Yi beneꞌn joꞌliꞌn Daniel ẍchixoꞌl león
6
1 Itzun bantz yi cyajeꞌn cyen Darío tetz rey cwent Babilonia nintzun xtxumtz tan jatxleꞌn cuꞌn cyakil yi tetz nación. Jun tzun cient tu junak departament ntulejtz. Nchaꞌtz bixeꞌ taꞌn tan cyoqueꞌn cyen jujun ajcaw le jujun luwaraꞌtz. 2 Nintzun eꞌ oc cyen ox wiꞌtz ajcaw taꞌn tan chimaꞌleꞌn cyajtzaꞌkl yi eꞌ mas ajcaw yi ko baꞌn na chicawun nka quiꞌ. Yaꞌstzun tulejtz bantz quil tzꞌakoneꞌn yi rey te yi meꞌbiꞌl. Ma Daniel iꞌ tzun jun ẍchixoꞌl yi ox wiꞌtz ajcawaꞌtz. 3 Jalcunin tzun lajluchaxeꞌn yi balajil Daniel tan cawuꞌn. Na mast cuꞌn list iꞌ ẍchiwutz yi cobt. Chaꞌstzun te xtxumul yi rey tan toqueꞌn cyen Daniel tetz wiꞌtz ajcaw tibaj cyakil Babilonia. 4 Cyoqueꞌn tzun cyakil yi eꞌ mas ajcaw tan joyleꞌn kloꞌ puntil tan xochleꞌn quen Daniel swutz yi rey. Poro cyaꞌl nin njaleꞌt paltil cyaꞌn. Na quiꞌc nin jun centaw najk talkꞌeꞌn nin chin tzꞌaknak cunin iꞌ tan cawuꞌn. Chaꞌstzun te quinin eꞌ xcyeꞌ tan xochleꞌn quen. 5 Cyoqueꞌn tzuntz chꞌinchꞌuj tan joyleꞌn puntil tan xochleꞌn quen kloꞌ Daniel. Itzun cyaltz: “Cyaꞌl nin na jaleꞌt paltilx kaꞌn na ja baj cunin kajoyol puntil tan xochleꞌn quen kloꞌ-x. Jaltaꞌtz kol kajoy puntil tan xochleꞌn quenx te yi na tocsajx,” cheꞌch tzun yi eꞌ ajcawaꞌtz bantz.6 I nin tzun cyulejaꞌtz. Chimolol tzun quib cyakil yi eꞌ ajcaw nin junit ban chitxumuꞌn tan chibeneꞌn tan yol tetz yi rey. Itzun yi cyoponeꞌn nintzun cyaltz: “¡Taꞌ iluꞌ kajcaw, nink ben ẍkon yi tiempuꞌ tetz ben kꞌej ben sak! 7 Taꞌ max cꞌuꞌluꞌ skibaj, na na kaj yil kal jun xtxolbil teruꞌ. Kacyakil yi oꞌ ajcaw tetz yi kanación, ja kamol kib tan xtxumleꞌn jun ley, nin ja bixeꞌ kaꞌn, tan cawuneꞌnuꞌ tan telseꞌn yi jun leyaꞌtz ẍchiwiꞌ cyakil wunak. Nin yi caꞌwl yi mbixeꞌ kaꞌn iꞌtz: Cyaꞌl jun yi nink mejeꞌ tan takꞌleꞌn kꞌej nka tan jakleꞌn ẍchꞌeybil tetz, tetz junt ryos nka tetz junt yaj, ma na ntin swutzuꞌ tajweꞌn tan chimejeweꞌn cuꞌn tan takꞌleꞌn kꞌejuꞌ. Yi jun leyaꞌtz yi ja wiꞌt bixeꞌ kaꞌn, iꞌtz tetz jun ntziꞌ xaw sbneꞌ. Ej nin ko at jun yil spaj yi jun caꞌwlaꞌtz, tajweꞌn tan beneꞌn joꞌliꞌn teraꞌtz ẍchixoꞌl león. 8 Chaꞌstzun te na kaj yil cawunuꞌ teꞌj, nink ltaluꞌ cuj sketz tan telseꞌn yi caꞌwlaꞌtz. Nin kol cuꞌ swutzuꞌ, baꞌn tzun cuꞌ yi wi kꞌabuꞌ teꞌj tan qui katxꞌixpul yi jun leyaꞌtz. Cawunkuꞌ chi yi caꞌwl yi at skaxoꞌl yi oꞌ aj Media tu Persia, yi cyaꞌl jun na xitun jun ley yi na bixeꞌ kaꞌn,”a cheꞌch tzun yi eꞌ ajcawaꞌtz bantz.
9 Nintzun cuꞌ yi jun xtxolbilaꞌs swutz yi rey. Cweꞌn tzun yi wi kꞌabtz teꞌj.
10 Itzun yi tbital Daniel yi nsken wiꞌt cujij yi rey tan telseꞌn yi jun caꞌwlaꞌtz nintzun ben iꞌ-tz tan nachleꞌn Kataj xe yi tetz caꞌl. Yi toponeꞌn nintzun jeꞌ jakol yi wentanuꞌil yi caꞌl, yi na xmayinin kale atit Jerusalén,b nintzun cuꞌ mejloktz stziꞌ yi wentanuꞌaꞌtz. Ej nin ox tir na mejeꞌ iꞌ-tz tan cꞌuꞌlajeꞌn Ryos le jun kꞌej,c na yaꞌstzun yi tetz cstumbr. 11 Itzun bantz nintzun eꞌ ben cobox yajtz tan xkꞌukeꞌn Daniel xe yi caꞌl. Na tzun tzan cunin iꞌ tan nachleꞌn Kataj yi cyoponeꞌn yi cobox yajaꞌtz. 12 Ma yi beneꞌn quilol yi yaꞌstzun na ban Daniel nintzun eꞌ bentz tan xochleꞌn iꞌ tetz yi rey. Itzun cyaltz yi cyoponeꞌn:
—Ma jaluꞌ taꞌ ja bin el jun ley tanuꞌ yi tetz jun xaw yi quiꞌc rmeril tan mejeweꞌn cuꞌn jun yaj swutz junt ryos nka swutz junt yaj. Ma na ntin swutzuꞌ tajweꞌn tan kamejeweꞌn cuꞌn. Nin yi jun yil mejeꞌ swutz junt ryos mben joꞌliꞌn teraꞌtz ẍchixoꞌl txuc. ¿Nkꞌeꞌtz peꞌ bintzi yi jun caꞌwleꞌj taꞌ?
—Bintzi, yaꞌstzun yi mero bintzi, nin chin tajweꞌn cunin yil tzꞌel cuꞌn teꞌj quib yi na tal yi ley, na quiꞌc rmeril tan jeꞌn katxꞌixpul nka tan katzajsal yi jun leyaꞌtz yi ja wiꞌt bixeꞌ kaꞌn, stzun yi rey bantz.
13 Itzun yi cobox yajaꞌtz oqueꞌn nintzun eꞌ bantz chꞌinchꞌuj tan xochoꞌn, itzun cyaltz:
—Poro taꞌ, at jun scyeri yi eꞌ judiy yi ulnakeꞌ tzoneꞌj yi qui na tek ẍchiꞌuꞌ,d na cyakil nin kꞌej na mejeꞌ iꞌ swutz yi tetz Ryosil. Yi junaꞌtz iꞌtz yi Daniel nin iꞌ jun scyeri yi eꞌ wiꞌtz ajcaw tibaj cyakil yi kanación. Yi oꞌ ketz ja kil yi cyakil nin kꞌej na mejeꞌ ox tir tan nachleꞌn yi tetz ryosil.
14 Yi tbital yi rey yi xtxolbileꞌj nintzun oc lacꞌpuj jun chin bis tetz. Ej nin octz tan joyleꞌn kloꞌ puntil tan claxeꞌn Daniel. Jun cuꞌn tzun kꞌej ban iꞌ-tz tan joyleꞌn puntil tan claxeꞌn kloꞌ. 15 Poro cyoponeꞌn tzun junt tir yi cobox yajaꞌtz tan talcheꞌn tetz yi rey, itzun cyaltz:
—Iluꞌ kareyil sak swutzuꞌ yi kacstumbr yi oꞌ aj Media tu Persia, quiꞌc rmeril tan stzajeꞌn jun caꞌwl yi ko cuꞌnakt yi wi kꞌab yi rey teꞌj. Ma na chin tajweꞌn cunin tzꞌel cuꞌn teꞌj.
16 Baj nintzun cꞌuꞌl yi rey, nin cawunintz tan ticyꞌleꞌn tzaj Daniel nin tan beneꞌn joꞌliꞌntz ẍchixoꞌl yi eꞌ león. Poro te yi ntaxk ben joꞌliꞌn nintzun tal yi rey tetz Daniel:
—¡Ma jaluꞌ Daniel, lok xcyeꞌ yi ara Ryosil yi nternin kꞌuklij acꞌuꞌl teꞌj, tan acolcheꞌn ẍchikꞌab yi eꞌ txuc! stzun yi rey bantz tetz Daniel.
17 Itzun yi nsken wiꞌt copon Daniel ẍchixoꞌl yi eꞌ txuc cawuneꞌn nintzun yi rey tan lamcheꞌn cuꞌn stziꞌ yi jul tan jun chin wutzileꞌn cꞌub. Ej nintzun ben iꞌ tan banleꞌn sellar tan yi tetz xmalkꞌab. Nchaꞌtz eꞌ ban yi eꞌ mas ajcaw yi xomcheꞌ-tz teꞌj. Na yi cyajbil iꞌtz tan teleꞌn cuꞌn teꞌj yi ley yi nsken wiꞌt bixeꞌ cyaꞌn. 18 Yi nsken wiꞌt lamxij yi jul nintzun pakxij yi rey xe yi tetz caꞌl kale na cawuneꞌt. Quiꞌt tzun wan iꞌ-tz tan paj bis. Nchaꞌtz quiꞌt cujij tan cyoqueꞌn yi eꞌ aj kbetzum tan tocseꞌn eꞌchk son swutz. Nin qui nin wit iꞌ-tz te yi jun akꞌbalaꞌtz tan paj yi bis yi at cuꞌnt teꞌj Daniel. 19 Pentlen tunin tzun xtxꞌajoltz yi tuleꞌn skil. Lajkeꞌl nintzun beneꞌn iꞌ-tz stziꞌ yi jul kale ateꞌt yi eꞌ txuc, tan xmayeꞌn Daniel. 20 Wiꞌnin tzun bisuneꞌntz yi toponeꞌn stziꞌ yi jul. Tech tlen tunin tzun toqueꞌntz tan ẍchakleꞌn Daniel. Itzun taltz:
—Daniel, Daniel, yi aẍ jun ẍchakum yi Ryos yi itzꞌ nin tetz. ¿Itzꞌ peꞌ aẍ? ¿Ja peꞌ xcyeꞌ yi ara Ryosil, yi nternin kꞌuklij acꞌuꞌl teꞌj, tan acolcheꞌn ẍchikꞌab yi eꞌ txuc? stzun yi rey ban cuꞌntz tjul.
21 —Iluꞌ kareyil nink ben ẍkon yi tiempuꞌ tan cawuꞌn. 22 Quil bisunuꞌ sweꞌj, na yi wetz inRyosil ja oc tan incolcheꞌn na ja saj ẍchakol yi tetz ángel tan makleꞌn chitziꞌ cyakil yi eꞌ leóne tan qui imbajeꞌn cyaꞌn. Na sak swutz inRyosil yi quiꞌc muꞌẍ wil. Nin quiꞌc jun eꞌchk takleꞌn cachiꞌ mimban swutzuꞌ, yi iluꞌ kareyil.
23 Ej yi tbital yi rey yi xtxolbileꞌj wiꞌnin tzun stzatzineꞌntz teꞌj. Lajkeꞌl nintzun cawunin iꞌ-tz tan telseꞌneꞌl tzaj Daniel ẍchixoꞌl yi eꞌ león. Ma yi teleꞌn tzaj quiꞌc nin muꞌẍ qꞌuixpnak teꞌj, na nternin kꞌuklij cꞌuꞌl iꞌ teꞌj yi tetz Ryosil. 24 Nchaꞌtz cawunin yi rey tan chitzꞌamleꞌn cyakil yi eꞌ yaj yi eꞌ oc tan xochleꞌn Daniel. Yi chitxꞌamxeꞌn nintzun eꞌ ben joꞌliꞌntz ẍchixoꞌl yi eꞌ txuc tuml quixkel nin cyakil chinitxaꞌ. Taxk nintzun chicweꞌnponeꞌntz ẍchixoꞌl yi eꞌ txuc yi chixeꞌteꞌn tan chibajseꞌn. Jalt nintzun yi chibakil cyaj cyentz.
25 Tan yi xtxolbileꞌj nintzun el junt caꞌwl tan yi rey Darío scyetz cyakil wunak beneꞌn tziꞌn. Ja opon len chikꞌab chicyakil. Quiꞌc na ban alchok jilwutz yolil na chiyol. Je na tal yi caꞌwleꞌj: “Na waj yil jal tzatzin paz tzixoꞌl wok, nin yil jal yi ibanl. 26 Na waj cyakil yi axwok yi atix wok jakꞌ incaꞌwl yil cxoꞌc wok tan banleꞌn taneꞌn yi jun caꞌwleꞌj, na in nneꞌlsan. Na waj yil tzitek wok ẍchiꞌ yi Ryos yi na tocsaj Daniel.
”Na iꞌ yi Ryos yi itzꞌ nin tetz, na at nin iꞌ sbneꞌ opon tunintz. Cyaꞌl jun nink xcyeꞌ tan telseꞌn yi caꞌwl tkꞌab, na quiꞌc stzajsbil wiꞌ yi tiemp iꞌ tan cawuꞌn.
27 Iꞌ yi aj colpinl, nin iꞌ yi colol ketz, na na xcyeꞌ tan banleꞌn balaj milawr. Quiꞌc na ban mpe tcyaꞌjk nka wuxtxꞌotxꞌ. Na Iꞌ ncolon Daniel ẍchikꞌab yi eꞌ león.”
Yaꞌstzun yi ley yi el tzaj tan yi rey.
28 Ma tetz Daniel iꞌ jun balaj ajcaw ban jakꞌ caꞌwl Darío. Nchaꞌtz ban iꞌ yi toqueꞌn cyen Ciro yi rey tetz Persia tan cawuꞌn Babilonia, ja jal wiꞌnin kꞌej Daniel swutz yi junt reyaꞌtz.