Yi yol yi tzꞌibxij wutz xan
5
1 Itzun bantz nintzun oc Belsasar chireyil yi eꞌ aj Babilonia tan banleꞌn jun chumbalaj waꞌaꞌn. Nintzun eꞌ opon jun mil xtxocum yi eꞌ cuꞌn wiꞌtz ajcaw. Te yi na chiwan wiꞌnin tzun win jeꞌ chicꞌajol. 2 Ma yi toqueꞌn aꞌ twiꞌ yi rey nintzun cawunintz tan ticyꞌleꞌneꞌl tzaj yi eꞌchk lak yi oro cuꞌn, tu sakal tan xconeꞌn scyetz. Yi eꞌchk lakaꞌtz Nabucodonosor ulsan Babilonia. Choꞌn sajeꞌn taꞌn le caꞌl Ryos jalen Jerusalén, nin oc tkꞌoltz le caꞌlil yi tetz ryosil. 3 Itzun yi tuleꞌn quicyꞌal yi eꞌchk lakaꞌtz, nintzun oc yi rey scyuchꞌ yi eꞌ wiꞌtz ajcaw tan xconseꞌn. Nchaꞌtz xcon cyakꞌun quixkel scyuchꞌ yi eꞌ mas xnaꞌn yi caꞌp quixkel tuꞌ quitaneꞌn. Nchaꞌtz ja xcon cyakꞌun cyakil yi xtxocum yi rey yi ateꞌ-tz. 4 Ja xcon eꞌchk lakaꞌtz cyaꞌn tan cꞌajleꞌn win tu xcꞌalaꞌ, tan takꞌleꞌn kꞌej chiryosil yi banij tuꞌ tan oro tu sakal, nin brons. Nchaꞌtz at yi banij tuꞌ tan tzeꞌ tu cꞌub.5 Itzun bantz te yi na chitzan tan xconseꞌn yi eꞌchk lakaꞌtz nintzun ẍchaj tib yi wiꞌ kꞌab jun yaj ẍchiwutz, nintzun octz tan stzꞌibeꞌn swutz yi xan. Lajluch cunin tzun bantz, na choꞌn toqueꞌn stzꞌibal xlaj yi eꞌchk cantil yi at nintz. 6 Ej itzun yi beneꞌn tilol yi rey yi jun wiꞌ kꞌabajaꞌtz, chin slakꞌlujt nintzun bantz tan xoꞌw, nin wiꞌnin lucneweꞌntz. 7 Chin wiꞌ nin tzun bantz tan chichakleꞌn yi eꞌ aj wutz mes, scyuchꞌ yi eꞌ nachol scyuchꞌ yi eꞌ aj txꞌuml yi ateꞌ-tz nakaꞌj. Itzun taltz:
—Alchok scyetz yil xcyeꞌ tan siꞌleꞌn, nin tan xtxꞌolcheꞌn xoꞌl yi yol yi ntzꞌibxij swutz xaneꞌj, swakꞌeꞌ wiꞌnin kꞌej. Nchaꞌtz swakꞌeꞌ balaj beꞌch tetz, chi tuchꞌ tetz jun rey. Nin swakꞌeꞌ jun balaj caren yi oro cuꞌn tan cweꞌn skul. Ej nin tzꞌocopon tetz toxiꞌn ajcaw tzinxlaj, stzun Belsasar bantz.
8 Cyoponeꞌn tzuntz cyakil yi eꞌ wiꞌtz nachol, nin cyakil yi eꞌ yi tzꞌaknak cuꞌn cyajtzaꞌkl, tan siꞌleꞌn kloꞌ yi yol yi ntzꞌibxij swutz xan. Poro cyaꞌl nin jun mmeꞌl xtxum tetz. 9 Yi tilol Belsasar, yi cyaꞌl nin jun el xtxum tetz, mas cunin tzun xobeꞌntz. Chin slakꞌlujt nin tzun bantz tan yi xoꞌw yi at cuꞌnt. Nchaꞌtz yi eꞌ mas ajcaw yi ateꞌ-tz, quiꞌt nin tzun pujx cyaꞌn yi mbi tajweꞌn tan chibnol.
10 At nin tzun yi xtxuꞌ yi rey nakaꞌjtz. Itzun yi tbital yi il yi na bajij nintzun bentz lajkeꞌl tan tilweꞌn yi tal. Ma yi tponeꞌn nintzun taltz tetz:
—Max cꞌuꞌluꞌ kareyil. Nink benk ẍkon yi tiempuꞌ tetz ben kꞌej ben sak. Poro qui tajweꞌn yil sotz cꞌuꞌluꞌ tan yi xtxolbileꞌj. 11 Na at jun yaj yi at jak caꞌwluꞌ tzoneꞌj Babilonia yi xomij yi espíritu Ryos teꞌj, yi Ryos yi wiꞌnin xanil. Na te yi na cawun tzaj yi tajuꞌ ja til iꞌ yi chin tzꞌaknak cuꞌn yi tajtzaꞌkl yi jun yajaꞌtz. Chaꞌstzun te toqueꞌn cyen iꞌ tetz bajx akꞌol tajtzaꞌkl yi tajuꞌ, na at mas tetz tajtzaꞌkl ẍchiwutz cyakil yi eꞌ nachol, ẍchiwutz eꞌ aj wutz mes, nin ẍchiwutz eꞌ wiꞌtz akꞌol ajtzaꞌkl, scyuchꞌ yi eꞌ aj txꞌuml. 12 Yi jun yajaꞌtz iꞌtz Daniel, poro yi tajuꞌ, ja oc tkꞌol yi biꞌ tetz Beltsasar. Chin list nin iꞌ tan xtxꞌolcheꞌn xoꞌl yi eꞌchk wutzicyꞌ nin tan pujleꞌn xoꞌl yi eꞌchk takleꞌn yi cyaꞌl junt na xcyeꞌ teꞌj. Ma jaluꞌ bin kareyil, nink benk mantaruꞌ tan ẍchakleꞌn iꞌ, na jun cuꞌn yol xcyek iꞌ tan siꞌleꞌn, nin tan xtxꞌolcheꞌn xoꞌl yi mbi na elepont yi yoleꞌj, stzun yi xtxuꞌ Belsasar ban.
13 Itzun yi toponeꞌn ticyꞌleꞌn Daniel swutz yi rey, nintzun octz tan jakleꞌn tetz:
—¿I peꞌ aẍaꞌtz yi Daniel, jun scyeri eꞌ judiy yi ulnakeꞌ pres tzoneꞌj tan kꞌajtzun intaj, Nabucodonosor?
—Iꞌ i inaꞌtz taꞌ, stzun Daniel bantz.
14 —Ja aꞌlchij swetz yi chin tzꞌaknak cunin aẍ, na xomij yi espíritu yi aRyosil tzaweꞌj. 15 Chaꞌstzun te na kloꞌ waj yil cẍoꞌc tan siꞌleꞌn yi eꞌchk yoleꞌj, nin tan talcheꞌn swetz yi mbi na elepont. Na ja chuꞌlak cyakil yi eꞌ wiꞌtz nachol yi chin tzꞌaknak cuꞌn eꞌ tan xtxꞌolcheꞌn kloꞌ xoꞌl swetz poro qui nin nchixcyeꞌ teꞌj. 16 I bin jaluꞌ kol cxcyeꞌ tan siꞌleꞌn nin tan xtxꞌolcheꞌn xoꞌl swetz, swakꞌeꞌ balaj beꞌchok tzatz yi niꞌcuꞌn tu tetz jun rey. Ej nin nchaꞌtz swakꞌeꞌ jun balaj caren yi oro cuꞌn tzatz tan cweꞌn stzakul. Nin cẍocopon waꞌn tetz yi toxiꞌn ajcaw tzoneꞌj le intanum, stzun rey tetz Daniel.
17 —Taꞌ, cyajk cyen tuꞌ yi eꞌchk oy yi na tzanuꞌ tan sukeꞌn swetz, na qui na waj yi eꞌchk oyaꞌtz. Baꞌn tcuꞌn takꞌeꞌuꞌ tetz junt. Poro quil bisunuꞌ na swaleꞌ yi mbi na elepont yi eꞌchk yol yi at swutz xaneꞌj.
18 ”Ma jaluꞌ, yi Ryosa yi itzꞌ nin tetz, iꞌ mmakꞌon amaꞌl tetz ataj, yi rey Nabucodonosor tan toqueꞌn cyen tan cawuꞌn. Nin tan iꞌ njaleꞌt wiꞌnin tetz kꞌej. 19 Tan tuꞌ yi caꞌwl yi akꞌlij tetz tan Ryos, tircuꞌn wunak beneꞌn tziꞌn wi munt ja cyek ẍchiꞌ iꞌ, nin ja cyakꞌlen kꞌej. Na ja ban iꞌ yi tetz tajbil, ja chiquim yi eꞌ yi na taj iꞌ tan chiquimeꞌn, nin ja chiclax yi eꞌ yi na taj iꞌ tan chiclaxeꞌn. Nchaꞌtz ja takꞌ iꞌ chikꞌej cobox nin ja el chikꞌej coboxt taꞌn. Choꞌn nxom te yi tajbil iꞌ. 20 Poro tan tuꞌ yi ntocsaj tib nim tu tajtzaꞌkl, nin tan tuꞌ yi chin tzeꞌtzuj nin ban talmaꞌ swutz Ryos, ja tzun el tcyꞌal Ryos yi caꞌwl tkꞌab. 21 Nchaꞌtz el lajuꞌn iꞌ ẍchixoꞌl wunak, nin octz chi taneꞌn txuc. Choꞌn najeweꞌn ẍchixoꞌl smaron txuc, nin chꞌim tuꞌ bajeꞌn taꞌn tetz waꞌ. Nin ja acꞌ cunin yi wankil tan kꞌab cheꞌw. Yaꞌstzun mbajij te tajuꞌ jalen yi tuleꞌn txꞌakx tcꞌuꞌl yi iꞌtz yi Ryos yi bintzi nin teꞌtz yi na cawun squibaj cyakil jilwutz wunak beneꞌn tziꞌn wi munt. Ej nin tan tuꞌ tetz tajbil na oc cyen eꞌ ajcaw yi na taj. 22 Sak cunin swutzuꞌ taꞌ yi mbi cuꞌn mbajij te yi tajuꞌ. Poro nchaꞌtz teruꞌ qui nin na tocsaj tibuꞌ juy. 23 Ma na na tocsaj tibuꞌ nim tu tajtzaꞌkluꞌ. Na ja el kꞌej Kajcaw kaRyosil tanuꞌ tan tuꞌ yi ncawunuꞌ tan xconseꞌn yi eꞌchk lakeꞌj yi sajnak le caꞌl Ryos jalen Jerusalén.b Nchaꞌtz ja xcon yi eꞌchk lakeꞌj cyanuꞌ tan tcꞌajleꞌn xcꞌalaꞌ nin tan takꞌleꞌn kꞌej yi eꞌchk chiryosiluꞌ yi banij tuꞌ taneꞌn, yi qui na chixmayin, nin qui na quibit jun eꞌchk takleꞌn, nin yi quiꞌc nin muꞌẍ cyajtzaꞌkl. Lastum taꞌ yi choꞌnk na tzanuꞌ tan takꞌleꞌn kꞌej yi Ryos yi na takꞌ yi ankꞌiꞌn teruꞌ. 24 Chaꞌstzun te tan tuꞌ yi jun tajtzaꞌkluꞌaꞌtz, ja tzun saj ẍchakol Ryos jun tan stzꞌibeꞌn yi cobox yoleꞌj yi na tal: 25 MENE, MENE, TEKEL nin PARSIN. 26 Yi na elepont MENE iꞌtz: Ja el tajal Ryos te yi tiemp yi akꞌij teruꞌ tan cawuꞌn. Ej nin ja til yi ja wiꞌt jepon tamp yi tiempuꞌ. 27 Ma yi yol TEKEL na elepont: Ja wiꞌt maꞌlij yi tajtzaꞌkluꞌ tan Ryos nin ja jal paltiluꞌ. 28 Ma yi yol PARSIN na elepont: Ja wiꞌt jatxlij yi amaꞌl kale na cawuneꞌtuꞌ nin ja wiꞌt akꞌlij scyetz yi eꞌ aj Media nin scyetz yi eꞌ aj Persia, stzun Daniel bantz tetz rey.
29 Cawuneꞌn tzun yi rey Belsasar tan wekleꞌn Daniel tan yi eꞌchk balaj beꞌchok yi na xcon cyakꞌun eꞌ rey. Nchaꞌtz cawun nin tan cuꞌseꞌn jun balaj caren skul yi oro cuꞌn. Nchaꞌtz tal iꞌ scyetz cyakil yi eꞌ yi ateꞌ-tz, yi Daniel iꞌ yi toxiꞌn ajcaw sbneꞌ xlaj iꞌ.