Yi bixeweꞌn chicaws yi eꞌ aj Israel tan paj yi ja choꞌc jakꞌ chicaꞌwl eꞌchk ryos yi banij cuntuꞌ quitaneꞌn
8
1 ”Ma jaluꞌ tajweꞌn cuꞌ chun cyaꞌn yi eꞌ intanum tan chimolcheꞌn yi eꞌ sanlar, na chuꞌl contr scyeꞌj chi na saj juchp jun qꞌuil qꞌuitx tcyaꞌj tan stzꞌamleꞌn yi ẍchib. Na yi eꞌ cyetz qui nin mmeꞌl cuꞌn chikꞌab te yi katrata yi cuꞌnak skaxoꞌl scyuchꞌ, nin chin pajol incaꞌwl nin eꞌ, na qui na chiban taneꞌn yi incaꞌwl. 2 Lastum eꞌ na qui na chinachon te chipaltil, na wiꞌnin na chiẍchꞌin tzaj swetz yi na choꞌc tan naꞌwseꞌn imbiꞌ. Je chiyoleꞌj: ‘¡Jun cuꞌn yol, iluꞌ kaRyosil yi oꞌ aj Israel!’ 3 Poro yi mero bintzij, qui na chiban taneꞌn yi eꞌchk takleꞌn balaj yi chusij cheꞌ waꞌn teꞌj. Chaꞌstzun te ẍchitzajk ẍchikꞌab chicontr jaluꞌ.4 ”Ja bixeꞌ chireyil cyaꞌn, nin qui nin nchijak swetz ko baꞌn nko quiꞌ, nin quiꞌc tzinwutz yi na bixeꞌ jun wiꞌtz cyajcawil cyaꞌn. Nin ja xcon yi oro tu sakal yi colij cyaꞌn tan banleꞌn teblal chiryosil, nin tan tuꞌ yi xtxolbilaꞌtz chichuc cuntuꞌ ja chipoꞌtzaj quib. 5 ¡Axwok aj Samaria, wiꞌnin na chiꞌch incꞌuꞌl te itajtzaꞌkl yi na cxtzanwok tan cꞌuꞌlajeꞌn yi jun neꞌẍ wacẍ, yi banij cuntuꞌ! Chaꞌstzun te wiꞌnin na chiꞌch incꞌuꞌl tziteꞌj. 6 ¿Tonaꞌ nin ltzꞌel yi iyaꞌpl yi axwok aj Israel? Nkꞌeꞌtz welblal yi jun neꞌẍ wacẍaꞌtz, yi ja bnix itaꞌn. Poro jun cuꞌn, puchꞌuꞌl cuꞌn sbneꞌ waꞌn. 7 Cyekꞌekꞌ tuꞌ ja itaꞌw, poro yi icosech yil jeꞌ itaꞌn, iꞌtz jun chin salchcamb sbneꞌ. Na quiꞌt jal jun icojbil kalel jeꞌt icosech itaꞌn, nin quiꞌt jal jarin itaꞌn. Ej, yi nink jal, tetz tuꞌ awer nak sbneꞌ. 8 Niꞌcuꞌntz yi jak chiben bekꞌol yi eꞌ awernak cyakil yi eꞌ aj Israel, na quiꞌt muꞌẍ tal chixak ẍchiwutz. 9 Yaꞌstzun sbajok scyeꞌj, na ja ẍchaꞌk tan jakleꞌn ẍchꞌeybil cyetz scyetz yi eꞌ aj Asiria. Nin tan paj yi cyajtzaꞌklaꞌtz, niꞌcuꞌn tzun eꞌ tu jun smaron buruꞌ, yi qui na ocpon jun yol teꞌj wiꞌ. Nchaꞌtz yi eꞌ xonl Efraín, ja cyakꞌ chimeꞌbiꞌl scyetz yi eꞌ wunakaꞌtz tan jaleꞌn jun ichꞌeyeꞌn scyuchꞌ. 10 Poro quiꞌc na takꞌ yi mbi cuꞌn nchiban, na yi in wetz nocpon tan chixiteꞌn cuꞌn, nin tul jun tiemp yi xeꞌtok chan ẍchiwutz, quiꞌt jal chireyil, nka chibajxom tan chicaweꞌn.
11 ”Yaꞌstzun sbajok tan paj yi ja choꞌc yi eꞌ xonl kꞌajtzun Efraín tan banleꞌn jun cꞌoloj patbil chitxꞌixwatz,c yi ntin ja xcon tan ẍchꞌuyseꞌn mas yi quil. 12 Cuꞌnak intzꞌibal wiꞌnin chusuꞌn tan xconeꞌn cyaꞌn, poro qui na cyakꞌ kꞌej, na qui nin na chiban taneꞌn. 13 Tzatzin cuꞌn eꞌ oc tan toyeꞌn chitxꞌixwatz, nin ja baj yi ẍchiꞌbel yi eꞌchk oyaꞌtz cyakꞌun, poro yi in wetz yi in chiRyosil qui na chintzatzin scyeꞌj, na na ul txꞌakx tincꞌuꞌl yi eꞌchk takleꞌn cachiꞌ yi na chiban, nin swakꞌeꞌ chicaws tan yi quil yi na chijuch. Nin nchipakxok junt tir jalen Egipto taneꞌn. 14 Ja bnix chumbalaj caꞌl chireyil cyaꞌn, poro yi in wetz, yi in txumul cyetz, ja neꞌl te chicꞌuꞌl. Nchaꞌtz yi eꞌ aj Judá, ja bnix wiꞌnin tnum cyaꞌn yi tapij cuꞌn solteꞌj, poro tzꞌocpon kꞌaꞌkl waꞌn, nin stzꞌeꞌok cunin yi eꞌchk balaj caꞌlaꞌtz yi bnixnak cyakꞌun,” stzun Kataj Ryos bantz.