5
1 ”Ma jaluꞌ axwok paleꞌ nin axwok aj Israel bitwok tzaj inyoleꞌj. Nchaꞌtz bitwok tzaj axwok wiꞌtz ajcaw tetz tnum, na xeꞌtok xtisyaꞌiꞌn waꞌn tziteꞌj, na cuꞌnnak jun paꞌtx itaꞌn tan chixubseꞌn yi eꞌ wunak le amaꞌl Mizpa. Nin jalen yi wiꞌwtz yi na biꞌaj Tabor ja bnix jun leb itaꞌn taneꞌn, tan chichobleꞌn yi eꞌ weri intanum. 2 Niꞌcuꞌn yi jak bnix jun chin jul itaꞌn, le amaꞌl yi na biꞌaj Sitim tan chibenseꞌn yi eꞌ tal prow wunakaꞌtz tul. Ej nin tan yi eꞌchk itajtzaꞌklaꞌtz nocpon tzuntz tan icawseꞌn cunin. 3 Yi axwok xonl Efraín na el intxum tetz yi ẍeꞌn itaneꞌn. Nchaꞌtz axwok aj Israel na el intxum tetz itxumuꞌn. Na yi axwok xonl Efraín niꞌcuꞌn itaneꞌn chi jun aj bnol tetz. Nin yi axwok aj Israel, ja tzꞌilin italmaꞌ tan itxumuꞌn. 4 Ma jaluꞌ tan paj yi eꞌchk takleꞌnaꞌtz yi na ibanwok, quiꞌt na aꞌw pakxeꞌn itaꞌn sweꞌj. Lamij itajtzaꞌkl tan yi iyaꞌpl. Chaꞌstzun te qui na cxoꞌc cꞌulutxum jakꞌ incaꞌwl yi in wetz yi in iTaj Jehová. 5 Na lajluchax yi at len itil, tan tuꞌ yi na itocsaj itib nim tu itajtzaꞌkl. Axwok jun cꞌoloj xonl kꞌajtzun Efraín, ja cxjeꞌ trimp tan paj iyaꞌpl. Ej nin lastum yi eꞌ aj Judá, na nchaꞌtz eꞌ, chiben tul il tan ipaj. 6 Bintzij, na ijoywok puntil tan mayseꞌn incꞌuꞌl tan eꞌchk tal neꞌẍ cneꞌr tu neꞌẍ tor. Poro quiꞌc rmeril na ja cyaj cyen wilol axwok jaluꞌ. 7 Yi itoqueꞌn tan joyleꞌn junt iryosil, ja ijopwok inwutz taneꞌn. Ja jal initxajil poro nkꞌeꞌtz in chitaj. Chaꞌstzun te yil jeꞌ ul yi acꞌaj xaw cxbenwok pres tuml cyakil imeꞌbiꞌl ẍchikꞌab junt jilwutz wunak.”Yi chicaws yi eꞌ aj Israel scyuchꞌ yi eꞌ aj Judá
8 ¡Or scweꞌn eꞌchk chun, yi tucꞌ cneꞌr, le amaꞌl Gabaa tan talcheꞌn yi txant tan xeꞌteꞌn jun chin oyintziꞌ! ¡Nchaꞌtz cuken eꞌchk chun le amaꞌl Ramá! ¡Chijek cꞌasuꞌn yi eꞌ sanlar cwent Bet-avén! ¡Baꞌn tzitalwok scyetz yi eꞌ aj Benjamín! Or tzitilwok, na ja wiꞌt chuꞌl icontr tan itzꞌamleꞌn. 9 Yi inaꞌtz in Ryos nin na chintzan tan xtxoleꞌn yi mbi cuꞌn sbajok tziteꞌj tul yi jun tiempaꞌtz, na xituꞌn cunin tzibneꞌwok, yi axwok jun cꞌoloj xonl Efraín,a na swakꞌeꞌ icaws.
10 “Nchaꞌtz yi eꞌ wiꞌtz chibajxomil yi eꞌ aj Judá, niꞌcuꞌn cyajtzaꞌkl scyuchꞌ yi eꞌ wunak yi na choꞌc tan xtxꞌixpeꞌn mojomil yi eꞌchk amaꞌl. ¡Poro jun cuꞌn wicyꞌseꞌ incꞌuꞌl scyeꞌj! 11 Yokꞌij cheꞌ yi eꞌ xonl Efraín cyaꞌn chicontr, quiꞌt na chicawun jaluꞌ, tan paj yi ja chixom tan lokꞌeꞌn chiwutz yi eꞌchk ryosaꞌtz yi banij cuntuꞌ quitaneꞌn. 12 Ẍchibajk waꞌn, chi na ban yi txil tan bajseꞌn jun beꞌchok, nin ẍchipoꞌtok yi eꞌ aj Judá waꞌn chi na poꞌtij jun tzꞌlum tan pocꞌ.
13 ”Yil tzꞌel chitxum yi eꞌ aj Efraín tetz yi nim il quitaneꞌn, nin yil tzꞌel chitxum yi eꞌ aj Judá tetz yi nim il yi qꞌuixpnak yi at te chiwankil taneꞌn, choꞌn tzun chibentz jalen Asiria tan jakleꞌn ẍchꞌeybil cyetz tetz yi wiꞌtz rey. Poro yi rey quil xcyeꞌ tan tulseꞌn yos scyuchꞌ yi eꞌ xonl Efraín, nin quil xcyeꞌ tan stzꞌaqueꞌn yi qꞌuixpeꞌn yi at teꞌj Judá. 14 Nocpon tzuntz tan chibiyleꞌn cuꞌn yi eꞌ aj Efraín scyuchꞌ yi eꞌ aj Judá chi na ban jun león yi na oc tan biyleꞌn cuꞌn jun cneꞌr. Nocpon tan piẍeꞌn cuꞌn chiwankil, nin lcheꞌ wil cyentz. Chelpon incyꞌal joylaj len, nin cyaꞌl jun xcyek tan chicolpeꞌn tinkꞌab.
15 ”Chin pakxok tzuntz le incaꞌl, jalen cuꞌn yil tzꞌel chitxum tetz yi quil yi na chijuch, nin jalen cuꞌn yil chuꞌl tan injoyleꞌn. Na yil choꞌc wutz peꞌm, chuꞌlt tzun tan injoyleꞌn xe incaꞌl.”