Oseas tu yi xnaꞌn yi jopol wutzaj
3
1 Ej itzun yi teleꞌn tiemp, nin tzun tal Kataj Ryos swetz: “Quiloꞌk tan joyleꞌn junt tir yi awuxkel,a nin baꞌn tzacyꞌaj tzaj junt tir tzaweꞌj, tan ẍchajleꞌn tetz yi wiꞌnin na cẍpekꞌ teꞌj. Quiꞌc na ban yi ko ja takꞌ tib scyetzak yaj. Banaj yi xtxolbileꞌj, na iꞌtz jun elsawutzil tetz yi in wetz, na in iRyosil yi wiꞌnin na chimpekꞌ tziteꞌj. Wech na ja choꞌc yi eꞌ axonl tan lokꞌeꞌn wutz eꞌchk ryos, nin tan toyeꞌn eꞌchk balaj oy scyetz chi taneꞌn torta yi na bnix tan wutz uva yi skejt, poro ilenin na chimpekꞌ tziteꞌj,” stzun Kataj Ryos ban swetz. 2 Ja tzun inlokꞌ junt tir yi wuxkel, tan oꞌlaj piẍaꞌl sakal tu ox cient tu junaklaj litr cebada. 3 Itzun waltz tetz: “Tajweꞌn tan acyajeꞌn sweꞌj tetz jun cꞌoloj tiemp, yi ntaxk kawitbej kib. Nin quil tzawakꞌ awib tetz junt. Nchaꞌtz yi in wetz, quil tzinjopb awutz teꞌj junt xnaꞌn.” 4 Yi jun xtxolbilaꞌtz na elepont, yi quiꞌt jal jun chireyil nka jun wiꞌtz cyajcawil tetz wiꞌnin tiemp. Quil jal puntil tan cyoyil chitxꞌixwatz, nin quil jal yi beꞌch tetz paleꞌ yi na biꞌaj efod kale atit yi cob tal neꞌẍ cꞌubc yi chin xan nin. Nchaꞌtz quil jal yi beꞌch tetz jun paleꞌ. Nin quiꞌt jal jun ryos yi banij cuntuꞌ xeꞌak chicaꞌl. 5 Ma na yil jepon tamp yi jun tiempaꞌtz, cyosajeꞌ quib juy nin ẍchipakxok tan chixomeꞌn sweꞌj,d yi in wetz yi in Jehová, yi chiRyosil. Ej nin ẍchixomok te chiReyil, yi jun xonl kꞌajtzun rey Luwiy. Na tul yi wiꞌtzbil tiemp chocpon tan takꞌleꞌn inkꞌej, nin ẍchitzatzink te chibanl yi swakꞌeꞌ scyetz.