Yi toqueꞌn Daniel tan nachleꞌn Kataj tibaj yi tanum
9
1 “Itzun bantz tul yi bajx yob yi na cawun tzaj Darío yi cyꞌajl Asuero yi aj Media squibaj yi eꞌ caldeo. Na tzun chintzan cunin wetz tan siꞌleꞌn yi liwr yi cweꞌn stzꞌibal Jeremías. 2 Nintzun noꞌctz tan xtxumleꞌn yi tonaꞌ tzꞌicyꞌ yi oxcꞌal tu lajuj yob caws yi at tibaj yi tnum Jerusalén, chi ntal Kajcaw tetz Jeremías, yi elsanl stziꞌ iꞌ.a 3 Yi jeꞌn intzꞌiꞌlol yi xtxolbilaꞌtz, nintzun noꞌctz tan nachleꞌn Ryos, yi Cawl ketz, nin tan cuꞌswutzil tetz iꞌ. Ja inmucꞌ weꞌj, nin ja oc yi beꞌchok yi na ẍchaj yi at na imbislej.b Nchaꞌtz ja chincuꞌ cꞌolchok tul tzaꞌj tan ẍchajleꞌn yi na chimbisun tan wil nin tan quil yi eꞌ in tanum. 4 Je tzun waleꞌj yi woqueꞌn tan nachleꞌn Kataj Jehová yi inRyosil:c‘Iluꞌ Cawl ketz, wiꞌnin ẍchamiluꞌ, nin wiꞌnin poreruꞌ, nin na el kꞌabuꞌ te cyakil yi na sukuꞌ. Nchaꞌtz na ẍchajuꞌ banluꞌ squibaj yi eꞌ yi na chipekꞌ teꞌjuꞌ, nin yi na chiban taneꞌn yi caꞌwluꞌ. 5 Taꞌ, max cꞌuꞌluꞌ skibaj. Na ja kajuch kil swutzuꞌ. Ja kaban eꞌchk takleꞌn cachiꞌ swutzuꞌ. Ja el xtxꞌixluꞌ kaꞌn. Ja el kꞌejuꞌ kaꞌn. Ja kapaj yi caꞌwluꞌ. Ja kakꞌ wutz kacoc te yi yoluꞌ, nin ja kakꞌ wutz kacoc te yi leyuꞌ. 6 Nchaꞌtz qui nin nkaban taneꞌn yi caꞌwluꞌ yi alijt cyen tanuꞌ scyetz yi eꞌ elsanl stziꞌuꞌ. Na sajleꞌn tunintz ja chitxol yi yoluꞌ scyetz eꞌ kareyil, scyuchꞌ eꞌ kajcawil, nin scyetz eꞌ kamam kateꞌ, scyuchꞌ cyakil cuꞌn eꞌ katanum yi oꞌ xonl Israel. Poro qui nin nkaban taneꞌn. 7 Yi iluꞌ teruꞌ taꞌ, iluꞌ Cawl ketz nin chin tzꞌaknak cuninuꞌ, na baꞌn cyakil yi na banuꞌ. Ma yi oꞌ ketz chin txꞌixwil nin kawutz. Kacyakil cuꞌn na katxꞌixwij swutzuꞌ, yi oꞌ yi najlchoꞌ lakak tnum kale elnakoꞌ tzaj lajuluꞌ tan paj yi nkajuch kil swutzuꞌ, scyuchꞌ yi eꞌ yi najlcheꞌ Jerusalén. Kacyakil cuꞌn na katxꞌixwij swutzuꞌ tuml yi eꞌ intanum, yi ateꞌ tzaj Jerusalén. 8 Siwl Taꞌ, yi iluꞌ Cawl ketz, max cꞌuꞌluꞌ skibaj na ja kajuch len kil swutzuꞌ nin na katxꞌixwij kacyakil cuꞌn scyuchꞌ yi eꞌ kareyil, scyuchꞌ yi eꞌ kajcawil nin yi eꞌ kamam kateꞌ. 9 Taꞌ, yi iluꞌ Cawl ketz, na el katxum tetz yi na el kꞌajabuꞌ skeꞌj, nin na cuyuꞌ kapaj, ptzunk na kajuch kil swutzuꞌ. 10 Poro mast cunin nkaban ketz, na qui nin nkaxom te yoluꞌ, nin qui nin nkoꞌc cꞌulutxum jakꞌ caꞌwluꞌ yi talnakuꞌ scyetz yi eꞌ ẍchakumuꞌ yi eꞌ elsanl stziꞌuꞌ. 11 Cyakil cuꞌn eꞌ intanum yi eꞌ xonl Israel ja cheꞌl te peꞌm na qui nin na chixom te yoluꞌ. Chaꞌstzun te ja nin kacuꞌ tkꞌab yi caws, yi tzꞌibaꞌnt cyen le ley Moisés.d Kapaj nin te keꞌtz na ja keꞌl te peꞌm. 12 Chaꞌstzun te ja el cuꞌnuꞌ te yi yoluꞌ yi talnakuꞌ scyetz kamam kateꞌ, na ja ul jun chin wutzileꞌn il skawutz. Qui otoj na bajij jun eꞌchk takleꞌn beneꞌn tziꞌn wi munt, chi taneꞌn yi juneꞌj yi mbajij teꞌj Jerusalén. 13 Tan yi xtxolbileꞌj ja el cuꞌn te cyakil yi tzꞌibaꞌnt cyen le ley Moisés. Poro yi oꞌ ketz qui nin ncuꞌ kawutz teruꞌ, nin quinin ncyaj cyen cyakil yi eꞌchk takleꞌn cachiꞌ yi na kaban, na oꞌ cuꞌn pajol caꞌwl. 14 Chaꞌstzun te ja ul yi jun kacawsaꞌtz tanuꞌ. Ej nin baꞌn mbanuꞌ yi ntakꞌuꞌ kacaws.
15 ’Ma jaluꞌ bin Taꞌ, iluꞌ Cawl ketz, nin na el intxum tetz yi na el kꞌajabuꞌ te yi tanumuꞌ, chi banakuꞌ tan cyelseꞌneꞌl tzaj Egipto.e Ej nin tan yi xtxolbilaꞌtz ja jal wiꞌnin kꞌejuꞌ sajleꞌn tunintz. Poro yi oꞌ ketz taꞌ, iẍnin oꞌ ketz tan juchleꞌn kil swutzuꞌ. 16 Taꞌ iluꞌ yi Cawl ketz, ej nin chin tzꞌaknak cuninuꞌ na na el kꞌabuꞌ te yoluꞌ. Ma jaluꞌ bin cuyeꞌuꞌ kapaj. Bneꞌuꞌ pawor yi quiꞌk chiꞌch mas cꞌuꞌluꞌ skeꞌj, nin te Jerusalén. Na yaꞌstzun yi teruꞌ tanumuꞌ, nin yaꞌstzun yi juꞌwtz yi chin xan nin yi jatxijt tanuꞌ tan xconeꞌn teruꞌ. Cyakil cuꞌn yi eꞌ mas nación na chiꞌch len chicꞌuꞌl te Jerusalén. Ej nin na chitzan tan yolcheꞌn yi quiꞌc xac yi tanumuꞌ. Poro yi mero bintzi, iꞌtz tan ketz kapaj, nin chipaj yi eꞌ kamam kateꞌ, yi na tzan telseꞌn kꞌej Jerusalén. 17 Chaꞌstzun te taꞌ, yi iluꞌ Cawl ketz, tbiteꞌuꞌ intziꞌ inkul. Nink tzꞌel kꞌajabuꞌ te yi caꞌluꞌ yi cuꞌnak woqꞌuiꞌn, bantz jaleꞌn yi teruꞌ kꞌejuꞌ. 18 Siwl taꞌ, elk bin kꞌajabuꞌ sweꞌj, nin elk kꞌajabuꞌ te yi tanumuꞌ yi at biꞌuꞌ teꞌj. Xmayink tzajuꞌ skeꞌj, yi oꞌ yi elnakoꞌ tunin xit. Nin xmayink tzajuꞌ te yi tanumuꞌ yi cuꞌnak wocꞌ. Qui na injak yi xtxolbileꞌj tan tuꞌ yi quiꞌk ketz kil. Ma na tan tuꞌ yi banl talmaꞌuꞌ skibaj.f 19 ¡Kajcaw! ¡Koꞌ ẍchꞌeyajuꞌ! Tbiteꞌuꞌ yi intziꞌ inkul. Cuyuꞌ kapaj. Tbit tzajuꞌ inyol. Bneꞌuꞌ chan yi xtxolbileꞌj bantz jaleꞌn kꞌejuꞌ tu yi kꞌej yi teruꞌ tanumuꞌ. Koꞌ ẍchꞌeyajuꞌ bin taꞌ. Quiꞌk tzꞌampon tiemp tan stzaꞌweluꞌ yi na chintzan tan jakleꞌn teruꞌ,’ chinch tul in oración.
Yi oxcꞌal tu lajuj sman
20 ”Ja imban seguir tan nachleꞌn Kataj, nin tan xtxoleꞌn cyen yi wil tetz Ryos, tu yi quil yi eꞌ intanum. Nchaꞌtz ja cuꞌ inwutz tetz tan jakleꞌn banl tibaj yi tetz wiꞌwtz yi wiꞌnin xanil. 21 Te yi na chintzan tan nachleꞌn Kataj, nintzun ul xicyꞌin yi ángel Gabriel sweꞌj. Yi jun Gabrielaꞌtz iteꞌn nin iꞌaꞌtz yi jun yi nsken jilon swetz. Txant tan tponeꞌn yi oril tan pateꞌn yi oy tetz Ryos yi na pat-xij lakak cweꞌn kꞌej yi ẍchajol tib yi jun ángelaꞌtz tzinwutz. Itzun taltz swetz:
22 ‘Ibin jaluꞌ Daniel ja nuꞌl tan talcheꞌn yi mbi na tzan Ryos tan xtxumleꞌn tibaj atanum. 23 Na yi ncẍoꞌc tan nachleꞌn Kataj, ja tbit Ryos yi atziꞌ yi akul. Chaꞌstzun te ja chinsaj ẍchakoltz tan xtxoleꞌn tzatz yi tonaꞌ sbajok yi eꞌchk takleꞌn quib yi majak, na wiꞌnin na pekꞌ Ryos tzaweꞌj. Bit tzaj bin yi xtxolbileꞌj yi swaleꞌ tzatz:
24 ’Ja bixeꞌ oxcꞌal tu lajuj sman tan Ryos tan ticyꞌeꞌn squibaj ara atanum, tu yi tnum yi chin xan nin. Yil jepon tamp yi jun tiempaꞌtz kalenaꞌs tzun tzꞌocopon Ryos tan makleꞌn yi pajol caꞌwliꞌn tu yi juchleꞌn il. Sjalok cuybil ipaj nin scuylok iyaꞌpl.g Nin sjalok balaj xtisyaꞌ tetz ben kꞌej ben sak.h Na yaꞌs tzun yi tiemp yil tzꞌel cuꞌn te yi eꞌchk wutzicyꞌ, tuml yi eꞌchk yol yi alijt cyen tan Ryos scyetz yi eꞌ elsanl stziꞌ iꞌ. Nchaꞌtz yi temploi, yi caꞌl Ryos, xansok junt tir.
25 Tajweꞌn yil tzꞌel atxum tetz, nin yil tzꞌaꞌtij le awiꞌ yi xtxolbileꞌj: Yil tzꞌel yi ort tan banleꞌn baꞌn tetz Jerusalén, tajweꞌn tan ticyꞌeꞌn juk sman. Ej nin tul yi juk smanaꞌtz snucꞌxok yi beꞌ tu yi tapij yi at solteꞌj Jerusalén. Poro wiꞌnin bis oꞌkl sbajok tul yi tiempaꞌtz. Ej nin jalen yil tzꞌul yi wiꞌtz ajcaw yi bixbaꞌnt tan Ryos tajweꞌn tan ticyꞌeꞌnt oxcꞌal tu cobt sman.
26 Yil tzꞌicyꞌ yi oxcꞌal tu cob smanaꞌtz, quil cyakꞌ wunak kꞌej yi jun wiꞌtz ajcawaꞌtz yi xansaꞌnt, na copon biyij. Xitok yi tnum Jerusalén tu yi templo cyakꞌun yi eꞌ sanlar jun rey yil tzꞌocpon. Yi jun ilaꞌtz jalt cuntunin quil yil xeꞌtij, chi na ban jun tzanlaꞌ yi na eluꞌl yi quiꞌc stziblal. Ej nin quil tzaj yi eꞌchk ilaꞌtz tu eꞌchk oyintziꞌ jalen yil jepon tamp te yi tiemp yi bixbaꞌnt.j
27 Na yil tzꞌicyꞌ yi oxcꞌal tu beluj smanaꞌtz tzꞌul junt sman. Nin yil xeꞌtij yi wiꞌtzbil smanaꞌtz tzꞌocopon yi jun reyaꞌtz tan banleꞌn jun contrat scyuchꞌ wiꞌnin wunak. Poro yil nicyꞌan yi jun smanaꞌtz jepon xtxꞌixpul iꞌ yi tajtzaꞌkl tu yi contrat, na tan caꞌwl iꞌ stanek cyakil eꞌchk txꞌixwatz yi na pat-xij cyakil kꞌej tu eꞌchk oy yi na akꞌlij tetz Ryos.k Nin copon nucꞌul iꞌ jun tajtzaꞌkl yi chin xoꞌwbil nin, kale na pat-xeꞌt eꞌchk txꞌixwatz swutz Ryos. Yaꞌstzun sbneꞌ iꞌ jalen cuꞌn yi tzꞌul yi tiemp yi bixbaꞌnt tan Ryos tan toqueꞌn cawseꞌn iꞌ,’ stzun yi ángel bantz swetz.”