12
1 ”Yi eꞌ aj Efraín ntin na baj cyekꞌekꞌ cyaꞌn taneꞌn, nin cyakil kꞌej na chixomnin tan stzꞌamleꞌn kloꞌ yi jun jilwutz cyekꞌekꞌ yi choꞌn na tzaj teleꞌn tziꞌn.a Yi na bixeꞌ chitrat scyuchꞌ yi eꞌ aj Siria scyuchꞌ yi eꞌ aj Egipto, na cyoy balaj aceitil wutz oliw scyetz.” 2 Chaꞌstzun te ja cuꞌ jun chin oyintziꞌ tan Ryos ẍchixoꞌl yi eꞌ aj Israelaꞌtz. Stkꞌeꞌ chicaws yi eꞌ xonl Jacowaꞌtz tan paj yi eꞌchk takleꞌn cachiꞌ yi na chiban. Tzꞌocpon bin tan chicawseꞌn tan yi cyajtzaꞌkl. 3 Ej nin niꞌcuꞌn cyajtzaꞌkl tu tajtzaꞌkl yi kꞌajtzun chimam Jacow, na te yi ntaxk itzꞌij oc tan subleꞌn cuꞌn yi stzicy.b Ej nin yi toqueꞌn tetz yaj ja pil tib tu Ryos.c 4 Na ja chipil quib tu jun ángel, nin ja xcyeꞌ Jacow tan stzꞌamleꞌn cuꞌn. Poro ja okꞌ iꞌ, nin ja jak tetz yi ángel yi nink tzꞌel kꞌajab teꞌj tan tkꞌol banl. Nchaꞌtz ja ẍchaj tib junt tir Ryos tetz le amaꞌl cwent Betel,d nin ja jilontz tetz. 5 Yi biꞌ yi jun Ryosaꞌtz iꞌtz: Yi Ryos yi cyaꞌl na xcyeꞌ quen teꞌj. 6 Chaꞌstzun te axwok aj Israel, baꞌn tcuꞌn yi nink cxpakxijwok teꞌj iꞌ, chi banak Jacow. Akꞌwok itib tan ixconeꞌn tetz nin tajweꞌn yi jicyuch sban te itajtzaꞌkl swutz iꞌ. Ej nin tajweꞌn yi ilen nin kꞌukek icꞌuꞌl teꞌj.
7 “Na axwok len aj lijens, axwok len subul nak chi quitaneꞌn yi eꞌ aj Canaán yi na xcon maꞌlbil cyaꞌn yi nkꞌeꞌtz tzꞌaknak cuꞌn, na yi itajbil iꞌtz tan poyseꞌn chiwutz yi eꞌ lokꞌol. 8 Ej nin na ital ticꞌuꞌl cuntuꞌ: Oꞌ ric jaluꞌ, ja jal jun cꞌoloj kameꞌbiꞌl. Ej nin cyaꞌl jun xcyek tan lajluchaxeꞌn yi ja jal kariquil tan poyseꞌn tuꞌ chiwutz wunak, cxchijwok na ban. 9 Jetz yi iteleꞌn tzaj Egipto yi in wetz in iRyosil, swaleꞌ nin tzun tzitetz: Jun cuꞌn yol cxnajank junt tir waꞌn jakꞌ tal mantial tuꞌ chi iban yi iteleꞌn tzaj jak caꞌwl eꞌ aj Egipto.
10 ”Nin ja chixcon yi eꞌ elsanl intziꞌ waꞌn tan xtxoleꞌn yi inchusuꞌn tzitetz. Nin ja inchaj mas xtxolbil scyetz chi tul wutzicyꞌ taneꞌn. Ja chixcon yi eꞌ elsanl intziꞌaꞌtz waꞌn tan makleꞌn kloꞌ iwutz. 11 Yi axwok itetz, at wiꞌnin iryosil le amaꞌl Galaad. Wiꞌnin na itakꞌ itxꞌixwatz yi tor scyetz, na naꞌ cuntunin atit patbil itxꞌixwatz. Na at jun cꞌoloj patbil itxꞌixwatz chi taneꞌn eꞌchk muluj cꞌub yi at tulak eꞌchk cojbil.”
12 Ulk txꞌakx chicꞌuꞌluꞌ yi ja oc Kataj Ryos tan qꞌuicyꞌleꞌn yi kꞌajtzun Jacow, yi teleꞌn ojk tan tponeꞌn le amaꞌl cwent Aram. Nin te yi at iꞌ tul yi jun amaꞌlaꞌtz ja oc tetz pstor cneꞌr, tan lokꞌcheꞌn yi txkel. 13 Nchaꞌtz ulk txꞌakx chicꞌuꞌluꞌ yi ja oc Kataj Ryos tan chiqꞌuicyꞌleꞌn yi eꞌ xonl kꞌajtzun Jacowaꞌtz, nin ja xcon jun elsanl stziꞌ iꞌ tan chiqꞌuicyꞌleꞌn te yi ateꞌ tzaj Egipto. Nin ja xcon yi jun elsanl stziꞌ aꞌtz tan cyelseneꞌl tzaj ẍchikꞌab yi eꞌ aj Egipto. Ej nin tan iteꞌn nin elsanl stziꞌ iꞌaꞌtz ocnak iꞌ tan chiqꞌuicyꞌleꞌn te yi ateꞌ tzaj le amaꞌl yi tzꞌinunin tuꞌ. 14 Poro yi eꞌ xonl Efraínaꞌtz, yi eꞌ aj Israel, ja cyakꞌ wiꞌnin chꞌon tetz talmaꞌ Kataj Ryos, nin ja cyakꞌ bis oꞌkl tetz. Chaꞌstzun te tajweꞌn tan chichojol tircuꞌn yi quil yi nchijuch swutz iꞌ. Na eꞌ teꞌn chichojeꞌ yi cyajtzaꞌklaꞌtz yi chin juntlen nin.