Yi xtxolil Oseas scyetz yi eꞌ aj Israel yi at tulbil chicaws
9
1 I bin jaluꞌ eꞌuꞌ aj Israel, quil chitzatzinuꞌ. Quil chitzꞌitpunuꞌ tan yi tzatziꞌn te yi jun balaj chicosechuꞌ chi na chiban yi eꞌ mas tnum. Na niꞌcuꞌn yi xtxolbilaꞌs tu jun wiꞌtz bnol tetz yi na tzatzin te yi pwok yi na stzꞌam scyeꞌj yi eꞌ tuchꞌ, na yi eꞌuꞌ cyeruꞌ ja cyaj cyen quiloluꞌ chiRyosiluꞌ tan xomeꞌn iwiꞌ scyeꞌj yi eꞌ mas ryos yi banij cuntuꞌ. Qui tzun chitzatzinuꞌ-tz tan yi balaj chicosechuꞌ na yaꞌstzun ẍchojoꞌnil chiyaꞌpluꞌ. 2 Poro quiꞌt jal junt balaj cosech cyanuꞌ, nin quiꞌt jal balaj win cyanuꞌ. Nin kol jal muꞌẍ win, quil tzꞌak. 3 Yi eꞌuꞌ xonl kꞌajtzun Efraín ẍchipakxokuꞌ junt tir Egipto taneꞌn tan paj cyajtzaꞌkluꞌ, nin yi eꞌuꞌ yil choponuꞌ pres Asiria ntin sbajk cumir cyanuꞌ yi xan ẍchiwutzuꞌ. Quiꞌt chinajeꞌuꞌ mas tiemp tul yi amaꞌleꞌj yi xansaꞌnt tan Ryos tetz iꞌ. 4 Quiꞌt baj taꞌal uva cyanuꞌ tan takꞌleꞌn kꞌej Ryos. Nin quiꞌt choꞌcuꞌ tan toyeꞌn chitxꞌixwatzuꞌ junt tir. Nin cyakil yi chiwaꞌuꞌ yi sjaloktz, iꞌtz yi eꞌchk takleꞌn yi xan kol chibajsajuꞌ. Nin tzꞌocpon il cꞌol scyeꞌj yi eꞌ yil baj yi jun jilwutz cumiraꞌtz cyaꞌn. Nin quiꞌt jal amaꞌl tan cyoyiluꞌ yi pamaꞌtz swutz Ryos. 5 Quiꞌt jal puntil cyanuꞌ tan ticyꞌseꞌn eꞌchk kꞌej yi tajweꞌn tan takꞌleꞌn kꞌej Kataj Ryos. 6 Chelponuꞌ ojk swutz yi chin il yi sbajok. Yi eꞌ aj Egipto scyakꞌeꞌ amaꞌl scyeruꞌ tan chinajeweꞌnuꞌ ẍchixoꞌl, poro quiꞌt chuꞌluꞌ junt tir tzoneꞌj, na ẍchimukxokuꞌ le tnum Memfis cwent Egipto. Yi chiryosiluꞌaꞌs yi sakal cuꞌn cyelblal, jopxok wutz tan xtzeꞌ. Nin sjalok laꞌ tu txꞌiꞌx tul cyakil amaꞌl yi na xcon cyanuꞌ tan cꞌuꞌlajeꞌn eꞌchk chiryosiluꞌaꞌtz.7 Eꞌuꞌ aj Israel, quibit tzajuꞌ, ja wiꞌt kocopon txeꞌ cyen yi tiemp tetz chicawsuꞌ,a nin ja wiꞌt kocopon txeꞌ cyen yi tiemp yi ẍchichojeꞌuꞌ yi quiluꞌ. Tzꞌelpon chitxumuꞌ tetz yi na tzan Ryos tan chicawseꞌnuꞌ yil tzꞌul yi tiempaꞌtz. Poro yi eꞌ cyeruꞌ ntin na chitzanuꞌ tan talcheꞌn swetz yi in jun elsanl stziꞌ Ryos yi yab, yi quiꞌc wajtzaꞌkl. Nin na cyaluꞌ yi xtxolbileꞌj, tan paj yi chin juntlen nin cyajtzaꞌkluꞌ, nin tan paj yi chin wutzileꞌn nin yi ẍchiꞌchbeꞌn chicꞌuꞌluꞌ sweꞌj. 8 Poro Ryos nchimbixban tan inxconeꞌn tetz elsanl stziꞌ iꞌ, nin tan inxconeꞌn chi jun aj ront, tan talcheꞌn scyeruꞌ yi tzꞌul chicawsuꞌb tan Kataj. Poro yi eꞌ cyeruꞌ, yi eꞌuꞌ xonl kꞌajtzun Efraín qui na quibituꞌ inyol, nin na cuꞌ paꞌtx cyanuꞌ tzinwutz, nicyꞌt nin le caꞌl Kataj, na chiꞌcheꞌt chicꞌuꞌluꞌ sweꞌj. 9 Ja poꞌtij cunin cyajtzaꞌkluꞌ, chi eꞌ banakeꞌ yi eꞌ aj Gabaa,c poro tzꞌul txꞌakx cyakil yi quiluꞌaꞌtz tcꞌuꞌl Kataj, nin tzꞌocpon iꞌ tan chicawseꞌn cuninuꞌ tan yi quiluꞌaꞌtz.
Yi eꞌchk takleꞌn yi ẍchitijeꞌ yi eꞌ aj Israel tan paj quil
10 Eꞌuꞌ aj Israel, je yol Katajeꞌj: “Axwok aj Israel, chumbalaj nin ban tetz wetz, yi ijaleꞌn cunin waꞌn. Niꞌcuꞌn iban tzinwutz chi yi na jal jun chꞌuyuj uva yi chin kꞌant nin tan jun yi na xon tul jun amaꞌl yi chin skej nin kale quiꞌcleꞌt aꞌ. Na yi chibeneꞌn wilol yi eꞌ imam iteꞌ, chumbalaj nin eꞌ ban tzinwutz. Niꞌcuꞌn chi na kil yi bajx wutz yi wiꞌ ibẍ yi chin kꞌant nin. Poro lastum ja chin cyaj cyen itilol nin ja itakꞌ itib tetz junt ryos yi na biꞌaj Baal-peor,d jun ryos yi banij cuntuꞌ, yi chin junt len nin. Yi ticyꞌeꞌn tiemp niꞌcuꞌn mban itajtzaꞌkl scyuchꞌ iryosilaꞌtz yi wiꞌnin na cxpekꞌwok scyeꞌj. 11 Ej nin tan paj yi jun ajtzaꞌklaꞌtz, quiꞌt jal chikꞌej yi eꞌ xonl Efraín. Na quiꞌt lchijal kaꞌn. Choꞌn ẍchibneꞌ chi na txꞌakxij jun chꞌuꞌl yi na ben joylaj. Quiꞌt chitzꞌij mas chinitxaꞌ. Quiꞌt jal mas xnaꞌn yi chꞌon wiꞌ ẍchixoꞌl. Quil cyekaj pwokil mas niꞌ. 12 Ej nin yi nink chixcyeꞌ tan chichꞌuyseꞌn cobox cyal, chelepon inmajol scyetz. Quiꞌt jal cyen jun chinitxajil. Lastum yi eꞌ wunakeꞌj, yil cheꞌ wil cyen. 13 Na na wil yi mbi na chiban yi eꞌ xonl Efraín scyeꞌj chinitxajil, na na choꞌc cyaꞌn chi ik txuc tuꞌ, nin na choꞌc tan chijatxleꞌn nin ẍchikꞌab yi eꞌ aj Baal tan chibiyleꞌn cuꞌn,”e stzun Kataj Ryos bantz swetz.
14 ¡Ma jaluꞌ Taꞌ takꞌtzaj binuꞌ chicaws yi eꞌ wunakeꞌj! ¡Quiꞌtk cyalaj yi eꞌ xnaꞌn jun cyal, nin quiꞌtk jal taꞌal quim tan chichꞌuyseꞌn!
Yi ẍchiꞌchbeꞌn cꞌuꞌl Kataj scyeꞌj yi eꞌ xonl Efraín
15 Ej nin je na tal Kataj Ryoseꞌj: “Iꞌtz le amaꞌl Gilgal kale nxeꞌteꞌt cyakil yi eꞌchk yab ajtzaꞌklaꞌtz, nin choꞌn nin xeꞌteꞌn yi ẍchiꞌchbeꞌn incꞌuꞌltz scyeꞌj. Nocpon tzuntz tan chilajeꞌn len le weri incaꞌl. Quiꞌt chimpekꞌ scyeꞌj, na cyakil yi chibajxom eꞌ len cuꞌn pajol incaꞌwl. 16 Ja wiꞌt chiloꞌon yi eꞌ xonl Efraín waꞌn, na niꞌcuꞌn eꞌ tu jun wiꞌ tzeꞌ yi ja wiꞌt skej yi taꞌkl, nin yi quiꞌt na wutzin. Nin kol jal chinitxajil nocpon tan chibiyleꞌn cuꞌn,” stzun Kataj bantz.
Xitok eꞌchk patbil chitxꞌixwatz yi eꞌ aj Israel
17 Yi jun jilwutz wunakeꞌj qui na cyek ẍchiꞌ yi inRyosil. Chaꞌstzun te chelpon lajuꞌn taꞌn, nin tuꞌ chipaꞌcaꞌp tuꞌ tulak eꞌchk tnum beneꞌn tziꞌn wi munt.