Yil chixit cunin yi eꞌ aj Israel tan Ryos
13
1 Tenẍchan yi na chijilon yi eꞌ xonl Efraín ẍchixoꞌl cmon yi na bajij jun txumuꞌn, cyakil yi eꞌ mas kꞌuꞌj Israel, ja quibit chiyol, na at chikꞌej. Poro yi eꞌ xonl Efraín ja chiquim taneꞌn jaluꞌ, nin ja el chikꞌej tan paj yi cyoqueꞌn tan lokꞌeꞌn wutz yi jun ryos yi na biꞌaj Baal. 2 Ej nin ilen nin na chitzaneꞌt tan juchleꞌn quil, na na choꞌc tan banleꞌn eꞌchk chiryosil yi sakal cuꞌn. Mbi cuntunin eꞌchk teblalil na chiban cuꞌn. Nin yi na bnix cyaꞌn na cyal: “Kakꞌeꞌ katxꞌixwatz swutz karyosileꞌj,” nin cyakil yi eꞌ wunak na choꞌc tan stzꞌubleꞌn yi eꞌchk teblal neꞌẍ wacẍaꞌtz tan chicꞌuꞌlajeꞌn. 3 Chaꞌstzun te ẍchixitok yi eꞌ aj Israel chi na ban sbakꞌ jalchan yi tu na tzaj cuntuꞌ yi na jeꞌul kꞌej. Nka ẍchixitok chi taneꞌn kꞌab cheꞌw yi jalcunin na xit yi na jeꞌul kꞌej. Nka chelpon xit chi na ban stzꞌisil triw yi na el chit tan cyekꞌekꞌ. Ej nin ẍchixitok chi na ban sib yi tu na tzaj cuntuꞌ tul cyekꞌekꞌ.4 Ej nin je na tal Kataj Ryoseꞌj: “Yi in wetz in iRyosil jetz yi atix tzaj jakꞌ caꞌwl Egipto. Ntin cuꞌn in iRyosil, na ntin cuꞌn in, in colpinl itetz. 5 Ej nin noꞌcnakin tan iqꞌuicyꞌleꞌn te yi atix le amaꞌl yi tzꞌinunin tuꞌ, yi chin skej nin.
6 ”Poro yi jaleꞌn wiꞌnin icosech, yi qui nin ncxcyeꞌwok tan bajseꞌn, ja tzun itocsaj itibtz nim tu itajtzaꞌkl, nin ja neꞌl te icꞌuꞌl. 7 Chaꞌstzun te nocpon chi jun león taneꞌn yi na tzan tan ichꞌiweꞌn xlaj beꞌ. Ej nin nocpon chi jun leopardo yi nternin na wutz cyen tziteꞌj tan ibajseꞌn te yi na cxonwok tbeꞌ. 8 Nocpon tan ibiyleꞌn cuꞌn chi na ban jun tij oso yi na tzan tan joyleꞌn yi tal neꞌẍ tal yi ja txꞌakxij. Nin nocpon tan katzleꞌn cuꞌn italmaꞌ, nin cxbajkwok waꞌn taneꞌn chi na ban jun león tan bajseꞌn yi ẍchib. Nocpon tan ikatzleꞌn cuꞌn chi na ban jun smaron txuc yi at weꞌj teꞌj. 9 Axwok aj Israel, nocpon tan ixiteꞌn cuꞌn, nin cyaꞌl jun xcyek tan inmakleꞌn. 10 ¿Naꞌ tzun ateꞌt yi eꞌ ireyilaꞌtz yi ilen nin ja choꞌc tan iclaxeꞌn kloꞌ? ¿Nin naꞌ ateꞌt yi eꞌ wiꞌtz ajcaw yi ja ijakwok swetz? Cyaꞌl jun at jaluꞌ. 11 Ja chiꞌch incꞌuꞌl tziteꞌj yi wakꞌol ireyil. Nin na chiꞌcheꞌt incꞌuꞌl yi cyeleꞌn waꞌn.
12 ”Tzꞌibaꞌnt cyakil yi itajtzaꞌkl cachiꞌ waꞌn, nin tzꞌibaꞌnt cyakil itil waꞌn. 13 Niꞌcuꞌn axwok tu jun niꞌ yi ja opon tiempil tan tuleꞌn itzꞌok, poro qui na pujx taꞌn yi mbiꞌtz tajweꞌn tan bnol tan tuleꞌn wuskil. 14 Quiꞌt tzun noꞌctz tan cyelseꞌn liwr tkꞌab yi julil almaꞌ. Nin quil noꞌctz tan chicolpeꞌn tkꞌab quimichil. Loꞌk tzꞌul ẍchamil yi quimichil. Loꞌk tzꞌul ẍchamil yi julil almaꞌ tan chixiteꞌn cuꞌn.a Juncuꞌn quil tzꞌelepon inkꞌajab scyeꞌj, nin quil txꞌixpuj yi wajtzaꞌklaꞌtz. 15 Yi nink chiwutzin yi eꞌ aj Israel chi na ban jun wiꞌ buch, chucuꞌl tzun chicontr tan majleꞌn cyakil chimeꞌbiꞌl, chi na ban yi jun cyekꞌekꞌ yi choꞌn na saj teleꞌn tziꞌn, tan stzꞌeꞌseꞌn cyakil yi aꞌ yi na itzꞌij le chitanum. Na chuꞌl chicontr tan majleꞌn len cyakil chimeꞌbiꞌl yi wiꞌnin jamel. 16 Yi eꞌ aj Samaria ẍchitijeꞌ qꞌuixcꞌuj, tan paj yi ja chipaj incaꞌwl yi in wetz, yi in chiRyosil. Chaꞌstzun te ẍchiquimok tan spar nin yi chinitxajil chijepon joꞌliꞌn wutz cꞌub, nin yi eꞌ chꞌon wiꞌ, katzij cuꞌn sbneꞌ chicꞌuꞌl.