Yi rey tetz jeꞌn tziꞌn tu yi rey tetz Egipto
11
1 ”Nchaꞌtz tal yi ángel swetz: ‘Yi in wetz ja noꞌc tan ẍchꞌeyeꞌn Darío, yi chireyil yi eꞌ aj Media yi toqueꞌn tan cawuꞌn tibaj Babilonia. 2 Ma jaluꞌ, tzinchajeꞌ yi eꞌchk takleꞌn yi jun cuꞌn tzꞌelepon cuꞌn teꞌj:’Chocopon oxt rey tan chicaweꞌn yi eꞌ aj Persia. Yil jepon tamp yi chitiemp yi oxaꞌtz tan cawuꞌn, tzꞌocopon junt yi mas tetz meꞌbiꞌl ẍchiwutz yi oxaꞌtz. Ej nin yil jal wiꞌnin ẍchamil tan yi tetz meꞌbiꞌlaꞌtz, tzꞌocopon tzuntz tan majleꞌn kloꞌ wiꞌnin amaꞌl cwent Grecia tan cawuneꞌn tibaj. 3 Poro yil xon tiemp sjalok junt rey cwent Grecia yi chin aj oyintziꞌinl iꞌ. Nin scambajeꞌ wiꞌnin amaꞌl beneꞌn tziꞌn tan cawuneꞌn tibaj. Nin yil cawun iꞌ, sbneꞌ yi tetz tajbil. 4 Poro quil quiwix iꞌ tan cawuꞌn, na xitok yi tetz caꞌwl nin sjatxlok yi amaꞌl chikꞌab cyaj wiꞌtz sanlar yi eꞌ xconak tetz iꞌ. Quil tzꞌakꞌlij amaꞌl tan toqueꞌn cyen jun xonl yi kꞌajtzun reyaꞌtz tan cawuꞌn. Ej nin yil chicawun yi cyaj sanlaraꞌtz tibaj yi jun chin naciónaꞌtz quil jepon tan stzꞌamleꞌn yi ẍchamil tu yi balajil chi mban cyen tkꞌab yi kꞌajtzun reyaꞌtz.
5 ’Itzun yi rey yil cawun cwent Egipto sjalok wiꞌnin tetz ẍchamil tan cawuꞌn. Poro junt scyeri eꞌ cyaj wiꞌtz sanlaraꞌtz, yil cawun Siria, sjalok mas tetz ẍchamil tan cawuꞌn swutz iꞌ, nin scawunk tibaj mas amaꞌl. 6 Ma yil xon tiemp sbixek jun trat ẍchixoꞌl yi cob naciónaꞌtz tan qui jaleꞌn oyintziꞌ ẍchixoꞌl, nin tan quichꞌeyal quib squibil quib. Nchaꞌtz yi rey tetz Egipto stkꞌeꞌ yi meꞌl tetz txkel yi rey tetz Siria, bantz jaleꞌn tzatzin paz ẍchixoꞌl yi cob naciónaꞌtz. Poro quil liwrin chitxumuꞌn na chicopon biyij yi xnaꞌn tu yi tetz chmil scyuchꞌ cyakil chimos. 7 Poro sjalok jun xonl, yi kꞌajtzun xnaꞌnaꞌtz, yi aj Egipto yi tzꞌocopon tan oyintziꞌ scyeꞌj yi eꞌ sanlar cwent Siria, nin stetzajeꞌ iꞌ yi cyetz chi amaꞌl kale na chicyeweꞌt quib yi eꞌ bajxom. 8 Nchaꞌtz mben tcyꞌal cyakil chiryosil yi banij cyaꞌn, yi chꞌichꞌ cuꞌn, tuml wiꞌnin eꞌchk takleꞌn yi oro tu sakal cuꞌn. Choꞌn tzun stzꞌopon takꞌun jalen Egipto.
9 ’Poro yil xon tiemp, yi quiꞌct oyintziꞌ sbajok ẍchixoꞌl yi cob tnumaꞌtz, tzꞌopon jun kꞌej yi tzꞌocopon yi chireyil yi eꞌ aj Siria tan cambajeꞌn kloꞌ yi chiluwar yi eꞌ aj Egipto. Poro quil xcyeꞌ scyeꞌj, nin spakxok junt tir le tetz tanum.
10 ’Poro yil tzꞌel tiemp chocopon yi eꞌ cyꞌajl yi jun reyaꞌtz tetz Siria tan xtxumleꞌn junt oyintziꞌ. Nin chocopon tan chimolcheꞌn junt cꞌoloj sanlar tan cyoqueꞌn tan oyintziꞌ. Poro jun scyeri yi eꞌ cyꞌajolaꞌtz mben scyuchꞌ yi eꞌ tetz sanlar tan oyintziꞌ le jun amaꞌl kale na chicolwit quib yi eꞌ aj Egipto. Xcyek iꞌ tan chixiteꞌn cuꞌn, chi na ban jun tzanlaꞌ yi na eluꞌl. 11 Tan yi xtxolbileꞌj jepon swutz yi ajcaw tetz Egipto, nin tzꞌeluꞌl iꞌ tan oyintziꞌ scyuchꞌ yi eꞌ aj Siria nin xcyek iꞌ scyeꞌj, na nim cuꞌn chixoneꞌn yi eꞌ tetz sanlar. 12 Poro tan paj yi xcyek yi rey tetz Egipto tan chibiyleꞌn cuꞌn yi jun chin cꞌoloj sanlaraꞌtz tetz Siria, stocsaj tib nim tu yi tajtzaꞌkl. Poro quil ben ẍkon yi tiemp tan cawuꞌn. 13 Na yil xon tiemp tzꞌocopon junt tir yi rey tetz Siria tan chimolcheꞌn junt cꞌoloj sanlar yi mas nim tcuꞌn tajlal swutz yi ban yi bajx tir. Ej nin ẍchiwekxok tan eꞌchk balaj maꞌcl tan oyintziꞌ scyeꞌj yi eꞌ aj Egipto.
14 ’Yil bajij yi xtxolbilaꞌseꞌj, ẍchijalok wiꞌnin ara tanum yi choꞌn ateꞌ jakꞌ caꞌwl yi rey tetz Egipto yi chocopon tan oyintziꞌ teꞌj, bantz cyeleꞌn liwr jakꞌ caꞌwl iꞌ. Yaꞌs tzun ẍchibneꞌ tan paj jun visión yi skileꞌ. Poro quil chicambaj yi cyajbil na chocopon pres jak caꞌwl yi rey tetz Siria. 15 Ma yil tzꞌopon chireyil yi eꞌ aj Siria tan oyintziꞌ te jun lmak tnum cwent Egipto tzꞌocopon tan nojseꞌn xeꞌ yi tapij tan cyocomponeꞌn tul, nin xcyek iꞌ teꞌj. Quil xcyeꞌ jun tan makleꞌn ẍchamil, tuꞌk yi eꞌ sanlar yi at mas chichamil cwent Egipto quil chixcyeꞌ tan makleꞌn yi eꞌ chicontraꞌtz. 16 Yi jun chicontraꞌtz yi choꞌn sajeꞌn jalen Siria sbneꞌ iꞌ yi tetz tajbil scyeꞌj yi eꞌ pres yi scambajeꞌ. Cyaꞌl tzun jun aj Egipto yi snimsaj cꞌuꞌl junt tir tan oyintziꞌ teꞌj. Te yi na pakxij yi rey tetz Siria le tetz tanum, choꞌn stzicy, nin scyajk cyen le amaꞌl yi na biꞌaj Chin Yubeꞌn Nin. Ej nin cyakil cuꞌn yil snojk cyen swutz xitok taꞌn. 17 Nchaꞌtz swekeꞌ tib tan beneꞌn tan oyintziꞌ tan majleꞌn kloꞌ cyakil yi amaꞌl cwent Egipto. Ej nin yi tajtzaꞌkl iꞌ yil xcon, iꞌtz yil sbixek jun trat tu yi rey tetz Egipto. Nchaꞌtz stkꞌeꞌ iꞌ yi meꞌl tetz txkel yi jun reyaꞌtz bantz cambal kloꞌ iꞌ yi amaꞌl. Poro quil scambaj yi tetz tajbil. 18 Tzꞌocopon tzuntz tan oyintziꞌ scyeꞌj yi eꞌchk tnum yi ateꞌ tzi mar, nin xcyek iꞌ teꞌj wiꞌnin. Ej nin tzꞌocopon iꞌ tan oyintziꞌ tan teleꞌn xtxꞌix junt wiꞌtz sanlar, poro quil xcyeꞌ teꞌj. Ma na i tetz xtxꞌix tzꞌelepon. 19 Pakxok tzuntz le tetz tanum tan colol tib tul yi eꞌchk caꞌl yi bnixnak taꞌn tan colol tib tul. Poro snojk cyen jun takleꞌn swutz yil xcyek tan biyleꞌn cuꞌn. Ej nin cyaꞌl nin naꞌwseꞌt biꞌ iꞌ.
20 ’Apart tzun junt tzꞌocopon tetz xel tan cawuꞌn. Ej nin mben ẍchakol jun tan telseꞌn alcawal beneꞌn tziꞌn, bantz jaleꞌn yi tetz riquil. Nin yil tzꞌel cobox tiemp copon biyij yi jun ajcawaꞌtz. Poro nkꞌeꞌtz tul oyintziꞌ lquimeꞌt.
21 ’Yil quim yi junaꞌtz tzꞌocopon junt yaj tan cawuꞌn, yi chin juntlen nin tajtzaꞌkl. Quiꞌc nin kloꞌ tocbil iꞌ tetz rey, na quiꞌc nin muꞌẍ xac. Tzꞌocopon iꞌ tetz ajcaw tan tuꞌ yi chin subul nak nin iꞌ. 22 Tzꞌocopon iꞌ tan chixiteꞌn cuꞌn cyakil yi eꞌ contr yi chocopon kloꞌ tan makleꞌn wutz. Nin copon biyol yi wiꞌtz ajcaw yi nsken bixeꞌ chitrat tuchꞌ. 23 Nchaꞌtz tzꞌocopon tan chisubleꞌn cyakil yi eꞌ tamiw iꞌ, yi nsken bixeꞌ jun chitrat tuchꞌ. Ej nin mpe qui tunin kꞌusij yi tnum kale na cawuneꞌt iꞌ sjalok wiꞌnin tetz ẍchamil tan cawuꞌn, nin mben loꞌon yi tetz caꞌwl beneꞌn tziꞌn. 24 Qui nin tzun tzꞌicyꞌ scyetz yi eꞌ wunak yil tzꞌoc iꞌ tan majleꞌn yi eꞌchk balaj luwar. Ej nin tzꞌocopon iꞌ tan banleꞌn eꞌchk takleꞌn yi qui otojk na ban jun sajleꞌn tunintz, na tzꞌocopon iꞌ tan jatxleꞌn cyakil yi eꞌchk takleꞌn yi scambajeꞌ scyetz yi eꞌ tetz sanlar. Ej nin sjoyeꞌ iꞌ puntil tan chixiteꞌn kloꞌ eꞌchk quiw tnum. Poro tetz cobox ntziꞌ tiemp sbneꞌ iꞌ yi xtxolbilaꞌseꞌj.
25 ’Tan tuꞌ yi at ẍchamil, nin yi quil xob tetz jun, mben iꞌ tan oyintziꞌ te yi chireyil yi eꞌ aj Egipto. Sjalok jun chin cꞌoloj sanlar iꞌ tan ẍchꞌeyeꞌn. Ma yi rey tetz Egipto qui nin lxob tetz, na nchaꞌtz iꞌ tetz, sjalok jun cꞌoloj tetz sanlar yi chin cham nin eꞌ, nin chocopon tan oyintziꞌ te yi ajcaw tetz Siria. Poro copon subij yi rey tetz Egipto cyakꞌun cobox. Chaꞌstzun te quil xcyeꞌ iꞌ te yi contr. 26 Na iteꞌn nin eꞌ xtxocum, yi na chiwan xlaj, chocopon tan subleꞌn cuꞌn yi rey tetz Egipto. Chaꞌstzun te ẍchiloꞌonk yi eꞌ tetz sanlar nin wiꞌnin eꞌ ẍchiquimok. 27 Ẍchicꞌolek yi cob ajcawaꞌtz tan waꞌaꞌn tan jaleꞌn kloꞌ tzatzin ẍchixoꞌl. Poro nkꞌeraꞌtz sbneꞌ na ẍchisubeꞌ quib squibil quib. Scyaleꞌ wiꞌnin wi cyakꞌ. Poro cyaꞌl nin jun scambajeꞌ yi tajbil yi na chiwutz quen teꞌj, na ntaxk opon yi tiempil tan jaleꞌn tzatzin paz. 28 Yil pakxij yi jun rey tetz Siria le tetz tanum, mben tcyꞌal wiꞌnin meꞌbiꞌl yi scambajeꞌ scyeꞌj yi eꞌ aj Egipto. Ej nin yil pakxij iꞌ, tzꞌocopon tan oyintziꞌ scyeꞌj yi eꞌ yi bnixnak chitrat tu Ryos,a yi trat yi chin xan nin. Poro sbneꞌ yi tetz tajbil scyeꞌj, kalenaꞌs tzun lpakxij le tetz tanum.
29 ’Yil jepon yi kꞌejlal yi txumijt, mbent cꞌoxol tib junt tir cweꞌn tziꞌn tan oyintziꞌ scyuchꞌ yi eꞌ aj Egipto. Poro quil xcyeꞌ scyeꞌj yi eꞌ contraꞌtz chi mban te yi bajx tir. 30 Na chopon jun cꞌoloj sanlar cwent Roma yi choꞌn najlcheꞌ toqueꞌn tziꞌn tan xiteꞌn cuꞌn. Yi jun cꞌoloj sanlaraꞌtz choꞌn chuꞌl tcꞌuꞌl barc tan oyintziꞌ. Ma yi eꞌ sanlar tetz yi rey tetz Siria, chelepon ojk ẍchiwutz na wiꞌnin chichamil tan oyintziꞌ. Tan paj yi xtxolbilaꞌtz, ẍchiꞌchok cꞌuꞌl yi rey tetz Siria scyeꞌj yi eꞌ tanum Ryos. Ej nin ẍcheꞌ xconseꞌ yi eꞌ yi ja cyaj cyen quilol Ryos tan bnol iꞌ yi tetz tajbil scyeꞌj yi eꞌ yi choꞌn kꞌuklij chicꞌuꞌl te Ryos.
31 ’Chocopon yi eꞌ tetz sanlar tan telseꞌn kꞌej yi caꞌl Ryos, na ẍchimakeꞌ yi oy yi na pat-xij cyakil kꞌej swutz yi caꞌl Ryos nin tzꞌocopon tan banleꞌn eꞌchk takleꞌn yi chin juntlen nin le jun amaꞌlaꞌtz yi chin xan nin.b 32 Yi jun reyaꞌtz xconk putzpuj yol taꞌn tan chisubleꞌn yi eꞌ yi squileꞌ cyen yi chitrat tu Ryos. Ma yi eꞌ yi na cyek ẍchiꞌ Ryos quil cyakꞌ quib nin chocopon tan oyintziꞌ teꞌj. 33 Ej nin yi eꞌ yi chusij cheꞌ te yol Kataj chocopon tan chichusleꞌn wiꞌnin wunak. Poro chicopon biyij. At eꞌ yi chitzꞌeꞌok takꞌon chicontr, nin at eꞌ yi tzꞌelepon majij cyakil chimeꞌbiꞌl. Ej nin at eꞌ yil chiben pres ẍchixoꞌl awer wunak. Poro yi jun ilaꞌtz tetz cobox ntziꞌ yob sbneꞌ. 34 Yil xeꞌtij eꞌchk ilaꞌtz chocopon cobox tan quichꞌeyeꞌn atanum, poro ntin tuꞌ tan paj yi at na chiwutz cyen teꞌj. 35 Nchaꞌtz chocopon tan chibuchleꞌn cobox scyeri eꞌ chusul cyetz atanum. Poro tan paj yi buchbeꞌn cyetz mas tcuꞌn ẍchiquiwixk tkꞌab Kataj nin chocopon tetz tzꞌaknak cuꞌn. Yaꞌstzun sbajoktz jalen yil jepon tamp yi tiemp yi bixbaꞌnt tan Ryos.
Yi wiꞌtzbil rey yi at tulbil
(2Ts 2:3-4)
36 ’Itzun yi rey tetz yi amaꞌl jeꞌn tziꞌn, sbneꞌ yi tetz tajbil quib yi na icyꞌ tcꞌuꞌl. Nin stocsaj tib mas nim ẍchiwutz alchok ryos.c Ej nin tzꞌocopon tan talcheꞌn cachiꞌ yol tetz yi mero Ryos. Xtxꞌaconk iꞌ te cyakil yil sbneꞌ jalen yil tzꞌoc Ryos tan cawseꞌn. Na cyakil yi bixbaꞌnt tan Ryos tzꞌelepon cuꞌn teꞌj. 37 Yi jun reyaꞌtz quil tek ẍchiꞌ siquier jun ryos mpe ik chiryosil yi eꞌ tetz cyꞌeꞌx nka yi jun yi na el cyalmaꞌ yi eꞌ xnaꞌn teꞌj.d Quil tek ẍchiꞌ yi jun reyaꞌtz alchok ryos, na stocsajeꞌ tib iꞌ nim tcuꞌn swutz alchok ryos. 38 Ntin cuꞌn stkꞌeꞌ kꞌej yi ryos yi taw oyintziꞌ. Stkꞌeꞌ iꞌ kꞌej yi jun ryosaꞌtz yi qui ocnakeꞌ yi eꞌ mam teꞌ tan takꞌleꞌn kꞌej. Ej nin stoyeꞌ wiꞌnin eꞌchk oy tetz, chi taneꞌn oro, sakal, tu eꞌchk balaj cꞌub yi wiꞌnin jamel. 39 Chixconk eꞌ awer nak taꞌn yi apart chiryosil tan quicyꞌleꞌn yi eꞌchk amaꞌl kale na chicolwit quib yi eꞌ tetz sanlar. Ej nin yi jun reyaꞌtz stkꞌeꞌ chikꞌej cyakil yi eꞌ yi scyakꞌeꞌ kꞌej iꞌ. Nchaꞌtz stkꞌeꞌ iꞌ yi cyakꞌun tu balaj txꞌotxꞌ scyetz.
40 ’Poro yil jepon tamp yi tiemp yi jun reyaꞌtz tzꞌocopon yi chireyil yi eꞌ aj Egipto tan oyintziꞌ teꞌj. Poro yi iꞌ tetz tzꞌeluꞌl tan chicꞌulcheꞌn. Choꞌn cuꞌn sbneꞌ iꞌ tan oyintziꞌ scyeꞌj chi na ban jun chumam cyekꞌekꞌ aꞌbal. Mben iꞌ tan oyintziꞌ cweꞌn tziꞌn nin snojk cyakil yi amaꞌl tetz cweꞌn tziꞌn taꞌn tan eꞌchk careꞌt tetz oyintziꞌ, scyuchꞌ sanlar yi ateꞌeꞌn teꞌj chej. Nchaꞌtz cyakil yi stziꞌ mar snojk cuꞌn tan eꞌchk barc yi na xcon tan oyintziꞌ. 41 Nchaꞌtz tzꞌocopon iꞌ le amaꞌl yi na biꞌaj Chin Yubeꞌn Nin, nin ẍchiquimok wiꞌnin wunak taꞌn. Poro yi eꞌ aj Edom scyuchꞌ yi eꞌ aj Moab ẍchiclaxok. Nchaꞌtz wiꞌnin amaꞌl cwent Amón sclaxok tkꞌab. 42 Poro yi eꞌ tetz sanlar scyetzajeꞌ wiꞌnin amaꞌl. Siquier nink clax yi nación Egipto chikꞌab. 43 Cyakil chimeꞌbiꞌl yi eꞌ aj Egipto tu cyakil chiꞌoro tu sakal tzꞌelepon chimajol. Nchaꞌtz sbajok te yi tnum Libia tu yi tnum Etiopía. 44 Poro yi jun ajcawaꞌtz stbiteꞌ jun stziblal yi choꞌn tzꞌul jeꞌn tziꞌn tu teleꞌn tziꞌn. Yi jun stziblalaꞌtz xcyek tan xoꞌwseꞌn iꞌ nin tan takꞌleꞌn chiꞌch cꞌuꞌlal tetz. Pakxok tzuntz tan chibiyleꞌn cuꞌn kloꞌ cyakil yi eꞌ contraꞌtz. 45 Bnixok yi tetz campament le amaꞌl yi at xoꞌl yi mar tu yi wiꞌwtz yi chin xan nin, yi choꞌn at cwent yi amaꞌl yi na biꞌaj Chin Yubeꞌn Nin. Choꞌn tzun squimok iꞌ-tz tul yi jun amaꞌlaꞌtz, na cyaꞌl jun tzꞌocopon tan ẍchꞌeyeꞌn.