꞌ yi tircuꞌn na tzꞌeꞌ taꞌn. Na yi kꞌakꞌ, ntaxk nin opon teꞌj jun takleꞌn, yi na tzꞌeꞌ tan yi stzꞌaꞌl, nin yi na icyꞌ paj, iẍnin na cyaj cyent yi xtxakꞌakꞌil. Na yi ntaxk chuꞌl yi eꞌ sanlaraꞌtz, chumbalaj nin taneꞌn cyakil yi eꞌchk amaꞌl beneꞌn tziꞌn, niꞌcuꞌn chi taneꞌn yi amaꞌl Edén. Poro yil chicyꞌ yi eꞌ sanlaraꞌtz nsken xit tircuꞌn. Chin tzꞌinunin tunin sbneꞌ cyen cyakil yi amaꞌl cyaꞌn. Quiꞌc nin jun yi nink clax cyen ẍchikꞌab.
4 Niꞌcuꞌn eꞌ tu chej yil chisaj nil skibaj, nin wiꞌnin choꞌjkel chi quitaneꞌn eꞌ chej tetz oyintziꞌ.
5 Nin ẍchijincank chi na jincan jun careꞌt tetz oyintziꞌ, nka chi na jamcan yi kꞌakꞌ yi na oc kꞌaꞌkl jun cꞌoloj xak xtzeꞌ. Yaꞌstzun ẍchibneꞌ cyetz tan yakꞌpeꞌn cyakil eꞌchk juꞌwtz. Na eꞌ cuꞌn jun cꞌoloj sanlar yi chin cham nin eꞌ, nin yi list quitaneꞌn tan oyintziꞌ.a
6 Cyakil wunak ẍchilucnek tan xoꞌw ẍchiwutz. Ẍchislakꞌlaxk tan xoꞌw.
7 Na yi eꞌ sanlaraꞌtz, chin cham nin eꞌ sbneꞌ tan oyintziꞌ. Nin wiꞌnin na ẍchoꞌjkelk, nin baꞌn na chijepon wiꞌak eꞌchk tapij. Sbejnin na chiben tan oyintziꞌ na qui na chixob tetz alchok.
8 Junit ẍchibneꞌ tircuꞌn. Quil chipit quib squibil quib, ma na cyꞌaꞌn len chibeꞌ cyaꞌn. Yil tzꞌoc cꞌoxleꞌn eꞌchk flech scyeꞌj, quil chixob nin quil cheꞌl xit, ma na sbejnin lchiben tan oyintziꞌ.
9 Chin list nin eꞌ sbneꞌ tan cambajeꞌn eꞌchk tnum, na chocopon pokꞌ tul. Nin chijepon tibaj eꞌchk tapij. Nin ẍchixonk wiꞌak caꞌl, nin chocpon tulak, na choꞌn chocpon tulak eꞌchk wentanuꞌ chi na ban jun alkꞌom.
Yil tzꞌul Kajcaw tan oyintziꞌ scyeꞌj yi eꞌ tetz contraꞌtz
10 Poro yil tzꞌul tzaj Kajcaw, syucank cyakil yi tcyaꞌj tu yi wuxtxꞌotxꞌ taꞌn. Tzꞌocpon muj swutz yi kꞌej tu yi xaw, nin quiꞌt chitxekun yi txꞌuml.b
11 Sbajxok Kajcaw ẍchiwutz yi eꞌ tetz sanlar yil tzꞌul tzaj. Chin wiꞌ nin iꞌ sbneꞌ tan cawuꞌn, na yi wiꞌ iꞌ tan yol, icyꞌnakteꞌn cuꞌn sbneꞌ swutz jun chin kꞌancyok.
Inti yi eꞌ tetz sanlaraꞌtz yi na chitzan tan banleꞌn taneꞌn yi tetz caꞌwl, qui ajlbeꞌn cyetz.
Chin xoꞌwbil nin sbneꞌ yi jun kꞌejaꞌtz yil tzꞌul tzaj Kajcaw tan takꞌleꞌn chicaws yi eꞌ tetz contr. Chin xoꞌwbil nin sbneꞌ. Nin cyaꞌl nin jun nink xcyeꞌ tan mucꞌleꞌn yi jun kꞌejaꞌtzꞌ.c
Yil tzꞌoc Kajcaw tan chimoxeꞌn wunak tan jeꞌn chitxꞌixpul yi cyajtzaꞌkl
12 Poro je yol Kajcaweꞌj, te yi ntaxk ul yi jun tiempaꞌtz: “Tajweꞌn cxuꞌltwok tzinwutz. Tajweꞌn tzibansaj itib swuchꞌ tetz cuꞌn italmaꞌ. Tajweꞌn tzimucꞌwok weꞌj tan ẍchajleꞌn yi jun cuꞌn na cxbisunwok tan itil, na tajweꞌn cxbisunwok taꞌn, nin tajweꞌn yil cxokꞌwok tan jakleꞌn cuybil ipaj swetz,”d stzun Kajcaw yi kaRyosil.
13 Mas balaj yi jun cuꞌn kabisunk tan kil swutz yi nink koꞌc tan ritꞌeꞌn tuꞌ beꞌch ketz. Baꞌnt cuꞌn yi nink katxꞌixpuj yi kajtzaꞌkl tan koqueꞌn junt tir jakꞌ caꞌwl yi kaRyosil. Na at wiꞌnin banl talmaꞌ iꞌ, nin na el kꞌajab iꞌ skeꞌj. At pasens iꞌ tan cuyleꞌn kapaj na at wiꞌnin lokꞌ ib tuchꞌ.e List atiteꞌt iꞌ tan cuyleꞌn kapaj tan qui katijol kacaws.
14 Na kol katxꞌixpuj yi kajtzaꞌkl, qui cunin batz quiꞌt ltakꞌ kacaws, ma na i yi banl talmaꞌ iꞌ stkꞌeꞌ sketz. Nin stkꞌeꞌ iꞌ yi eꞌchk ujul tu win sketz, bantz koyil tetz, na iꞌ yi kaRyosil.
15 Oken bin yi chun itaꞌn wiꞌwtz Sión. Nin molwokeꞌ cyakil katanum tan jun txumuꞌn yi wiꞌnin ekaꞌn taꞌn. Nin bixek jun kꞌej itaꞌn tan mucꞌleꞌn weꞌj tan jakleꞌn cuybil ipaj tetz kaRyosil.
16 Molwokeꞌ yi eꞌ tanum Ryos, bantz chixansal quib. Baꞌn cheꞌ imolwok yi eꞌ tijlcꞌuꞌlal, scyuchꞌ yi eꞌ nitxaꞌ, mpe ik yi eꞌ tal niꞌ yi na chitxutxuneꞌt. Nin nchaꞌtz yi eꞌ yi watok cunin chumeꞌ, tajweꞌn tan cyuleꞌn len.
17 Nchaꞌtz eꞌuꞌ paleꞌ, nin yi eꞌuꞌ yi na chakꞌujuꞌ te takꞌun Kajcaw, chokꞌokuꞌ swutz Ryos. Chokꞌokuꞌ le amaꞌl yi at xoꞌl yi puertil yi caꞌl Ryos tu yi patbil txꞌixwatz. Nin baꞌn cyaluꞌ tetz Kajcaw:
“Taꞌ, cuyuꞌ kapaj yi oꞌ tanumuꞌ. Quil takꞌuꞌ amaꞌl tan cyoqueꞌn yi eꞌ kacontr tan xcyꞌakliꞌn skeꞌj. Quil takꞌuꞌ amaꞌl tan koqueꞌn jakꞌ chicaꞌwl, na ko quil tzꞌocuꞌ tan kuchꞌeyeꞌn, scyaleꞌ yi eꞌ awer nakaꞌtz: ‘Laꞌk tzun ẍchamil yi cyetz chiRyosil,’ cheꞌch sbneꞌ.”f
Yil tzꞌel kꞌajab Ryos te yi tetz tanum
18 Poro kol chijakuꞌ cuybil chipajuꞌ tetz Ryos, tzꞌokꞌok tzun cꞌuꞌl te yi tetz tanum. Nin tzꞌelpon kꞌajab iꞌ scyeꞌjuꞌ. Nin je tzun staleꞌtzeꞌj:
19 “Ma jaluꞌ swakꞌeꞌ junt tir imbanl tzitibaj. Swakꞌeꞌ triw tetz iwaꞌ. Swakꞌeꞌ win tetz itcꞌaꞌ. Nin swakꞌeꞌ aceit tzitetz tan xconeꞌn tetz icumir. Swakꞌeꞌ cyakil yi tajweꞌn tzitetz. Nin quil wakꞌ amaꞌl scyetz yi eꞌ awer nak tan chitzeꞌeneꞌn tziteꞌj.
20 Nchaꞌtz chelpon inlajul yi eꞌ icontr, yi eꞌ sacꞌ taneꞌn, yi choꞌn nchisaj jeꞌn tziꞌn. Choꞌn nchiben inlajul le eꞌchk amaꞌl yi tzꞌinunin tuꞌ. Cyakil yi eꞌ yi bajxcheꞌ ẍchiwutz yi eꞌ mas, nchiben impitol xe Cꞌaꞌ Mar tan chibekꞌxeꞌn. Ma yi eꞌ yi xomcheꞌt tzaj, choꞌn ẍchiben waꞌn xe yi mar Mediterráneo, bantz chiquimeꞌn. Skꞌayok, nin xewank yi chiwankil. Yaꞌstzun sbajok scyeꞌj, na wiꞌnin eꞌchk takleꞌn yi chin juntlen nin mbaj chibnol,” stzun Kajcaw sbneꞌ.
21 Stzatzink junt tir yi eꞌchk amaꞌl beneꞌn tziꞌn wi munt. Nin quiꞌt tajweꞌn tan kaxobeꞌn te yi mbi sbajok, na sbnixok wiꞌnin eꞌchk takleꞌn balaj tan Kajcaw.
22 Nchaꞌtz yi eꞌ smaron txuc yi ateꞌ xoꞌl xtzeꞌ, quiꞌt chibisun nin quil chixob, na xtxaꞌxank junt tir yi eꞌchk amaꞌl beneꞌn tziꞌn. Sjalok junt tir wutz cyakil jilwutz loꞌbaj. Sjalok wiꞌnin wutz ibẍ. Nin quiꞌc nin caril uva sbneꞌ.
23 Nchaꞌtz axwok yi najlquix wiꞌwtz Sión, cxtzatzinkwok te Kajcaw yi kaRyosil, na stkꞌeꞌ iꞌ aꞌbal tzitetz yil tzꞌopon yi tiempil, na stkꞌeꞌ iꞌ yi bajx aꞌbal yi na oc eꞌchk ij ttxꞌotxꞌ. Ej nin nchaꞌtz stkꞌeꞌ iꞌ yi aꞌbal yi tajweꞌn jalen yil jeꞌ eꞌchk cosech, chi yi ntulej iꞌ sajleꞌn.
24 Snojk junt tir eꞌchk cꞌojaj tan triw, na sjalok balaj cosech. Nchaꞌtz sjalok wiꞌnin uva tan banleꞌn win. Nchaꞌtz sjalok wiꞌnin aceit tetz cumir.
25 Ej nin staleꞌ Kajcaw sketz: “Tzinxeꞌlseꞌ cyakil yi mmitzꞌak wok sajleꞌn tunintz te yi tiemp yi nchoꞌc yi eꞌ sacꞌ tan bajseꞌn icosech. Na in nchichakon nin yi eꞌ sacꞌaꞌtz.
26 Poro yi jaluꞌ, quiꞌt lbajij yi xtxolbilaꞌtz na sjalok iwaꞌ. Xwankwok jalen yil noj icꞌuꞌl. Ej nin cxocpon tan takꞌleꞌn inkꞌej yi in yi in itajcawil nin iRyosil, na sbnixok wiꞌnin eꞌchk takleꞌn balaj tu eꞌchk milawr waꞌn tzixoꞌlwok. Nin quiꞌt wakꞌ amaꞌl tan teleꞌn ikꞌej yi axwok intanum.
27 Chaꞌstzun te axwok xonl Israel, tajweꞌn tzꞌel itxum tetz, nin tajweꞌn tzitocsaj yi xomchin tziteꞌj. Na ntin cuꞌn in, in iTaj. Quiꞌc junt yi nink tzꞌoc tetz iRyosil. Nin quiꞌt lwakꞌ amaꞌl tan teleꞌn ikꞌej, yi axwok itetz yi axwok intanum.g
Yil tzꞌul yi espíritu tetz Kataj Ryos
28 ”Yil wiꞌt bajij yi eꞌchk xtxolbilaꞌtz swakꞌeꞌ yi inespíritu tzitetz icyakil cuꞌn.h Ej nin chocopon initxaꞌ tan xtxꞌolcheꞌn xoꞌl yi wetz wajbil. Nin yi eꞌ tijlcꞌuꞌlal ẍchiwutzicyꞌaj eꞌchk balaj wutzicyꞌ. Nchaꞌtz yi eꞌ xicy tzꞌocopon ẍchajol tib eꞌchk balaj takleꞌn ẍchiwutz tul wutzicyꞌ taneꞌn.
29 Nin nchaꞌtz swakꞌeꞌ yi inespíritu squibaj yi eꞌ imos yaj tu xnaꞌn, nin ẍchitxoleꞌ yi wetz wajbil. Yaꞌstzun tzimbneꞌ tziteꞌj te yi jun tiempaꞌtz.
30 Ej nin nchaꞌtz, tzinchajeꞌ eꞌchk lmak techl tziꞌn tcyaꞌj. Nin sjalok chichꞌ tu kꞌakꞌ nin eꞌchk sib yi icunin chin sbakꞌ taneꞌn beneꞌn tziꞌn wuxtxꞌotxꞌ.
31 Chin tzꞌoꞌtz nin sbneꞌ wutz yi kꞌej, ma yi xaw chin chichꞌi nin sbneꞌ yubil yi ntaxk ul yi jun kꞌejlalaꞌtz yi chin xoꞌwbil nin,” stzun Kataj Ryos.
32 Poro cyakil yi eꞌ yil cuꞌ chitziꞌ tan naꞌwseꞌn biꞌ Kajcaw, ẍchiclaxok cyeraꞌtz tkꞌab yi quimichil.j Na choꞌn sjalok claxeꞌn wiꞌwtz Sión, le tnum Jerusalén, chi alijt cyen tan Kajcaw. Na cyakil yi eꞌ yi bixbaꞌn cheꞌ tan chiclaxeꞌn cyen,k ẍchiclaxok nin cyeraꞌtz tan Kajcaw.