Yi witzcyꞌal Daniel yi chiw tu cneruꞌ
8
1 “Itzun bantz tul yi toxiꞌn yob yi na cawun tzaj Belsasar tibaj Babilonia, at tzun jun inwutzicyꞌ bantz, yi in Daniel. Apart yi jun inwutzicyꞌaꞌtz swutz yi eꞌ yi nsken wil. 2 Yi wil tul yi inwutzicyꞌaꞌtz, iꞌtz yi iẍcunin choꞌn atin stziꞌ yi tzanlaꞌ yi na biꞌaj Ulay le tnum Susa cwent Elam. 3 Te yi atin stziꞌ yi jun tzanlaꞌaꞌtz nintzun ben wilol jun chin cneꞌr yi bak wiꞌ yi at stziꞌ yi jun aꞌaꞌtz. Yi jun cneꞌraꞌtz at tzun cob tucꞌ yi chin tkan nin, poro at jun scyeri yi cob tucꞌaꞌtz yi wiꞌtzbiltlen jaleꞌn. Ej nin mas tcuꞌn ẍchꞌuyeꞌn swutz yi junt. 4 Nchaꞌtz wil yi jun cneruꞌaꞌtz yi na tzan tan tocoꞌn toqueꞌn tziꞌn, jeꞌn tziꞌn, nin cweꞌn tziꞌn. Cyaꞌl nin tzun jun txuc na nimsaj tib tan oyintziꞌ tuchꞌ. Na quiꞌc nin jun najk clax tkꞌab, na wiꞌnin ẍchamil. Nin na ban yi tetz tajbil quib yi na taj, na wiꞌnin tunin jaleꞌn mas ẍchamil.5 ”Itzun bantz, tzinwutz cunin tzun yi sajeꞌn jun chin wutzileꞌn chiw toqueꞌn tziꞌn. Elnak nin iꞌ tcyaꞌj yi telemuleꞌn. Pentlen tunin tzun na copon yi wi tkan wuxtxꞌotxꞌ tan biꞌl chin ojkeꞌl yi at cuꞌnt. Ej nin txoꞌl yi wutz at jun tucꞌ. 6 Yi tuleꞌn yi jun chiwaꞌtz te yi cneꞌr yi at nintz stziꞌ yi aꞌ, nintzun ben bnol tibtz tu cyakil yi walor tan tocleꞌn yi cneꞌr. 7 Chin kꞌuchij cunin tzun sajeꞌn yi cob tucꞌ tal cneꞌr taꞌn. Na qui tunin kꞌusij ban yi walor yi tal cneꞌr swutz yi jun chin wutzileꞌn chiwaꞌtz. Chin toliꞌn nintzun tulejtz wuxtxꞌotxꞌ nin baj yakꞌpultz na cyaꞌl nin jun ncolon tkꞌab.
8 ”Itzun yi jun chiwaꞌtz mast cunin tzun ẍchamil jaltz. Poro tul yi jun tiempaꞌtz yi jaleꞌn mas ẍchamil ninin el bukꞌx yi jun chin tucꞌaꞌtz yi at txol yi wutz. Kale eleꞌt bukꞌx yi jun chin tucꞌaꞌtz, cyaj cuꞌn tzun xel jaltz. Yi cyaj tucꞌaꞌtz cyaj xtxꞌuꞌc eꞌ eleꞌt. Jun na ẍchaj nin jeꞌn tziꞌn. Ej nin junt na ẍchaj nin teleꞌn tziꞌn. Ma yi junt, choꞌn na ẍchaj nin toqueꞌn tziꞌn, nin yi wiꞌtzbil choꞌn na ẍchaj nin cweꞌn tziꞌn. 9 At tzun junt neꞌẍ tucꞌ jaltz te jun scyeri yi cyajaꞌtz nin mast cunin tzun ẍchꞌuyeꞌntz cweꞌn tziꞌn, teleꞌn tziꞌn, nin nchaꞌtz bantz le yi amaꞌl yi na biꞌaj Chin Yubeꞌn Nin. 10 Yi jun tucꞌaꞌtz ẍkꞌoquenleꞌn jal wiꞌnin ẍchamil, jalen cuꞌn yi toqueꞌn iꞌ tan oyintziꞌ scyeꞌj yi eꞌ sanlar cwent tcyaꞌj. Ej nin wiꞌnin txꞌuml saj masol,a nin baj yakꞌpultz. 11 Ej nin ja quiwix yi cꞌuꞌl jalen cuꞌn yi njal walor tan toqueꞌn tan oyintziꞌ tuchꞌ yi mero wiꞌtz Ajcaw scyetz yi eꞌ sanlar tetz tcyaꞌj. Ej nin iꞌ ntzajsan yi jun oy yi na akꞌlij tetz Ryos cyakil nin kꞌej. Nin ja oc tan telseꞌn kꞌej yi amaꞌl yi wiꞌnin xanil. 12 Na choꞌn cyaꞌteꞌn yi eꞌ tetz sanlar tul yi jun amaꞌlaꞌtz yi wiꞌnin xanil.b Yaꞌstzun tulejtz tan tuꞌ yi yab ajtzaꞌkl yi oc le wiꞌ. Ja ban yi tetz tajbil, na ja bnix wiꞌnin eꞌchk takleꞌn cachiꞌ taꞌn. Nin cyakil yi nxtxum, ja xcyeꞌ iꞌ teꞌj.
13 ”Beneꞌn tzun witaltz yi beneꞌn jakol jun ángel tetz junt ángel. Itzun taltz: ‘At jun takleꞌn yi chin juntlen nin yi na tzan banleꞌn wi yi altar kale na pat-xeꞌt yi eꞌchk oy yi na akꞌlij tetz Ryos cyakil kꞌej. ¿Tonaꞌ tzun tzaj wiꞌ yi jun yab ajtzaꞌklaꞌtz? Nchaꞌtz ¿tonaꞌ tzꞌoc cawseꞌn yi junaꞌtz yi na tzan tan banleꞌn yi eꞌchk takleꞌn cachiꞌaꞌtz teꞌj Ryos, nin scyeꞌj yi eꞌ yi na xom chiwiꞌ teꞌj?’ stzun yi ángel tetz yi junt. Sajeꞌn tzun tlol yi junt. Itzun taltz: 14 ‘Quil taneꞌ jalen yil jepon cob mil tu ox cient kꞌej. Ej nin kalenaꞌs tzun tzꞌoc xanseꞌn junt tir yi amaꞌl yi chin xan nin.’
15 ”Ej inin tzun na chintzan wetz tan xmayeꞌn yi eꞌchk xtxolbilaꞌseꞌj, nin tan xtxumleꞌn yi mbi na elepont, yi jeꞌn joptuj jun tzinwutz yi icunin jun yaj taneꞌn. 16 Nintzun ben wital wiꞌ jun wunak yi na jilon. Choꞌn na jilon tzaj stzi tzanlaꞌ yi na biꞌaj Ulay. Nintzun saj tloltz: ‘Gabriel,c txolnin tetz yi jun yajeꞌj yi mbi na elepont yi jun wutzicyꞌ yi ntil,’ stzun yi junaꞌtz.
17 ”Sajeꞌn tzun ẍkansal tib yi jun ángelaꞌtz sweꞌj. Nin tan biꞌl yi xoꞌw yi atin cuꞌnt, incweꞌn tzun mejloktz swutz iꞌ, jalen cuꞌn yi cweꞌn poneꞌn wutz implaj wuxtxꞌotxꞌ. Poro nin saj tlol iꞌ swetz: ‘¡Yaj! nink cẍnachon teꞌj cyakil yi xtxolbil yi mawil, na iꞌtz yi mbi sbajok te yi wiꞌtzbil tiemp tzoneꞌj wi munt.’
18 ”Te yi na tzan iꞌ tan xtxoleꞌn swetz ja el incꞌuꞌl, nin ja chincuꞌ trimp wuxtxꞌotxꞌ, nintzun tzajeꞌn iꞌ-tz tan intxicbajeꞌn. Itzun taltz swetz:
19 ‘Ma jaluꞌ nocopon tan xtxꞌolcheꞌn xoꞌl yi mbi na elepont yi jun wutzicyꞌ yi mawil. Cyakil cuꞌn yi eꞌchk takleꞌn yi mawil, yaꞌstzun sbajok le wiꞌtzbil tiemp, yil ticꞌsaj Ryos cꞌuꞌl scyeꞌj cyakil wunak.
20 ’Ma yi jun cneruꞌ yi mawil yi at cob tucꞌ, na ẍchaj yi cob ajcaw tetz Media tu Persia. 21 Ma yi jun chiw yi saj toqueꞌn tziꞌn, na ẍchaj yi ajcaw tetz Grecia. Ej nin yi jun tucꞌ yi at txoꞌl yi wutz yi jun chiwaꞌtz na ẍchaj yi bajx ajcaw yi scawunk. 22 Ej nin yi cyajt tucꞌ yi eꞌ jal yi teleꞌn yi jun, na ẍchaj yi ẍchijalok cyaj ajcaw yi ẍchijatxeꞌ yi jun naciónaꞌtz ẍchiwutz. Poro quil jepon yi cyetz chichamil tan cawuꞌn chi mban yi bajx.
23 ’Nin yil jepon yi chitiemp yi cyajaꞌtz tan cawuꞌn, nin yil jal wiꞌnin quil wunak swutz Ryos yi quiꞌt nin scuy iꞌ chipaj, kalenaꞌs tzun tzꞌoc cyen junt ajcaw yi chin juntlen nin iꞌ, nin wiꞌnin tajtzaꞌkl sbneꞌ tan cawuꞌn.
24 Yi junaꞌtz sjalok wiꞌnin ẍchamil tan cawuꞌn, poro nkꞌeꞌtz tetz cuntuꞌ yi ẍchamil. Ej nin tan yi ẍchamil yi junaꞌtz tzꞌocopon iꞌ tan poꞌtzeꞌn cyakil cuꞌn eꞌchk takleꞌn. Xcyek iꞌ scyeꞌj yi eꞌ ajcaw yi at wiꞌnin chichamil. Nchaꞌtz xcyeꞌ iꞌ te wiꞌnin tanum Ryos.
25 Tan yi tetz tajtzaꞌkl yi chin cachiꞌ nin, nin tan yi eꞌchk laꞌjil, xcyek tan cambajeꞌn wiꞌnin kꞌej. Ej nin tan yi tajtzaꞌklaꞌtz stocseꞌ tib nim. Ej nin wiꞌnin wunak yi choꞌn lkꞌukeꞌ chicꞌuꞌl teꞌj ẍchiquimok taꞌn.d Nchaꞌtz tzꞌocopon iꞌ tan oyintziꞌ te yi wiꞌtz Kajcaw yi at jalen tziꞌn tcyaꞌj. Poro quil xcyeꞌ teꞌj, ma na sloꞌonk taꞌn.
26 ’Ma yi xtxolbil yi sbajok tul yi cob mil tu ox cient kꞌej yi mawil iꞌtz jun xtxolbil yi jun cuꞌn sbajok, iꞌtz jun xtxolbil yi bintzi nin. Nin yil tzꞌel tiemp tzꞌelepon cuꞌn teꞌj, col cuꞌn yi eꞌchk xtxolbilaꞌtz, nin cyaꞌl tzawal nint,’ stzun yi ángel bantz swetz.
27 ”Yi wital yi xtxolbileꞌj, ninin tzun inyobteꞌn wetz. Nin quiꞌct nin inwalor bantz tetz cobox kꞌej. Yi tuleꞌn muꞌẍ yos swuchꞌ, nin noꞌc junt tir xlaj yi rey tan banleꞌn taneꞌn yi wetz wakꞌun. Poro wiꞌnin tzun imbisuneꞌntz tan yi jun inwutzicyꞌaꞌtz yi nwil, na qui nin el intxum tetz yi mbi na elepont,” stzun Daniel bantz.