OSEAS
Yi najal Oseas
1
1 Je yol Kataj Ryoseꞌj yi opon twiꞌ Oseas, yi cyꞌajl Beeri, te yi tiemp yi chicawuneꞌnlen yi eꞌ rey Uzías,a Jotam,b Acaz,c tu Ezequíasd squib yi eꞌ aj Judá. Nin nchaꞌtz te yi tiemp yi na cawun tzaj Jeroboame cyꞌajl Joás, tetz chireyil yi eꞌ aj Israel. 2 Xeꞌteꞌn tzun Kataj Ryos tan talcheꞌn tetz Oseas yi xtxolbil yi staleꞌ iꞌ scyetz eꞌ aj Israel: “Yi wetz intanum niꞌcuꞌn eꞌ chi jun xnaꞌn yi aj bnol tetz, na ja chin cyaj cyen quilol. I bin jaluꞌ baꞌn cẍben tan awumeweꞌn tu jun xnaꞌn aj bnol tetz, nin baꞌn jal anitxaꞌ teꞌj. Chocopon tzuntz tetz tal jun wiꞌtz bnol tetz.”3 Tumeweꞌn tzun Oseas teꞌj jun xnaꞌn yi na biꞌaj Gomer, meꞌl Diblaím nin tzun oc lacꞌpuj jun niꞌ-tz teꞌj. Xicy tzun ban te yi niꞌaꞌtz yi ul itzꞌok teꞌj. 4 Tlol tzun Kataj Ryos tetz Oseas: “Baꞌn tzꞌoc biꞌ yi niꞌ awaꞌn tetz Jezreel,f na txant cuntuꞌ tan woqueꞌn tan takꞌleꞌn chicaws yi eꞌ xonl kꞌajtzun rey Jehú, tan paj yi jun cꞌoloj wunak yi eꞌ baj quimsal le amaꞌl Jezreel. Nin nocpon tan xiteꞌn cuꞌn yi caꞌwl yi at tkꞌab yi tnum tetz Israel. 5 Nchaꞌtz tul yi jun kꞌejaꞌtz nocpon tan xiteꞌn cuꞌn yi eꞌ sanlar tetz Israel,” chij Kataj Ryos bantz.
6 Jeꞌn tzun tekal Gomer pwokil junt niꞌ. Xun tzun ban te junt niꞌaꞌtz. I tzun tal Kataj Ryos tetz Oseas: “Baꞌn tzꞌoc biꞌ yi niꞌ awaꞌn tetz Lo-ruhama,g na quiꞌt tzꞌel inkꞌajab scye yi eꞌ aj Israel, nin quiꞌt tzincuy chipaj. 7 Ma yi eꞌ xonl Judá, tzꞌelpon inkꞌajab scyeꞌj, nin ẍchiclaxok waꞌn, yi in wetz yi in chitaj, yi chiRyosil. Poro quil chiclax waꞌn takꞌon eꞌchk maꞌcl chi taneꞌn cꞌoxbil flech nka spar. Ej nin quil noꞌc tan chiclaxeꞌn takꞌon jun oyintziꞌ. Nin quil chixcon sanlar waꞌn yi ateꞌeꞌn teꞌj chej.”h
8 Yi teleꞌn tal niꞌ Lo-ruhama te xtxuꞌtx, nin tzun oc lacꞌpuj junt niꞌ te yi txkel Oseas. Xicy tzun ban te junt niꞌaꞌtz yi ul itzꞌok. 9 Tlol tzun Kataj Ryos tetz Oseas: “Tzꞌoc cyen biꞌ yi niꞌ awaꞌn tetz Lo-ami,i na yi axwok itetz nkꞌeꞌtzt axwok intanum jaluꞌ, nin yi in wetz nkꞌeꞌtzt in iRyosil jaluꞌ.”
Yi sjalok yi banl Kataj squibaj yi eꞌ xonl Israel tzantzaj
10 Tzꞌopon jun kꞌejlal yi ẍchipucꞌunk yi eꞌ xonl Israel chi taneꞌn yi tajlal yi samlicyꞌ yi at tzi mar.j Ej nin cyaꞌl jun nink xcyeꞌ tan tajleꞌn chixoneꞌn. Ej nin tul yi amaꞌleꞌj kale walnak yi inyol tzitetz: “Quibixwok tetz wajal,” swaleꞌ tzitetz: “Axwok jun cꞌoloj inmeꞌl incyꞌajl, yi in wetz yi in iRyosil, yi bintzi nin itzꞌ in.”k
11 Ej nin chimoleꞌ quib yi eꞌ xonl Judá scyuchꞌ yi eꞌ aj Israel nin sbixek jun ntziꞌ chireyil cyaꞌn. Ẍchipakxok Jerusalén. Chitzajok beneꞌn tziꞌn wi munt. Nin spucꞌunk chiwutz, nin chumbalaj nin sbneꞌ yi jun tiempaꞌtz, yi na biꞌaj Jezreel.l