Yi mbi scyaleꞌ yi eꞌ aj Israel yil chipakxij tan joyleꞌn Kataj
6
1 Quin tircuꞌn oꞌ, kapakxoken jakꞌ caꞌwl Kataj Ryos. Ocnak iꞌ tan kaxiteꞌn cuꞌn, poro nchaꞌtz tzꞌocpon tan katxicbajeꞌn junt tir. Ja kaqꞌuixpij taꞌn, poro nchaꞌtz xcyek iꞌ tan katzꞌaqueꞌn. 2 Tul jun tkuj tzꞌul yos taꞌn skuchꞌ. Tzꞌocpon tan katxicbajeꞌn junt tir, tan kanajeweꞌn tuchꞌ iꞌ. 3 Kabucheꞌ kib tan koqueꞌn jakꞌ caꞌwl iꞌ. Na jun cuꞌn, tzꞌul iꞌ tan kuchꞌeyeꞌn chi na ban yi na jeꞌul yi kꞌej cyakil kꞌej. Nin jun cuꞌn tzꞌul tan kuchꞌeyeꞌn, chi na ul yi aꞌbal tul yi tetz tiemp.Yil tbit Kataj chitziꞌ chikul yi eꞌ xonl Israel
4 Je na tal Ryoseꞌj: “Lastum axwok jun cꞌoloj xonl Efraín. ¿Mbil tzimban tziteꞌj? nin ¿mbil tzimban tziteꞌj axwok aj Judá? Na yi lokꞌ ib yi at itaꞌn sweꞌj niꞌcuꞌn tu yi sbakꞌ yi na jal jalchan yi jalcunin na xit, nin niꞌcuꞌn tu yi kꞌab cheꞌw, yi jalcunin na el xit. 5 Chaꞌstzun te in innoꞌcnak tan ixiteꞌn cuꞌn tan yi yol yi walnak scyetz yi eꞌ elsanl intziꞌ. Na tan yi xtxolbil yi nwal tzitetz, ja cxloꞌonwok waꞌn. Poro slajluchaxk yi imbalajil tziwutz chi na ban yi na ul skil. 6 Yi wetz wajbil iꞌtz yi nink cxeꞌl cuꞌn te iyol yi isuknak swetz, tetz cuꞌn italmaꞌ, swutz yi eꞌchk balaj oy tu itxꞌixwatz yi na itakꞌ swetz. Na yi in wetz yi na waj iꞌtz yi nink tzꞌel itxum tetz yi ẍeꞌn cuꞌn wutaneꞌn, nin yi nink cxoꞌc cꞌulutxum jakꞌ incaꞌwl. Na quiꞌc na takꞌ yi nink cxoꞌc tan toyeꞌn tuꞌ eꞌchk oy yi patuꞌn cuꞌn na ban tzinwutz, ko qui na iban taneꞌn incaꞌwl.
7 ”Poro yi axwok itetz niꞌcuꞌn axwok chi banak cyen Adán, qui nin miban taneꞌn yi trat yi bnixnak kaꞌn tzituchꞌ, qui nin el cuꞌn ikꞌab teꞌj. 8 Na yi amaꞌl Galaad iꞌtz jun luwar yi nojnak cyaꞌn mal wunak. Eꞌ cuꞌn biyol nak ateꞌ. 9 Ej nin yi eꞌ paleꞌ, niꞌcuꞌn eꞌ tu jun kꞌuꞌj alkꞌom, yi ntin chiwutz cyen te chimeꞌbiꞌl wunak, na na choꞌc tan chibiyleꞌn wunak nin na chiban eꞌchk takleꞌn yi chin juntlen nin tul yi beꞌ yi na ben Siquem. 10 Nchaꞌtz axwok xonl Israel, ja wil eꞌchk takleꞌn yi chin junt len nin yi na ibanwok. Na yi eꞌ xonl Efraín, ja chin cyaj cyen cyaꞌn chi na ban jun xnaꞌn yi na xom nin scyeꞌj eꞌ tuchꞌ, na ja chipekꞌ scyeꞌj yi eꞌchk ryos yi banij cuntuꞌ. Nchaꞌtz yi eꞌ mas xonl Israel ja xom nin chiwiꞌ te cyajtzaꞌkl. 11 Nchaꞌtz axwok aj Judá, ja wiꞌt bixeꞌ yi kꞌejlal waꞌn tan icawseꞌn.
”Poro yi jaluꞌ yi na chintxumun tan takꞌleꞌn chibanl yi eꞌ intanum Israel junt tir,