OSEAS
Txꞌolbil Xoꞌl Yi Liwreꞌj
Oseas, iꞌ jun scyeri elsanl stziꞌ Ryos yi xconak tan Ryos mas waxak cient yob te yi ntaxk itzꞌij Jesucristo.
Te yi jun tiempaꞌtz yi nación tetz Israel nsken chijatx quib. At lajuj kꞌuꞌj yi ja xom chiwiꞌ te yi rey Jeroboam, yi cyꞌajl Luwiy. At na bant cuꞌn na xcon yi yol yi eꞌ aj Israel, nka yi yol yi eꞌ xonl Efraín, nka yi yol yi eꞌ aj Samaria, poro iteꞌn nin kꞌuꞌjaꞌs yi na aꞌlchij Reino del Norte scyetz.
Ocnak Oseas tetz elsanl stziꞌ Ryos ẍchixoꞌl yi eꞌ aj Israelaꞌtz, te yi tiemp yi at tzaj Jeroboam tetz chireyil. Ej nin Samaria biꞌ yi lmak tnum kale atit yi najbil Jeroboamaꞌtz, nin kale cawuneꞌt iꞌ. Ej nin yi eꞌ xonl Efraínaꞌtz yi eꞌ ben xomok scyeꞌj yi eꞌ aj lsraelaꞌtz yaꞌstzun yi jun kꞌuꞌj yi at mas chixoneꞌn nin yi mas cham tan oyintziꞌ ẍchixoꞌl.
Ma yi eꞌ aj Judá scyuchꞌ yi eꞌ xonl Benjamín, yaꞌstzun yi cobt kꞌuꞌj yi apart chireyil, nin yi na chibiꞌaj yi Reino del Sur.
Yi Oseas tu yi txkel ja chixcon tan Ryos tetz jun elsawutzil, tan ẍchajleꞌn yi ẍeꞌn quitaneꞌn yi coblaj kꞌuꞌj yi eꞌ xonl lsraelaꞌtz swutz iꞌ.
Yi Weklil Yi Liwreꞌj
Yi bajx wekl (Cap. 1–3) na ẍchaj yi ẍeꞌn cuꞌn ban Oseas tu txkel. Iꞌtz jun eltzaj wutzil te yi ẍeꞌn cuꞌn tzꞌocopon Ryos tan chimoxeꞌn tzaj yi eꞌ tetz tanum junt tir.
Yi caꞌp wekl (Cap. 4–13) na ẍchaj sketz yi ẍeꞌn ban Oseas tan makleꞌn kloꞌ chiwutz yi eꞌ aj Israel te chiyaꞌpl.
Yi toxeꞌn wekl (Cap. 14) na ẍchaj sketz yi ẍeꞌn cuꞌn ban yi toqueꞌn Oseas tan chimoxeꞌn yi eꞌ aj Israel tan chipakxeꞌn tzaj tkꞌab Kataj, nin yi mbi cuꞌn sbajok yil chibansaj quib tu Ryos tzantzaj.