Yi oyintziꞌ yi at ẍchixoꞌl Ryos scyuchꞌ yi eꞌ aj Israel
4
1 Eꞌuꞌ jun cꞌoloj aj Israel quibit tzajuꞌ yi yol Kataj Ryos. Ja xeꞌtij jun oyintziꞌ taꞌn scyeꞌjuꞌ, yi eꞌuꞌ yi najlcheꞌuꞌ le amaꞌl cwent Israel. Na quiꞌt na chibanuꞌ jun baꞌn squibil quibuꞌ, nin quiꞌt na chipekꞌuꞌ teꞌj iꞌ, nin qui na cyekuꞌ ẍchiꞌ. 2 Ma na ntin sukeꞌn eꞌchk yol cyanuꞌ yi qui na cheꞌl cunuꞌ teꞌj. Ntin laꞌjil na chiyoluꞌ. Eꞌuꞌ cuꞌn biyol nak, nin eꞌuꞌ cuꞌn alkꞌom. Eꞌuꞌ cuꞌn aj jopol wutzaj nin aj oyintziꞌ, nin qui na chitaneꞌuꞌ tan chibiyleꞌn wunak. 3 Tan tuꞌ yi xtxolbilaꞌtz wiꞌnin na chibisun cyakil eꞌ wunak tul chitnumiluꞌ, nin quiꞌt na jal puntil cyaꞌn tan chicolol quib. Nchaꞌtz yi eꞌ smaron txuc scyuchꞌ yi eꞌ txuc yi na chixicyꞌin, scyuchꞌ yi eꞌ txuc yi najlcheꞌ xe mar, wiꞌnin chisotzeꞌn tircuꞌn.Yi tlol Ryos yi at len quil yi eꞌ paleꞌ
4 Je yol Katajeꞌj: “¡Yi axwok paleꞌ baꞌnt cuꞌn yi quil cxoꞌcwok tan talcheꞌn yi paltil junt! Na yi oyintziꞌ iꞌtz ntin skaxoꞌl tzituchꞌ. 5 Skꞌejl cuꞌn nocopon tan ixiteꞌn, nin nchaꞌtz lakꞌbal chinxiteꞌ yi eꞌ elsanl intziꞌ. Icyakil cuꞌn tuml itxuꞌ tu ixonl chixitokwok waꞌn. 6 Lastum yi eꞌ weri intanum, na tan ipaj na chixon tul tzꞌoꞌtz wutzil; nin na chiben tul il; nin na chixit. Na yi axwok itetz yi axwok paleꞌ, qui na ijoy yi balaj ajtzaꞌkl. Chaꞌstzun cxelpon tzun lajuꞌn te imunl, na ja el yi inchusuꞌn te icꞌuꞌl. Nin quiꞌt tzun tzꞌul txꞌakx tincꞌuꞌl tan takꞌleꞌn chibanl yi eꞌ ixonl, scyuchꞌ yi eꞌ imam, yi xomt cheꞌ tzaj.
7 ”Axwok paleꞌ, yi ẍchꞌuyeꞌn itajlal, nchaꞌtz ja chꞌuy itil tan yi eꞌchk takleꞌn ploj yi na iban tzinwutz. Chaꞌstzun te quiꞌt lwakꞌ ikꞌej ma na tzꞌelpon itxꞌix waꞌn. 8 Na cxriquinwok tan tuꞌ yi na chijuch yi eꞌ intanum quil. Chaꞌstzun te wiꞌnin na cxtzatzinwok yi na chijuch quil yi eꞌ wunakaꞌtz. 9 Poro swakꞌeꞌ icaws cyakil cuꞌn axwok paleꞌ, nin nchaꞌtz swakꞌeꞌ chicaws yi eꞌ intanum tan tircuꞌn yi eꞌchk takleꞌn cachiꞌ yi na chiban. 10 Na jun cuꞌn ja cyaj cyen itilol lokꞌeꞌn inwutz. Cxwankwok, poro quil noj icꞌuꞌl. Tzꞌilokꞌeꞌ wutz junt txꞌakajt ryos tan pucꞌseꞌn kloꞌ iwutz, poro juncuꞌn quil pucꞌun iwutz,” chij Kataj.
Junt len cyajtzaꞌkl yi eꞌ aj Israel yi na chilokꞌ wutz junt ryos
11 “Tan yi jopol wutzajiꞌn tu yi xcꞌalaꞌiꞌn, na xit tajtzaꞌkl jun yaj. 12 Poro yi axwok intanum na cxtzanwok tan jakleꞌn itajtzaꞌkl ẍchiwutzak yi eꞌchk ryos yi tzeꞌ tuꞌ. Nin na xcon eꞌchk tal xleꞌm tzeꞌ itaꞌn tan swertiꞌn. Tan tuꞌ yi na el italmaꞌ scyeꞌj yi eꞌchk ryosaꞌtz, na cxubsij. Nin yi na cxomwok scyeꞌj, na icolcyenwok yi in, yi iRyosil. 13 Na na cxoꞌcwok tan pateꞌn insens scyetz, wiꞌak eꞌchk wutz tu eꞌchk juꞌwtz, nin iteꞌn nin na ibanwok tzakꞌak mujil eꞌchk wiꞌ bakch nin tzakꞌak eꞌchk wiꞌ tzeꞌ yi wiꞌnin xak. Nchaꞌtz yi eꞌ imeꞌl at len cyuchꞌ nin yi eꞌ itlib eꞌ len cuꞌn jopol wutzaj. 14 Poro quil noꞌc tan chicawseꞌn tan yi quilaꞌtz, na axwok chajol tetz scyetz. Na yi na itoy yi itxꞌixwatz, nchaꞌtz na iwitbej itib scyuchꞌ yi eꞌ xnaꞌn yi ateꞌ-tz tan banleꞌn taneꞌn chimunl le chityoẍil yi eꞌchk chiryosilaꞌtz. Tan yi xtxolbilaꞌtz ja cxbenwok tul il, na quiꞌc itajtzaꞌkl.
15 ”Axwok aj Israel jun cuꞌn yol ja ijop inwutz, poro yi eꞌ aj Judá ban cyeꞌtz, na txeꞌn chixom te itajtzaꞌkl. Quiꞌt tzun cxbenwok le amaꞌl Gilgal nka Bet-avén. Nchaꞌtz quil tzinaꞌwsajwok imbiꞌ tan chaꞌtz tuꞌ, tan xconeꞌn tetz quiwel iyol yi nkꞌeꞌtz bintzij. 16 Na yi axwok itetz, chin tzeꞌtzuj nin te italmaꞌ, chi stzeꞌtzal tajtzaꞌkl jun neꞌẍ tor yi chin pajol caꞌwl nin. Chaꞌstzun te quil wakꞌ amaꞌl tzitetz tan iwaneꞌn tul jun amaꞌl yi txaꞌx wutz taneꞌn, chi na chiban eꞌ tal cneꞌr yi chin cꞌulutxum nin eꞌ. 17-18 Lastum axwok xonl kꞌajtzun Efraín, na ja cxomwoknin tan lokꞌeꞌn chiwutz eꞌchk ryos yi banij cuntuꞌ quitaneꞌn. Niꞌcuꞌn mmibanwok chi cobox kbarel yi na chicuꞌ trimp tan paj yi aꞌ yi at ẍchiwiꞌ. Cyakil nin kꞌej na ijop inwutz scye yi eꞌchk iryosilaꞌtz. Wiꞌnin na cxpekꞌwok tan teleꞌn itxꞌix, swutz yi jalseꞌn ikꞌej tzinwutz. 19 Chaꞌstzun te tzꞌul jun chin salchcam waꞌn taneꞌn, tan imasleꞌn len swutz iluwar. Tzꞌelpon tzun itxꞌix tan paj iyaꞌplaꞌtz.