2
1 Ej nin scyaleꞌ tzuntz squibil quib: “Oꞌ len tanum Kataj Ryos jaluꞌ.” Nin yi eꞌ xnaꞌn scyaleꞌ: “Na el kꞌajab Kataj Ryos skeꞌj jaluꞌ.”Yi eꞌ xonl Israel niꞌcuꞌn cyajtzaꞌkl swutz Ryos tu tajtzaꞌkl jun xnaꞌn yi ja cyaj tilol yi chmil nin yi tzꞌocpon cawseꞌn tan paj
2 Poro je yol Kataj Ryoseꞌj: “¡Nqueꞌnwok tan xotxleꞌn itxuꞌ!a Xochwok iꞌ, na nkꞌeꞌtzt wuxkel jaluꞌ, nin nkꞌeꞌtz in chmil iꞌ jaluꞌ. ¡Nink ltil cyen yi tajtzaꞌkl tan jopleꞌn inwutz! ¡Nink lcheꞌl yi eꞌ tuchꞌaꞌtzb teꞌj cꞌuꞌl! 3 Nin ko quil sban, cupon tzun intzekꞌbaltz chibanak yi tuleꞌn itzꞌok, yi txꞌanl cuntuꞌ bantz teleꞌn xtxꞌix.c Tzꞌocpon iꞌ waꞌn chi jun amaꞌl yi chin skej nin, kale quiꞌcleꞌt muꞌẍ aꞌbal, nin nocpon tan biyleꞌn cuꞌn tan sak tziꞌ. 4 Ej nin quil tzꞌel inkꞌajab scyeꞌj yi eꞌ nitxajil, na ja chijal tan yi jopol wutzajiꞌn. 5 Na yi chitxuꞌ ja cꞌay tib tetz alchok. Nin ja el kꞌej iꞌ tzinwutz yi tlol: ‘Nchimben tan chijoyleꞌn wuchꞌ na scyakꞌeꞌ inwaꞌ tu wucꞌaꞌ, nin scyakꞌeꞌ innokꞌ tu balaj lino tu aceit, nin scyakꞌeꞌ balaj win swetz.’d
6 ”Tan tuꞌ yaꞌtz taneꞌn nocpon tan tocseꞌn txꞌiꞌx tul beꞌ, nin tzꞌocpon jun peꞌm waꞌn solteꞌj iꞌ. Bantz quiꞌt ljal puntil beꞌ taꞌn. 7 Mben xomok tan chijoyleꞌn yi eꞌ tuchꞌ, poro quil jamelan. Tzꞌocpon tan chijoyleꞌn, poro quil jal banl scyeꞌj. Staleꞌ tzuntz: ‘Baꞌn tcuꞌn chimpakxij te yi bajx wuchmil, na chumbalaj nin wutaneꞌn yi atin tzaj teꞌj, swutz yi jaluꞌ,’ chij sbneꞌ.
8 ”Poro lastum yi qui nin pujx taꞌn yi iꞌtz in akꞌon yi ixiꞌn tu yi taꞌal uva tu aceit tetz. Nin yi in pucꞌsaneꞌn yi oro tu sakal yi nxcon takꞌun jaluꞌ tan toyil tetz yi ryosilaꞌtz, yi eꞌ Baal. 9 Chaꞌstzun te nocpon tan majleꞌn len yi ixiꞌn tu yi taꞌal uva yil tzꞌucuꞌl tiemp tetz cosech. Nin tzꞌelpon inmajol yi nokꞌ, tu yi lino yi wakꞌnak tetz tan jopleꞌn yi xtxꞌixl. 10 Nin slajluchaxk yi tetz xtxꞌixl waꞌn ẍchiwutz yi eꞌ tuchꞌ, nin cyaꞌl jun xcyek tan colcheꞌn tinkꞌab. 11 Nocpon tan xiteꞌn yi tzatzin paz yi at tuchꞌ, nin stzajk yi eꞌchk kꞌej waꞌn yi na bajij tuchꞌ. Nchaꞌtz xitok yi eꞌchk tzatziꞌn yi na bajij yi na jeꞌul yi acꞌaj xaw, tu cyakil yi eꞌchk kꞌej ujleꞌn, tu cyakil eꞌchk tzatziꞌne yi na bajij tuchꞌ. 12 Ej nin nocpon tan poꞌtzeꞌn yi eꞌchk cojbil yi uva cuꞌn tu yi eꞌchk cojbil yi ibẍ cuꞌn awij swutz, na je na taleꞌj: ‘Tircuꞌn yi incosecheꞌj, iꞌtz yi inchojoꞌn yi ncyakꞌ yi eꞌ wuchꞌ swetz.’ Poro yi in wetz nocpon tan xiteꞌn cuꞌn cyakil yi eꞌchk amaꞌlaꞌtz, nin xtzeꞌ tuꞌ tzꞌitzꞌok waꞌn tul, nin tircuꞌn yi cosech sbajk cyakꞌun yi eꞌ smaron txuc. 13 Nocpon tan cawseꞌn tan paj yi jun cꞌoloj tiemp yi mmoꞌc tan pateꞌn insens ẍchiwutz eꞌchk ryosil yi banij cuntuꞌ taneꞌn, na nin cuꞌ wekol tib, nin ja xcon eꞌchk xmalkꞌab tu uwaj taꞌn tan yubseꞌn tib yi beneꞌn xomok scye yi eꞌ tuchꞌaꞌtz, ma yi in wetz, ja chin cyaj cyen tilol. Jun cuꞌn yol tzincawseꞌ, na yi in, in Ryos, nin na neꞌl cuꞌn te inyol.
Ilen nin spekꞌok Kataj scyeꞌj yi eꞌ xonl Israel
14 ”Poro je tzimbneꞌeꞌj: Tzꞌul jun tiemp yi nocpon tan moxeꞌn yi xnaꞌnaꞌtz, nin mben incyꞌal le jun amaꞌl yi tzꞌinunin tuꞌ, nin nocpon tan mayseꞌn cꞌuꞌl. 15 Ej nin swakꞌeꞌ junt tir eꞌchk balaj cosech scyetz. Swakꞌeꞌ uva, nin jepon intxꞌixpul yi jocoꞌj yi na biꞌaj Acorf tetz jun amaꞌl yi at chichꞌiw teꞌj tan jaleꞌn tzatziꞌn. Cyakil eꞌ, ẍchibitzink chi banakeꞌ tentz. Ẍchibitzink chi banakeꞌ yi cyeleꞌn tzaj liwr jakꞌ chicaꞌwl yi eꞌ aj Egipto. 16 Ej nin tul yi jun tiempaꞌtz yi at tulbil, scyaleꞌ swetz: ‘Iluꞌ jun cꞌoloj wuchmil.’ Nin quiꞌt cyal junt tir: ‘Yi ketz kapatrón iꞌtz Baal.’ Jun cuꞌn sbajok yi xtxolbilaꞌseꞌj, na yi in wetz in Ryos nin na neꞌl cuꞌn te inyol. 17 Quiꞌt chinaꞌwsij chibiꞌ yi eꞌchk ryosaꞌtz yi banij cuntuꞌ quitaneꞌn, na quiꞌt xcon scyetz.
18 ”Yil tzꞌul yi jun kꞌejlalaꞌtz tzimbneꞌ jun trat scyuchꞌ yi eꞌ smaron txuc, nin scyuchꞌ yi eꞌ txuc yi na chixicyꞌin, nin scyuchꞌ yi eꞌ luꞌbaj, tan quiꞌt chiloꞌoneꞌn yi eꞌ intanum. Nchaꞌtz copon inxitul yi eꞌchk maꞌcl tetz oyintziꞌ chi taneꞌn eꞌchk cꞌoxbil flech tu spar, na quiꞌt lbajij junt oyintziꞌ scyeꞌj. Nin ẍchujek nin quiꞌt ẍchixob tetz jun chicontr. 19 Axwok xonl Israel cxocpon tzun woktz waꞌn tetz wuxkel tetz ben kꞌej ben sak, junit skabneꞌ swutz yi ley. Tzinchajeꞌ yi lokꞌ ib tzitetz, na yi in wetz wiꞌnin na el toꞌkl incꞌuꞌl tziteꞌj. 20 Cxocponwok junt tir tetz wuxkel nin quil cxeꞌl te incꞌuꞌl. Nin tzꞌelpon itxum tetz yi jun cuꞌn in itajcawil. 21 Jun cuꞌn yol na walnin: Tul yi jun tiempaꞌtz yi at tulbil swakꞌeꞌ cyakil yi na ijak swetz. Swakꞌeꞌ yi aꞌbal tetz yi cojbil, nin yi cojbil swutzink tan balaj ujul. 22 Chumbalaj nin sbneꞌ yi triw, nin chumbalaj nin sbneꞌ yi cosech uva, tu eꞌchk cosech tetz oliw. Yaꞌstzun sbajok yil cxoꞌcwok tan cꞌucheꞌn ibanl swetz, na in Jezreel,g yi awal ujul taneꞌn. 23 Nocpon tan ibixeweꞌn tul yi itetz iluwar, tan jaleꞌn wetz inkꞌej. Ej nin tzꞌelpon inkꞌajab tziteꞌj yi axwok yi na aꞌlchij: ‘Yi eꞌaꞌtz, yi cyaꞌl na el kꞌajab scyeꞌj’. Nin swaleꞌ tzitetz: ‘Axwok intanum’. Nin yi axwok itetz tzitaleꞌ swetz: ‘Yi iluꞌ teruꞌ Taꞌ, iluꞌ kaRyosil.’ ”