Stzajsbil wiꞌ tircuꞌn
12
1 ’Yil bajij yi xtxolbilaꞌseꞌj, jepon txiclok Miguel,a yi wiꞌtz ángel yi qꞌuicyꞌlom cyetz yi ara tanum.Chin bisbil nin tzun sbneꞌ yi jun tiempaꞌtz,b na qui otojk ja bajij yi eꞌchk takleꞌnaꞌtz ẍchixoꞌl wunak sajleꞌn tunintz. Poro yil tzꞌicyꞌpon yi tiempaꞌtz ẍchiclaxokc cyakil yi eꞌ atanum yi tzꞌibaꞌnt chibiꞌ tul yi liwr Ryos.
2 Ẍchitzꞌok wiꞌnin eꞌ quimnakeꞌ.d Ẍchitzꞌok tan cyetzal yi itzꞌajbil tetz ben kꞌej ben sak. Poro nchaꞌtz wiꞌnin eꞌ ẍchitzꞌok tan tijleꞌn chicaws tetz ben kꞌej ben sak yi chin xoꞌwbil nin. Chin txꞌixwil nin sbneꞌ tetz cyetz.
3 Ma yi eꞌ yi tzꞌaknak cuꞌn cyajtzaꞌkl, yi eꞌ yi ocnakeꞌ tan chichusleꞌn wiꞌnin wunak tan chixomeꞌn te yi balaj beꞌ yi jicyuch teꞌj, chitxekunk chi taneꞌn yi txꞌumle lakꞌbal. Ej nin chitxekunk tetz ben kꞌej ben sak.
4 ’Ma aẍatz Daniel, cyaꞌl tzawal wit yi eꞌchk takleꞌneꞌj ma na na waj yil tzꞌoc jun seyf taneꞌn te yi liwreꞌj. Na waj yil jopxij jalen yil jepon yi wiꞌtzbil tiemp. Te yi jun tiempaꞌtz ẍchixonk wiꞌnin wunak beneꞌn tziꞌn wi munt. At eꞌ yi oqueꞌn ẍchibneꞌ, nin at eꞌ yi eleꞌn ẍchibneꞌ tan jaleꞌn cyajtzaꞌkl te yi mbi sbajok tul yi jun tiempaꞌtz,’ stzun yi junaꞌtz ban swetz.
Yi beneꞌn jakol jun ángel yi tonaꞌl tzaj wiꞌ yi qꞌuixcꞌuj squibaj yi eꞌ xonl Israel
5 ”Ma yi in wetz yi in Daniel nintzun ben wilol cobt yaj yi txiclcheꞌ-tz stziꞌak yi tzanlaꞌ Ulay. At tzaj jujun lakak xlaj. 6 Beneꞌn tzun jakol jun scyeri cobaꞌtz tetz yi jun yi wekoꞌn tib tan balaj beꞌchok, yi lino cuꞌn, yi txiclij tibaj yi aꞌ. Itzun taltz: ‘¿Tonaꞌl tzaj wiꞌ yi eꞌchk takleꞌneꞌj yi chin xoꞌwbil nin sbneꞌ?’ 7 Jeꞌn tzun tkꞌol yi jun yajaꞌtz yi kꞌab tcyaꞌj tan ẍchajleꞌn yi sak cuꞌn swutz Ryos yi xtxolbil yi staleꞌ iꞌ. Nintzun taltz: ‘Yil tzꞌicyꞌ ox yob tu niꞌcy,g nin yi nsken xit chichamil yi eꞌ tanum Ryos, kalenaꞌs ltaneꞌ cyakil eꞌchk takleꞌnaꞌtz,’ stzun yi jun ángelaꞌtz bantz.
Yi beneꞌn jakol Daniel yi mbil sbajok yil tzaj wiꞌ yi ox yob tu niꞌcyaꞌtz
8 ”Ja tzun wit cyakil yi ntal iꞌ, poro quiꞌc nin muꞌẍ tal nink meꞌl intxum tetz. Beneꞌn tzun injakoltz tetz: ‘Taꞌ ¿mbi sbajok yil tzaj wiꞌ yi jun tiempaꞌtz?’ 9 Sajeꞌn tzun tlol iꞌ swetz: ‘Daniel, quiꞌc awocleꞌn teꞌj. Na cyakil yi xtxolbil te yi mbil sbajok tajweꞌn tan teweꞌn jalen yil jepon tamp te yi jun tiempaꞌtz. 10 Tan yi qꞌuixcꞌuj yi ẍchitijeꞌ yi eꞌ atanum sjalok wiꞌnin eꞌ yi chocopon tetz balaj. Chin skoj nin sbneꞌ cyalmaꞌ. Ma yi eꞌ malnak ẍchibneꞌ nin yi cyetz cyajbil,h nin quil tzꞌicyꞌ scyetz yi mbi lbajij scyeꞌj. Poro yi eꞌ yi tzꞌaknak cuꞌn cyajtzaꞌkl tzꞌelpon chitxum te cyakil yil sbajok. 11 Yil taneꞌ yi pateꞌn txꞌixwatz nin yil tzꞌocopon yi jun takleꞌn yi chin xoꞌwbil nin le caꞌl Kataj, tajweꞌn tan ticyꞌeꞌn jun mil tu cob cient tu jun mutxꞌ tu lajuj kꞌej (1,290).i 12 Ban cyeri yi eꞌ yil kꞌukeꞌ nin chicꞌuꞌl te Kataj jalen yil tzꞌicyꞌepon jun mil ox cient tu junak oꞌlaj kꞌej (1,335), jetz yi teleꞌn ticyꞌleꞌn yi pateꞌn yi txꞌixwatz tibaj yi altar.j 13 Poro yi aẍatz Daniel quiwit, jalen yil ẍquim, na cẍujek nin cẍitzꞌok junt tir le wiꞌtzbil kꞌejlal tan awetzal yi jalaj atxꞌotxꞌk yi tzꞌakꞌlok tzatz,’ stzun yi jun yajaꞌtz bantz.”