10
1 Niꞌcuꞌn yi tnum Israel tu jun wiꞌ uva yi jalt nin tan sajeꞌn wakꞌxuj eꞌchk kꞌab tan eꞌchk wutz. Poro te yi jaleꞌn mas chiriquil ja bnix mas patbil chitxꞌixwatz cyaꞌn, nin yi jaleꞌn mas walor chitnumil, ja choꞌc tan takꞌleꞌn mas yubel yi eꞌchk telblal yi chiryosil. 2 Cob wiꞌ taneꞌn chitxumuꞌn yi eꞌ wunakaꞌtz, chaꞌstzun te chitijeꞌ chicaws tan paj yi cyajtzaꞌklaꞌtz. Na tzꞌocpon Kataj tan xiteꞌn cuꞌn yi eꞌchk patbil chitxꞌixwatzaꞌtz. Nin tzꞌocpon tan trimpeꞌn cuꞌn yi eꞌchk telblal chiryosilaꞌtz.3 Ej nin yi eꞌ wunakaꞌtz scyaleꞌ: “Quiꞌc ketz kareyil at jaluꞌ, tan paj yi qui na kek ẍchiꞌ Ryos. Poro ik yi at jun kareyil, quiꞌc rmeril yi nink jal kuchꞌeyeꞌn teꞌj”. 4 Na yi eꞌ reyaꞌtz na chisuk wiꞌnin takleꞌn poro qui na cheꞌl cuꞌn teꞌj. Nin ntin na chitzan cweꞌseꞌn chibiꞌ te eꞌchk trat yi quiꞌc na takꞌ. Yi pujleꞌn xtisyaꞌ yi na chiban, niꞌcuꞌn tu jun wiꞌ itzaj yi wenen.
5 Wiꞌnin ẍchilucneꞌ yi eꞌ aj Samaria tan xoꞌw, wiꞌnin ẍchokꞌok, na tzꞌelepon majij yi neꞌẍ wacẍ scyetz yi oro cuꞌn yi na xcon tetz chiryosil, le amaꞌl Bet-avén.a Chaꞌstzun te wiꞌnin ẍchokꞌok yi eꞌ wunak scyuchꞌ yi eꞌ paleꞌ, na tzꞌelpon kꞌej yi jun luwaraꞌtz. 6 Na yi neꞌẍ wacẍaꞌtz, mben ticyꞌleꞌn jaleꞌn Asiria, nin stzꞌoylok scyetz yi wiꞌtz chireyil. Yil bajij yi xtxolbileꞌj, wiꞌnin ẍchitxꞌixwok yi eꞌ xonl kꞌajtzun Efraín. Yi eꞌ aj Israel ẍchitxꞌixwok tan paj yi mbi sbajok te chiryosil yi banij cuntuꞌ taneꞌn. 7 Nchaꞌtz sotzok chireyil yi najlij le tnum Samaria. Xtxꞌakxok chi na ben jun xleꞌm tzeꞌ wi aꞌ. 8 Ej nin xitok yi eꞌchk amaꞌl yi xan, cwent yi eꞌchk ryosaꞌtz yi banij cuntuꞌ quitaneꞌn, kale na chibeneꞌt yi eꞌ aj Israel tan juchleꞌn quil. Ẍchꞌuyok laꞌ tu txꞌiꞌx squibaj yi eꞌchk patbil chitxꞌixwatzaꞌtz, nin scyaleꞌ yi eꞌ wunak: “Niluꞌnk tzaj yi eꞌchk wutz tu eꞌchk juꞌwtz skibaj,” cheꞌch sbneꞌ. Na wiꞌnin ẍchixobok tetz yi caws Ryos yi tzꞌul squibaj.
Yi chicaws yi eꞌ aj Israel yi stkꞌeꞌ Ryos
9 Ej nin je na tal Kataj Ryoseꞌj: “Txeꞌn nin cyaj quilol yi eꞌ aj Israel yi cyajtzaꞌklaꞌtz tan juchleꞌn quil. Jetz yi ateꞌ tzaj le tnum Gabaa ¡iẍcuntunin eꞌ-tz tan juchleꞌn quil! Chaꞌstzun te copon jun chin oyintziꞌ waꞌn ẍchixoꞌl tul yi iteꞌn nin luwaraꞌtz. 10 Nocpon tan chicawseꞌn yil tzꞌopon yi tiempil. Na chuꞌl eꞌchk nación waꞌn tan oyintziꞌ scyeꞌj. Yaꞌstzun swulejeꞌ tan chicawseꞌn tan yi quil yi chin wutzileꞌn nin,” chij Kataj bantz.
11 “Niꞌcuꞌn yi eꞌ xonl Efraín tenẍchan chitaneꞌn jun tal neꞌẍ wacẍ yi mans, nin yi tzatzin cuꞌn ocnak tan yakꞌpeꞌn yi triw. Ma jaluꞌ tajweꞌn tan jeꞌn jun chin yucuꞌ waꞌn te chikul tan beneꞌn chikinol yi careꞌt. Nchaꞌtz yi eꞌ aj Judá mben chikinol yi chꞌoc. Nin yi eꞌ mas xonl Jacow chocpon tan kinleꞌn nin yi rastriy. 12 Na walnak scyetz: Joywok puntil tan banleꞌn taneꞌn eꞌchk takleꞌn yi jicyuch teꞌj, bantz jaleꞌn yi imbanl itaꞌn. Nucꞌwok cuꞌn itajtzaꞌkl, na ja ul tiemp tan ijoyol Kataj junt tir, na kol cxoꞌc cꞌulutxum jakꞌ caꞌwl iꞌ, quil tzꞌul icaws taꞌn, ma na tzꞌul cojol yi banl iꞌ tzitibaj chitaneꞌn jun balaj aꞌbal yi na akꞌon baꞌn tetz cosech. 13 Poro yi ax itetz ntin eꞌchk ajtzaꞌkl ploj na cxtzan tan xtxumleꞌn. Nin ntin eꞌchk takleꞌn ploj na ul tziwutz tan paj yi chin laꞌj nin axwok.
”Ma jaluꞌ, tan paj yi ntin na kꞌukeꞌ icꞌuꞌl te eꞌchk icareꞌt tetz oyintziꞌ, nin tan paj yi ntin na kꞌukeꞌ icꞌuꞌl scye yi eꞌ isanlar, 14 sbajok tzun jun chin oyintziꞌ-tz tziteꞌj, nin cyakil yi eꞌchk lmak itnumil copon wocꞌ. Niꞌcuꞌn sbajok tziteꞌj chi mbajij te yi tnum Bet-arbel tan yi rey Salmán, yi chin xoꞌwbil nin ban, na wiꞌnin xnaꞌn eꞌ loꞌon scyuchꞌ cyal. 15 Iteꞌn nin xtxolbilaꞌtz sbajok tziteꞌj yi axwok aj Betel, tan paj yi chin juchul il nin axwok. Squimok ireyil yi ntaxk ul skil.