Yi eꞌchk takleꞌn yi til Daniel stzi yi tzanlaꞌ Tigris
10
1 Itzun bantz tul yi toxiꞌn yob yi na cawun tzaj Ciro yi aj Persia, nintzun chajxij cobox xtxolbil tetz Daniel, yi junaꞌtz yi na aꞌlchij Beltsasar tetz. Yi cobox xtxolbilaꞌtz yi chajxij tetz Daniel tul wutzicyꞌ taneꞌn, qui chan tzꞌel cuꞌn teꞌj. Poro ilenin sbajok, na iꞌtz bintzi. Yi xtxolbilaꞌseꞌj at qꞌuixbel tan teleꞌn xtxum jun tetz, poro nintzun oc Daniel tan xtxumleꞌn yi mbi na elepont, ej nin xcyeꞌ iꞌ-tz teꞌj.2 “Itzun mimban wetz, yi in Daniel, te yi nsken wiꞌt lajluchax yi jun xtxolbilaꞌtz tzinwutz. Ja tzun chimbisun taꞌn. Ox tzun sman mimbantz tan bis. 3 Ej nin tan paj yi bisaꞌtz yi atin cuꞌnt, qui nin inwan te balaj cumir, na quiꞌc chiꞌbaj, nin quiꞌc win mbaj waꞌn. Nchaꞌtz quiꞌc perfum mmoꞌc sweꞌj jalen yi ticyꞌeꞌn yi ox sman bisaꞌtz. 4 Ej itzun bantz tul yi junak cyaj kꞌej te yi bajx xaw tetz yi jun yobaꞌtz, choꞌn tzun atin wetz stziꞌ yi tzanlaꞌ yi na biꞌaj Tigris. 5 Te yi atin stziꞌ yi tzanlaꞌaꞌtz, nin ben wilol jun yaj yi at-tz. Yi beꞌch tetz iꞌ lino cuꞌn, nin yi cꞌalbil oro cuꞌn.a 6 Ej nin yi wankil iꞌ, chin txekun nin chi taneꞌn yi yubil yi balaj cꞌub topacio. Yi wutz, wiꞌnin pakꞌpuchaxeꞌn chi taneꞌn jun xlitzꞌ. Ma yi bakꞌ wutz wiꞌnin xtxekuneꞌn chi na txekun jun kꞌakꞌ. Ma yi kꞌab tu yi tkan, wiꞌnin litzꞌuneꞌn chi na litzꞌun yi jun jilwutz chꞌichꞌ yi brons cuꞌn. Ej nin yi wiꞌ iꞌ tan yol, chin wiꞌ nin na ban, chi na chiẍchꞌin jun cꞌoloj wunak.
7 ”Cyaꞌl nin jun scyeri yi eꞌ yi xomcheꞌ sweꞌj ilon yi jun xtxolbilaꞌtz, ntin cuꞌn in, na cyakil cuꞌn eꞌ, eꞌ xobtz nin eꞌ el ojkuj tan ew ib. 8 Inchuc nin tzun incyajeꞌn cyentz tan tilweꞌn yi jun xtxolbilaꞌtz. Chin sakt nin tzun mimban tan xoꞌw. Nin quiꞌct nin inwalor bantz. 9 Itzun yi jiloneꞌn tzaj iꞌ swetz, ninin el incꞌuꞌl, nin ja chincuꞌ trimp wuxtxꞌotxꞌ. 10 Te yi coylchin wuxtxꞌotxꞌ, ja chinachon teꞌj yi ja oc jun tan intzꞌamleꞌn nin tan wuchꞌeyeꞌn. Nintzun incyaj cyen cꞌoꞌoloktz. 11 Sajeꞌn tzun tlol iꞌ swetz: ‘Aẍ jun cꞌoloj Daniel, wiꞌnin na pekꞌ Ryos tzaweꞌj, txiclijeꞌn bin, nin bit tzaj yi yol yi swaleꞌ tzatz. Ja chin saj chakij tan yol tzatz.’b
”Yi sajeꞌn tlol iꞌ yi yolaꞌseꞌj wiꞌnin tzun inlucneweꞌn yi injeꞌn txiclok. 12 ‘Daniel, quil cxob swetz,’ stzun iꞌ bantz. ‘Na ja tbit Ryos yi atziꞌ yi akul. Na jetz yi axeꞌtleꞌn tan xtxumleꞌn yi eꞌchk takleꞌn yi chin qꞌuixbel tan teleꞌn atxum tetz, nin jetz yi bixeweꞌn awaꞌn tan awoqueꞌn juy swutz iꞌ, ja tbit iꞌ yi awajbil. Chaꞌstzun te ja chinsaj ẍchakol tan xtxꞌolcheꞌn xoꞌl tzatz. 13 Quenin kloꞌ wuleꞌn, poro quiꞌ nin, na yi ángel yi wiꞌtz ajcaw tibaj cyakil yi amaꞌl Persia,c ja oc tan oyintziꞌ sweꞌj. Nin junak jun cuꞌn kꞌej nchincuꞌ makol. Quinin tzun nicyꞌ tzaj jalen yi tuleꞌn Miguel, jun scyeri eꞌ wiꞌtz ángel cwent Ryos, tan wuchꞌeyeꞌn. Na inchuc cunin tan oyintziꞌ scyeꞌj yi eꞌ wiꞌtz ángel cwent Baybaꞌn yi na chicawun tibaj Persia. 14 Ibin jaluꞌ ja nuꞌl tan talcheꞌn tzatz yi mbi sbajok scyeꞌj atanum sbneꞌ opon tunintz, na cyakil yi mawil tul yi awutzicyꞌ, na ẍchaj yi mbi sbajok scyeꞌj tul yi tiemp yi at tulbil,’ stzun iꞌ bantz swetz.
15 ”Te yi na tzan iꞌ tan talcheꞌn yi xtxolbilaꞌtz swetz, ajnak cuꞌn tunin wetz inwutz wuxtxꞌotxꞌ, nin quiꞌc nin jun yol na wal nin tetz. 16 Poro jalt cun tunin yi sajeꞌn jun tan macleꞌn intziꞌ. Yi junaꞌtz icunin jun yaj taneꞌn. Nintzun ben walol tetz yi junt yi at tzinwutz: ‘Wajcaw, ja skej intziꞌ tan xoꞌw nin quiꞌct nin inwalor at. 17 ¿Ẍeꞌn tzun chinxcyeꞌ tan yol teruꞌ, na quiꞌc nin muꞌẍ tal inwalor at, nin quiꞌt na je ul inxew tan paj xoꞌw?’ chinch tzun bantz tetz.
18 ”Itzun yi jun yi icunin jun yaj taneꞌn nintzun saj iꞌ-tz tan inmacleꞌn junt tir. Nin jalt inwalor. 19 Sajeꞌn tzun tlol swetz: ‘Quil cxob swetz, nin quil sotz acꞌuꞌl na na peꞌk Ryos tzaweꞌj. ¡Quiwit bin; quiwixk acꞌuꞌl; quil cxob!’ stzun iꞌ bantz swetz.
”Itzun te yi na tzan iꞌ tan yol, innach cunin yi tuleꞌn inwalor, nin ja chinquiwix tan talcheꞌn tetz: ‘Taꞌ, baꞌn bin jilonuꞌ, na jalt inwalor tan tbiteꞌn yi yoluꞌ.’ 20-21 Sajeꞌn tzun tlol iꞌ swetz: ‘¿Na peꞌ el atxum tetz yi mbi tzuntz yi atin tzoneꞌj? Iꞌtz tan xtxꞌolcheꞌn xoꞌl tzatz yi xtxolbil yi tzꞌibaꞌnt cyen tul yi liwr yi bintzi nin tetz. Ej nin ntin yil wal cyen tzatz, nicyꞌepon wetz, na nchimben tan oyintziꞌ te yi ángel cwent Baybaꞌn, yi ajcaw tibaj yi tnum Persia. Ej nin yil tzaj wiꞌ yi oyintziꞌ tuchꞌ, tzꞌul junt kacontr, nin iꞌtz yi ángel cwent Baybaꞌn, yi ajcaw tibaj yi tnum Grecia. Cyaꞌl jun na oc tan wuchꞌeyeꞌn yi na noꞌc tan oyintziꞌ scyeꞌj yi eꞌ incontraꞌtz, ntin cuꞌn Miguel, yi ángel yi wiꞌtz qꞌuicyꞌlom itetz, yi axwok xonl Israel,’ stzun yi ángel bantz.