JOEL
Yi loꞌoneꞌn yi eꞌchk ujul cyakꞌun sacꞌ
1
1 Je yi xtxolbileꞌj yi talnak Ryos chi tul wutzicyꞌ taneꞌn tetz yi elsanl stziꞌ iꞌ yi na biꞌaj Joel, yi cyꞌajl Petuel, tan talol scyetz yi eꞌ xonl Israel.2 Axwok wiꞌ banl wiꞌ, nchaꞌtz axwok yi atixwok beneꞌn tziꞌn Judá, bitwok tzaj yi xtxolbileꞌj. Qui otoj na bajij yi xtxolbileꞌj yi na bajij tzixoꞌlwok jaluꞌ, mpe ik te yi tiemp yi ateꞌ tzaj yi eꞌ imam iteꞌ.
3 Ej nin baꞌn tzitxol yi eꞌchk takleꞌnaꞌtz scyetz eꞌ initxaꞌ, nin yi eꞌ cyetz baꞌn chitxol scyetz yi cyetz chinitxajil. Ma yi eꞌ cyetz chinitxajil, baꞌn chitxol scyetz yi eꞌ mas chixonl yi ẍchitzꞌok sbneꞌ opon tunintz.
4 Baꞌn tzitalwok yi xtxolbileꞌj: Cyakil yi kujul, ja tzaj cuꞌn cyakꞌun sacꞌ.a Quiꞌc nin jun wiꞌ nclax cyen, na junawes xomcheꞌ tan bajseꞌn, na yi na clax tkꞌab jun, xomt tzaj junt tan bajseꞌn.
Yi mbi na ẍchaj yi sotzaj cꞌuꞌlal yi ncyakꞌ yi eꞌ sacꞌ
5 Ma jaluꞌ axwok yi na oc aꞌ tiwiꞌ, elk iwatl, bisunwok nin okꞌenwok, na mpe ik yi taꞌal uva quiꞌt ljal. Na tzꞌelepon majij tzitetz.
6 Na yi jun cꞌoloj sacꞌaꞌtz yi nchuꞌl pokꞌ le itanum, chin cham nin eꞌ. Niꞌcuꞌn eꞌ tu jun cꞌoloj sanlar yi nchuꞌl tan oyintziꞌ tziteꞌj. Chin xoꞌwbil nin eꞌ, na yi chitziꞌ, niꞌcuꞌn tu cyeꞌ balumb yi na xcyeꞌ tan wochꞌleꞌn cyakil eꞌchk takleꞌn.
7 Nin cyakil eꞌchk wiꞌ uva yi awij itaꞌn, ja el cuꞌn cyaꞌn swutz. Nchaꞌtz cꞌupluꞌn cuꞌn ncyulej yi eꞌchk wiꞌ ibẍ. Tircuꞌn yi jalcꞌoqꞌuil ja baj chibajsal, nin ja baj chitrimpul cyakil. Chin sakt nin mban cyen eꞌchk kꞌab tzeꞌ cyaꞌn, na ja baj yi jalcꞌoqꞌuil cyaꞌn.
8 Axwok intanum, okꞌenwok chi na okꞌ jun xun yi na quim yi trat te yi umeweꞌn tlen tuꞌ ateꞌt. Nin chi na oc yi beꞌch tetz te yi jun xunaꞌtz yi na ẍchaj yi wiꞌnin na bisun, yaꞌstzun banwok itetz tan ẍchajleꞌn yi na cxbisun.
9 Nchaꞌtz chokꞌok yi eꞌ paleꞌ, na quiꞌt tzꞌopon eꞌchk oy xe incaꞌl, na quiꞌt jal wutz yi cojbil, nin quiꞌt jal win tan itoyil swetz.
10 Nchaꞌtz cyakil yi eꞌchk amaꞌl beneꞌn tziꞌn Israel, sbisunk, na chin tzꞌinunin tuꞌ sbneꞌ. Quiꞌct xtxaꞌxal yi eꞌchk cojbil, na yi triw yi awij itaꞌn, tircuꞌn ja el cuꞌn swutz. Nchaꞌtz yi uva, tircuꞌn ja skej, nin yi eꞌchk wiꞌ oliw tircuꞌn ja chitzꞌumin.
11 Nchaꞌtz yi axwok yi na cxakꞌuj wi cojbil, bisunwok. Okꞌenwok, na quiꞌct cosech sbneꞌ. Quiꞌct cosech beneꞌn tziꞌn Israel, na tircuꞌn ja loꞌon. Quiꞌct uva, quiꞌct triw, nin quiꞌct cebada sbneꞌ.
12 Na tircuꞌn yi uva yi awij, ja skej. Nin ja loꞌon cyakil eꞌchk ujul ibẍ. Nchaꞌtz yi granado, tu yi palmera, nin yi mansaꞌn tu eꞌchk mas jilwutz loꞌbaj yi at, tircuꞌn ja loꞌon, nin cyakil wunak cwent Israel, na chibisunlen.c
13 Nchaꞌtz axwok paleꞌ tu axwok yi na cxakꞌuj xe incaꞌl, bisunwok. Wekwok itib te eꞌchk beꞌchok yi na ẍchaj yi na cxbisun. Okꞌenwok tan yi sotzaj cꞌuꞌlal, na quiꞌt jal ixiꞌn triw tu win xe incaꞌl tan itoyil swetz.
14 Chakwokeꞌ bin cyakil itanum, yi eꞌ wiꞌ banl wiꞌ, scyuchꞌ cyakil wunak. Nin bixek jun kꞌej itaꞌn tan mucꞌleꞌn weꞌj tan jakleꞌn cuybil ipaj. Xanswok yi jun kꞌejaꞌtz, nin baꞌn tzimol itib le caꞌl Ryos. Nin cuk iwutz tetz.
15 Lastum axwok na txant tan tuleꞌn yi kꞌejlal yil tzꞌul yi Kataj Ryos tan takꞌleꞌn chicaws yi eꞌ tetz contr. Chin xoꞌwbilt cunin sbneꞌ na chin cham nin iꞌ, na na xcyeꞌ te cyakil.d
16 Skawutz cuꞌn ja el majij kawaꞌ. Nin skawutz cuꞌn ja tzaj yi tzatziꞌn xe caꞌl Kataj.
17 Nin cyakil yi ij yi cuꞌnak awij, quiꞌt jeꞌul. Nin yi ixiꞌn triw ja wiꞌt skej jakꞌ txꞌotxꞌ. Chin bisbil nin eꞌchk cꞌojaj tu eꞌchk cuꞌlbil ixiꞌn triw, na quil jal cosech.
18 Nchaꞌtz na chiẍchꞌin cyakil txuc tan weꞌj. Teẍ tunin choꞌjkel yi tal prow wacẍ tan joyleꞌn chiwaꞌ, poro quiꞌt jal cyaꞌn. Nchaꞌtz yi eꞌ cneꞌr wiꞌnin eꞌ ẍchiquimok tan paj yi quiꞌc chiwaꞌ, na tircuꞌn yi chꞌim ja wiꞌt skej.
19 Poro yi iluꞌ teruꞌ Wajcaw, choꞌn na cuꞌ inwutz teruꞌ, na ja tzꞌeꞌ cyakil yi eꞌchk amaꞌl beneꞌn tziꞌn tan kꞌej. Ja tzꞌeꞌ cyakil yi eꞌchk amaꞌl tetz pstorbil tu eꞌchk wiꞌ tzeꞌ yi at beneꞌn tziꞌn.
20 Nchaꞌtz cyakil eꞌ smaron txuc na cuꞌ chiwutz teruꞌ, na ja skej cyakil eꞌchk tzanlaꞌ, nin ja skej cyakil yi amaꞌl tetz pstorbil yi at beneꞌn tziꞌn.e