Yi eꞌ tanum Ryos chin pajol caꞌwl nin eꞌ poro ilen nin na pekꞌ iꞌ scyeꞌj
11
1 ”Te yi acꞌajil tzaj yi tnum Israel, ja chimpekꞌ scyeꞌj. Nin ja cheꞌl tzaj waꞌn Egipto, na eꞌ innitxajil. 2 Poro yi woqueꞌn tan chimoxeꞌn tzaj, ja el chiẍkansal quib sweꞌj. Lastum yi eꞌ intanum, na ja cyoy chitxꞌixwatz scyetz chiryosil wunak. Nin ja chipat insens ẍchiwutz yi eꞌchk ryos yi banij cuntuꞌ quitaneꞌn. 3 Poro ilen nin ja noꞌc tan ẍchajleꞌn yi balaj beꞌ scyetz, nin ja noꞌc tan chichusleꞌn tan chixomeꞌn sweꞌj skꞌilcuꞌn. Poro qui nin pujx cyaꞌn yi iꞌtz in yi na chintzan tan chiqꞌuicyꞌleꞌn. 4 Nternin ja chimpekꞌ scyeꞌj, nin ja chijeꞌ inxakꞌol, nin ja cheꞌ inmaysaj wutz incꞌuꞌl chi ik eꞌ jun tal niꞌ yi na chitxutxun. Ja chincuꞌ mejlok tan chicꞌaꞌcheꞌn taneꞌn. 5 Poro yi eꞌ cyetz qui nin nkꞌukeꞌ chicꞌuꞌl sweꞌj. Chaꞌstzun te tajweꞌn tan chibeneꞌn pres tan sotzeꞌn chicꞌuꞌl chi banakeꞌ le tnum Egipto, na ẍchicawunk yi eꞌ aj Asiria squibaj. 6 Tzꞌul jun chin oyintziꞌ squibaj nin xituꞌn cunin sbneꞌ eꞌchk lmak chitnumil. Ẍchixitok bin tan paj yi chin junt len nin cyajtzaꞌkl, na ntin na chitzan tan xtxumleꞌn yi mbi junt yab ajtzaꞌklil ẍchibneꞌ. 7 Yi eꞌ intanumaꞌtz qui na chitxꞌixpuj cyajtzaꞌkl, qui na chipekꞌ sweꞌj. Na chiẍchꞌin tan jakleꞌn ẍchꞌeybil cyetz, poro cyaꞌl tzꞌocpon tan quichꞌeyeꞌn.8 ”Poro quiꞌc rmeril yi nink lwil cyen yi axwok itetz yi axwok xonl Efraín. Quiꞌc rmeril tzincolcyen axwok aj Israel. Quiꞌc rmeril nink noꞌc tan ixiteꞌn cuꞌn chi mimban te yi tnum Adma, nka iteꞌn nink cxwulej chi banak Zeboim waꞌn.a Na yi walmaꞌ nternin na okꞌ tziteꞌj. Wiꞌnin na el toꞌkl walmaꞌ tziteꞌjwok. 9 Wiꞌnin na chiꞌch incꞌuꞌl tziteꞌj, poro quil noꞌc tan ixiteꞌn cuꞌn, yi axwok xonl Efraín. Na yi in wetz in Ryos, nkꞌeꞌtz in tuꞌ jun wunak. I inaꞌtz yi jun yi chin xan nin, yi atin tzixoꞌl. Na qui nin nnuꞌl tan isotzajeꞌn cuꞌn.
10 ”Tzꞌul jun kꞌej yil cxomwok sweꞌj. Chin ẍchꞌink tan imoxeꞌn tzaj chi na ẍchꞌin jun león, nin choꞌn cxsajkwok lakak amaꞌl toqueꞌn tziꞌn. Wiꞌnin ilucneweꞌn sbneꞌ yil cxuꞌlwok sweꞌj.
11 ”Choꞌn ẍchisajk Egipto, nin chuꞌl sweꞌj chi jun cꞌoloj chꞌuꞌl. Nin at eꞌ yi choꞌn ẍchisajk Asiria, chi jun cꞌoloj plomẍ. Swakꞌeꞌ amaꞌl scyetz tan chinajeweꞌn junt tir xeꞌak chicaꞌl le chitanumeꞌj. Jun cuꞌn sbajok yi xtxolbilaꞌseꞌj, na in Ryos, nin na neꞌl cuꞌn te inyol.
Chin junt len nin cyajtzaꞌkl yi eꞌ tanum Ryos
12 ”Poro yi jaluꞌ, eꞌ xonl Efraín ntin laꞌjil na cyal swetz, nin yi eꞌ mas aj Israel ntin na chijoy puntil tan insubleꞌn kloꞌ. Ej nin yi eꞌ aj Judá ja chincyaj cyen quilol, wech in chiRyosil yi ja kloꞌ kꞌukeꞌ chicꞌuꞌl sweꞌj.