Daniel 7

Yi cyaj txuc yi til Daniel tul wutzicyꞌ taneꞌn

1 Itzun bantz te yi at tzaj yi rey Belsasar tan cawuꞌn Babilonia. At tzun cobox wutzicyꞌ Daniel ban. Toqueꞌn tzun iꞌ tan stzꞌibeꞌn cuꞌn yi xeꞌ yi eꞌchk takleꞌn yi til tul yi wutzicyꞌaꞌtz. Je tzun yi stzꞌib iꞌeꞌj:

2 “Ja wil tul inwutzicyꞌ yi nchisaj yi cyaj tojkbil cyekꞌekꞌ yi at lakak xtxꞌuꞌc munt tan ẍchekꞌeꞌn yi mar. 3 Ej nin te yi jun rataꞌtz, ja wil cyaj txuc yi chin xoꞌwbil nin eꞌ. Choꞌn chijeꞌn tzaj xe mar. Apart len chiyubil. 4 Yi bajx yi jeꞌn tzaj, icunin jun león. Poro apart, na at xicyꞌ chi taneꞌn qꞌuil qꞌuitx. Te yi na chintzan tan xmayeꞌn nin, nintzun el kꞌokij yi xicyꞌ. Nintzun je xitxꞌijtz tan jeꞌn txiclok tibaj yi cob tkan, chi na ban jun yaj. Ej nin ja txꞌixpuj yi tajtzaꞌkl tan toqueꞌn tetz tajtzaꞌkl jun yaj.

5 ”Ma yi caꞌp icunin jun oso taneꞌn. Nim tcuꞌn jun jalaj xlaj swutz yi junt. Ej nin jacuꞌn ox tembl bak taꞌn. Nintzun aꞌlchij tetz yi jun txucaꞌtz: ‘Ma jaluꞌ, ¡Quiloꞌk! Cun bajsweꞌ cyakil jilwutz chiꞌbaj yi na awaj,’ stzun uꞌlijtz.

6 ”Ma yi toxiꞌn, icunin jun leopardo taneꞌn. Poro apart, na cyaj cuꞌn xicyꞌ iꞌ at. Nchaꞌtz cyaj cuꞌn wiꞌ iꞌ at. Nintzun akꞌlij amaꞌl tetz tan cawuneꞌn.

7 ”Ma yi cyajiꞌn txuc mas tcunin xoꞌwbil ẍchiwutz yi oxt yi ncheꞌ wil. Nin wiꞌnin ẍchamil, na chin quikan nin yi teꞌ, nin chin chꞌichꞌ cuꞌn. Nintzun oc iꞌ-tz tan wakꞌeꞌn nin tan chibajseꞌn yi contr. Ma yi nsken wiꞌt noj cꞌuꞌl nintzun octz tan yakꞌpeꞌn yi sowril. Yi jun txucaꞌtz apart iꞌ ẍchiwutz yi oxt yi nsken wil, na lajuj cuꞌn tetz tucꞌ at.

8 ”Te yi na chintzan tan xmayeꞌn nin yi eꞌchk tucꞌ yi jun txucaꞌtz, ja wil yi jeꞌn muleꞌn jun tal juy tucꞌ ẍchixoꞌl yi lajujaꞌtz. Nintzun el kꞌokij ox tucꞌ te yi eꞌ yi ateꞌ nintz, tan jaleꞌn amaꞌl tan ẍchꞌuyeꞌn iꞌ tetz. Ej nin yi jun tal tucꞌaꞌtz, at wutz chi taneꞌn wutz jun yaj. Ej nin at stziꞌ chi taneꞌn stziꞌ jun yaj. Nin chin xoꞌwbil nin yi eꞌchk yol yi na eltzaj le tziꞌ.

Yil tzꞌoc Ryos tan xtisyaꞌiꞌn

9 ”Na nin tzun chintzantz tan xmayeꞌn yi xtxolbilaꞌseꞌj yi beneꞌn wilol yi nucꞌxeꞌn cobox cꞌolchbil chi taneꞌn cꞌolchbil jun wiꞌtz ajcaw. Nin tibaj jun scyeri yi eꞌchk cꞌolchbilaꞌtz wil yi cꞌoleweꞌn cuꞌn jun Wutzileꞌn Tijl Cꞌuꞌlal yi at nintz sajleꞌn tunintz. Chin sak nin yi beꞌch tetz, chi taneꞌn skojal kꞌab cheꞌw. Ma yi xiꞌil wiꞌ icunin skojal mojob taneꞌn. Kꞌakꞌ cuꞌn yi jun cꞌolchbilaꞌtz, tuml yi eꞌchk toloꞌil.

10 Nchaꞌtz swutz cuꞌn yi jun cꞌolchbilaꞌtz at jun chin tzanlaꞌ yi na el tzaj yi kꞌakꞌ cuꞌn. Ej nin wiꞌnin eꞌ ateꞌ-tz tetz xconsbeꞌtz yi jun ajcawaꞌtz. Jat loꞌ mil chixoneꞌn. Nchaꞌtz jat loꞌ millón txiclcheꞌ swutz iꞌ. Cꞌoleweꞌn nintzun ban iꞌ-tz tan pujleꞌn xtisyaꞌ. Ej nin je jakij yi eꞌchk liwr swutz.

11 ”Ma yi in wetz, cꞌabchin quen tunin tan xmayeꞌn yi mbi cuꞌn sbajok te yi tal neꞌẍ tucꞌaꞌtz, na chin xoꞌwbil nin yi eꞌchk takleꞌn yi na tal. Ej nin beneꞌn wilol yi cweꞌn biyij yi jun txucaꞌtz. Chin puchꞌij cunin ban, nin choꞌn beneꞌn joꞌliꞌntz tkꞌakꞌ. 12 Nchaꞌtz yi oxt txuc. Nsken el ticyꞌleꞌn yi caꞌwl chikꞌab tan quiꞌt chicawuneꞌn. Poro qui nin eꞌ cuꞌ biyij, jalen yi toponeꞌn yi oril tan chiquimeꞌn.

13 ”Nchaꞌtz te iteꞌn nin akꞌbalaꞌtz wil tul junt inwutzicyꞌ taneꞌn yi cweꞌn tzaj jun yaj tul sbakꞌ, icunin yi Bajx Cyꞌajol. Quenin tzun beneꞌn ticyꞌleꞌn iꞌ-tz te yi jun Wutzileꞌn Tijl Cꞌuꞌlal yi cꞌolchij tan cawuꞌn.

14 Yi toponeꞌn iꞌ swutz yi wutzileꞌn, nintzun akꞌlij caꞌwl tkꞌab tu yi tetz kꞌej. Nin akꞌlij amaꞌl tetz tan cawuneꞌn tibaj cyakil amaꞌl beneꞌn tziꞌn wi munt. Na cyakil jilwutz wunak tu cyakil nación, eꞌ octz jakꞌ caꞌwl iꞌ. Quiꞌc mban alchok jilwutz yolil nchiyol. Ej nin yi jun ajcawaꞌtz scawunk tetz ben kꞌej ben sak. Cyaꞌl jun yi nink xcyeꞌ tan majleꞌn len yi caꞌwl tkꞌab.

15 ”Itzun imban westz yi in Daniel. Ja chinxob tan yi xtxolbileꞌj yi nwil, nin wiꞌnin imbisuneꞌntz taꞌn. 16 Nintzun noꞌc inẍkansal wib xlaj jun scyeri eꞌ yi txiclcheꞌ-tz. Nin ben injakol tetz, yi mbi na elepont yi eꞌch takleꞌn yi nwil. Nintzun tal iꞌ swetz: ‘Je bin yi na eleponteꞌj: 17 Yi cyaj txuc yi mmawil, yi chin xoꞌwbil nin eꞌ, iꞌtz jun elsawutzil tetz cyaj ajcaw, nka cyaj rey yi ẍchicawunk tibaj cyakil amaꞌl beneꞌn tziꞌn wi munt. 18 Poro tzꞌelpon majij yi caꞌwl ẍchikꞌab nin tzꞌakꞌlok scyetz yi eꞌ xansaꞌn cheꞌt tan yi Ryos yi bintzi nin teꞌtz. Ej nin ẍchicawunk cyeꞌtz tetz ben kꞌej ben sak,’ stzun yi junaꞌtz bantz.

19 ”Woqueꞌn tzun chꞌinchꞌuj tan jakleꞌn yi mbi na elepont yi cyajiꞌn txucaꞌtz, na apart iꞌ ẍchiwutz yi oxt, na chin xoꞌwbil nin wutz, nin chin quikan nin yi teꞌ yi chꞌichꞌ cuꞌn. Nchaꞌtz yi pacꞌ, brons cuꞌn. Baj poꞌtzal nin baj puchꞌul cyakil wunak. Ma yi sowril nin baj yakꞌpultz. 20 Poro yi mero wajbil iꞌtz, tan teleꞌn kloꞌ intxum tetz yi mbi ekaꞌn tan yi lajuj tucꞌ yi jun txucaꞌtz. Nin nchaꞌtz yi mbi na elepont yi jun tal neꞌẍ tucꞌ, yi at tetz wutz nin at tetz stziꞌ taneꞌn, nin yi na tocsaj tib nim tu yi jilon. Tan yi xtxolbilaꞌs iẍcunin iꞌ yi mas at kꞌej ẍchiwutz yi eꞌ mas tucꞌ, na ox cuꞌn tucꞌ eꞌ el kꞌokij tan cyajeꞌn cyen yi amaꞌl tan ẍchꞌuyeꞌn iꞌ tetz. 21 Ej nin ja ben wilol yi toqueꞌn yi jun tucꞌaꞌtz tan oyintziꞌ te yi tanum Ryos. 22 Ej nin txꞌacon iꞌ scyeꞌj, jalen yi tuleꞌn yi Wutzileꞌn Tijl Cꞌuꞌlal yi at nintz sajleꞌn. Iꞌ tzun akꞌon nin yi caꞌwl ẍchikꞌab yi eꞌ xansaꞌncheꞌt, yi eꞌ yi na cyocsaj yi iꞌ yi Ryos yi bintzi nin teꞌtz. Eꞌ oc tzuntz tan cawuꞌn wi munt. Na oponeꞌn ban yi tiempil tan ticyꞌeꞌn caꞌwl chikꞌab yi eꞌ tetz tanum.

23 Talol tzun yi junaꞌtz yi oc inẍansal wib teꞌj: ‘Ma yi cyajiꞌn txuc yi mmawil, yaꞌstzun yi cyajiꞌn ajcaw sbneꞌ beneꞌn tziꞌn wi munt. Xcyek tan cyocseꞌn cyakil gobierum jakꞌ caꞌwl iꞌ, nin tzꞌocopon tan chibuchleꞌn. Sbajk yakꞌpul cyakil yi eꞌ tetz contr, na apart tajtzaꞌkl iꞌ ẍchiwutz yi eꞌ mas txuc.

24 Ej nin yi lajuj tucꞌ yi jun txucaꞌtz yi mmawil, na ẍchaj lajuj ajcaw yi ẍchicawunk beneꞌn tziꞌn wi munt. Poro yi cyetz, muꞌẍ ntziꞌ tiemp ẍchibneꞌ tan cawuꞌn. Nin yil jepon tamp yi cyetz chitiemp tan cawuꞌn, tzꞌocopon junt tan cawuꞌn yi apart tajtzaꞌkl. Ej nin yi junaꞌtz xcyek tan cyelseꞌn ox scyeri lajuj ajcawaꞌtz.

25 Ej nin tzꞌocopon iꞌ tan jisleꞌn Kataj Ryos, yi Ryos yi bintzi nin teꞌtz. Nin tzꞌocopon tan chibiyleꞌn cuꞌn kloꞌ cyakil yi tanum Ryos. Ej nin tzꞌocopon iꞌ tan xtxꞌixpeꞌn eꞌchk caꞌwl Ryos nin tan sotzajeꞌn yi eꞌchk kꞌej yi bixbaꞌnt tan takꞌleꞌn kꞌej kaRyosil. Xcyeꞌ iꞌ tan banleꞌn yi tetz tajtzaꞌklaꞌtz tetz ox yob tu niꞌcy.

26 Yil jepon yi ox yob tu niꞌcyaꞌtz scꞌolek yi Kajcaw tan xtisyaꞌiꞌn. Tzꞌelepon majol yi caꞌwl tkꞌab yi jun ajcawaꞌtz nin tzꞌelepon cuꞌn yi junaꞌtz swutz.

27 Tzꞌakꞌlok yi caꞌwl tu yi kꞌej tetz cyakil yi eꞌchk amaꞌl beneꞌn tziꞌn wi munt scyetz yi eꞌ tanum Ryos, yi Ryos yi bintzi nin teꞌtz. Nin scawunk iꞌ tetz ben kꞌej ben sak. Cyakil cuꞌn jilwutz tnum scyakꞌeꞌ chimunl swutz iꞌ, nin chocopon cꞌulutxum jak yi tetz caꞌwl,’ stzun yi junaꞌtz bantz swetz.

28 ”Yaꞌstzun ban yi jun inwutzicyꞌaꞌtz. Ej nin ja takꞌ jun chin bis swetz nin wiꞌnin skejeꞌn intziꞌ tan paj. Poro qui nin wal yi xtxolbilaꞌseꞌj tetz junt,” stzun Daniel bantz.