7
1 ej nin yi na chintxumun tan chitzꞌaqueꞌn junt tir yi eꞌ xonl Efraín scyuchꞌ yi eꞌ aj Samaria, ilenin na lajluchax yi chiyaꞌpl tu yi quil tzinwutz. Na cyakil eꞌ, eꞌ len cuꞌn laꞌj, eꞌ len cuꞌn alkꞌom na na choꞌc xeꞌak caꞌl tan alakꞌ. Ej nin na chimajlen chimeꞌbiꞌl yi eꞌ wunak yi na chixon lakak beꞌ. 2 Qui na choꞌc tan xtxumleꞌn yi qui na el yi quil teꞌj incꞌuꞌl. Nin qui na choꞌc tan xtxumleꞌn yi iteꞌn nin quilaꞌtz tzꞌocpon tan chitzꞌamleꞌn cuꞌn. Na yi eꞌchk takleꞌn cachiꞌ yi na chiban ilen nin at tzinwutz.Yi talol Ryos yi chin cꞌuxul nak yi eꞌ wiꞌtz ajcaw tetz tnum
3 ”Chin junt len nin cyajtzaꞌkl yi eꞌ intanum nin chin laꞌj nin eꞌ. Poro ntin stzeꞌeꞌn tuꞌ na chiban yi rey scyuchꞌ yi eꞌ mas wiꞌtz ajcaw scyeꞌj. 4 Poro cyakil cuꞌn eꞌ, eꞌ len cuꞌn jopol wutzaj. Na niꞌcuꞌn cyajtzaꞌkl tu yi kꞌakꞌ yi na lamcan tul jun ẍchujil pam, qui na tzaj yi na oc yi bnol pam tan xyulkꞌeꞌn yi kꞌot. 5 Na yi bixeweꞌn chirey, ja choꞌc yi eꞌ bajxom tan tocseꞌn aꞌ twiꞌ, tan poyseꞌn wutz, nin qui nin pujx tan tal prow rey yi mbi na tzan banleꞌn teꞌj, nin ja takꞌ nin kꞌab scyetz yi eꞌ yi na chixbajtziꞌ cyen teꞌj. 6 Ntin na chitzan tan xtxumleꞌn yi ẍeꞌn chiban tan poyseꞌn wutz yi chireyil. Niꞌcuꞌn cyajtzaꞌkl tu yi kꞌakꞌ yi at tul jun ẍchujil pam, yi na cuꞌ mol taneꞌn lakꞌbal. Poro yi na ul skil, iẍnin na lamcaneꞌt. 7 Yi cyajtzaꞌkl chin cachiꞌ nin, niꞌcuꞌn tu yi jun kꞌakꞌaꞌtz yi qui na tzaj cunin tul yi ẍchujil pam. Nin yi na jeꞌ chituꞌn, na jeꞌ tincꞌuj junt tir. Niꞌcuꞌn tzun taneꞌn cyajtzaꞌkl na qui na tzaj cunin, na ilenin na chijoy puntil tan cyelseꞌn cuꞌn yi chireyil. Tircuꞌn yi chireyil ja chiquim len cyaꞌn. Poro lastum cyaꞌl nink jun scyeri eꞌ reyaꞌtz jak oc tan jakleꞌn ẍchꞌeybil tetz swetz,” chij Kataj.
Yi ẍeꞌn cuꞌn eꞌ ban yi eꞌ aj Israel yi cyajeꞌn cyen quilol yi chiRyosil
8 “Lastum yi eꞌ xonl Efraín ja cuꞌ chiyujul quib scyuchꞌ yi eꞌ awer nak. Niꞌcuꞌn tzun quitaneꞌntz chi taneꞌn jun waj yi quiꞌ njeꞌ sukchij, yi jalaj ntziꞌ xlaj skꞌajnak. 9 Na yi eꞌ awer nak ja chixcyeꞌ tan xiteꞌn cuꞌn chichamil, poro lastum eꞌ qui na el chitxum tetz. Ja wiꞌt skojax chiwiꞌ taneꞌn poro qui na chinachon teꞌj yi ja cuꞌ xituꞌn chitxamil. 10 Tan tuꞌ yi ja cyocsaj quib nim tu cyajtzaꞌkl, iꞌtz jun techl yi at chipaltil. Lajluch cuꞌn yi at quil. Ja chitij wiꞌnin qꞌuixcꞌuj, poro tan paj chinimel qui nin nchoꞌc tan injoyleꞌn, wech in Jehová, in chiRyosil. 11 Niꞌcuꞌn yi eꞌ xonl Efraín tu jun plomẍ yi qꞌuixpnak, yi quiꞌt na pujx taꞌn yi mbi na tzan tan banleꞌn. Quiꞌct cyajtzaꞌkl, na na choꞌc tan jakleꞌn ẍchꞌeybil cyetz scyetz yi eꞌ aj Egipto. Nin nchaꞌtz jalcunin na chiben scyeꞌj yi eꞌ aj Asiria tan jakleꞌn ẍchꞌeybil cyetz scyetz. 12 Poro yil choꞌc tan joyleꞌn yi ẍchꞌeybil cyetzaꞌtz, mben tzun incꞌoxol yi inlebtz squibaj, nin ẍchitxꞌamxok waꞌn, nin ẍcheꞌ incawseꞌ tan paj yi cyajtzaꞌkl yi chin junt len nin.
13 ”¡Lastum eꞌ na ja chincyaj cyen quilol! Tzꞌul chan yi sotzeꞌn ẍchiwutz, na ocnakeꞌ tan contriꞌn sweꞌj. Yi wetz ntin na waj noꞌc tan chicolcheꞌn, poro yi eꞌ cyetz ntin inyolcheꞌn cyaꞌn, nin ntin laꞌjil na cyal. 14 Te yi ateꞌ yabiꞌẍ wi chisoc, na chiẍchꞌintzaj swetz, poro nkꞌeꞌtz tetz cuꞌn cyalmaꞌ. Na choꞌc tan loꞌonseꞌn chiwankil tan jakleꞌn tuꞌ chiwaꞌ, tu quicꞌaꞌ scyetz yi eꞌchk chiryosil yi banij cuntuꞌ quitaneꞌn. Eꞌ teꞌn tzun na chicuꞌ tkꞌab yi chiyaꞌbl nin na chipoꞌtzaj quib squibil quib, na eꞌ len cuꞌn contr sweꞌj. 15 In nnoꞌcnakin tan chichusleꞌn te yi balaj, nin ja wakꞌ ẍchamil chikꞌab, poro ilenin ja bnix eꞌchk takleꞌn cyaꞌn, yi chin junt len nin tzinwutz. 16 Na ja choꞌc tan lokꞌeꞌn chiwutz eꞌchk ryos yi banij cuntuꞌ quitaneꞌn. Niꞌcuꞌn tzun eꞌ tu jun cꞌoxbil flech yi jetxꞌ na cꞌoxon. Ntin na choꞌc tan tzꞌolcheꞌn inyol, nin tan yi xtxolbilaꞌtz ẍchiloꞌonk yi chibajxom tan spar, nin ẍchitzeꞌenk yi eꞌ aj Egipto scyeꞌj.