Yi toqueꞌn Oseas tan chimoxeꞌn yi eꞌ xonl Israel tan chixomeꞌnt teꞌj Kataj Ryos
14
1 ”Eꞌuꞌ aj Israel, yi eꞌuꞌ yi ja chibenuꞌ tul il tan paj cyajtzaꞌkluꞌ cachiꞌ, chipakxokuꞌ tan chixomeꞌnuꞌ te Kajcaw yi kaRyosil. 2 Chipakxokuꞌ swutz Kajcaw, nin baꞌn lcyaluꞌ tetz: ‘Taꞌ cuyuꞌ kapaj katxꞌokꞌbeꞌn, nink cujijuꞌ yi kakꞌajsbil yi na katzan jaluꞌ tan toyeꞌn teruꞌ. 3 Na yi eꞌ aj Asiria quil chixcyeꞌ tan kacolcheꞌn. Nchaꞌtz quil kaclax mpe nink xcon chej kaꞌn, na quil keꞌl liwr ẍchikꞌab kacontr. Max cꞌuꞌluꞌ Taꞌ, na quiꞌt lkal iluꞌ karyosil tetz alchok eꞌchk takleꞌn yi banij cuntuꞌ kakꞌun. Na ntin iluꞌ teruꞌ na el kꞌajabuꞌ scyeꞌj yi eꞌ tal meꞌbaꞌ.’ Chumbalaj nin yi nink cyaluꞌ yi jun yolaꞌseꞌj.”Yi sukil Kataj Ryos jun acꞌaj itzꞌajbil scyetz cyakil yi eꞌ xonl Israel
4 Ej nin je na tal Kataj Ryoseꞌj: “Nocpon tan xtxꞌixpeꞌn yi cyajtzaꞌkl yi chin junt len nin. Nkꞌeꞌtz kloꞌ tajweꞌn, poro chimpekꞌokt scyeꞌj. Na quiꞌt chiꞌch incꞌuꞌl scyeꞌj. 5 Swakꞌeꞌ chibanl yi eꞌ xonl Israel chi na ban kꞌab cheꞌw tan xtxaꞌxeꞌn eꞌchk balaj buch. Nin mben cyakan ttxꞌotxꞌ taneꞌn. Quil chiyucan muꞌẍ tal. Chocopon chi taneꞌn yi wutz Líbano. 6 Nchiben loꞌon chitaneꞌn yi eꞌchk kꞌab wiꞌ oliw yi chin yubeꞌn nin. Nin mben loꞌon chicꞌoꞌcal chi na ban yi xan tzeꞌ yi na jal Líbano. 7 Ẍchitzꞌok junt tir yi eꞌ xonl Israel, nin nocpon tan chiqꞌuicyꞌleꞌn. Ẍchichꞌuyok waꞌn chi na chꞌuy yi balaj triw. Sjalok chixuꞌmil chi na jal xuꞌmil yi balaj wutz uva. Nin sjalok chikꞌej, chi yi kꞌej yi taꞌal uva yi na jal le amaꞌl cwent Líbano. 8 Ej nin scyaleꞌ yi eꞌ xonl Efraín: Quiꞌct chixac yi eꞌchk ryos yi banij cuntuꞌ quitaneꞌn sketz. Nin yi Kataj Ryos staleꞌ: Yi in wetz in yi jun yi na noꞌc tan chiqꞌuicyꞌleꞌn yi eꞌ intanumaꞌtz, ej nin niꞌcuꞌn wutaneꞌn chi jun wiꞌ tzeꞌ yi txaꞌx cuntunin xaktz. Nin choꞌn sjalok yi eꞌchk takleꞌn yi tajweꞌn scyetz sweꞌj,” stzun Kataj bantz.
Wiꞌtzbil yol
9 Loꞌk tzꞌel chitxum yi eꞌ wunak yi tzꞌaknak cuꞌn cyajtzaꞌkl te yi xtxolbilaꞌseꞌj, yi eꞌ wunak yi na chiqꞌuicyꞌlej quib tkꞌab jun il yi at ẍchiwutz. Na chin jicyuch nin yi ẍchusuꞌn tu yi caꞌwl Kataj yi at tul. Ej nin yi eꞌ balajnak na chixom teꞌj. Poro yi eꞌ mal nak, na chijeꞌ tzotp te caꞌwl iꞌ.