ABDÍAS
Yil tzꞌel chitxꞌix yi eꞌ aj Edom
1
1 Yi eꞌchk xtxolbil yi na jal kaꞌn tul yi liwreꞌj, iꞌtz yi xtxolbil yi alijt cyen tan Kataj Ryos, yi Cawl ketz, tetz Abdías chi tul wutzicyꞌ taneꞌn. Ej nin yi eꞌchk xtxolbilaꞌtz yaꞌstzun yi sbajok te yi eꞌ aj Edom.Ja bin kubit jun xtxolbil yi ja saj tlol Kataj, nin ja ben jun ẍchakum iꞌ tan xtxoleꞌn scyetz yi eꞌ wunak yi najlcheꞌ lakak tnum beneꞌn tziꞌn.a Nin je yol ẍchakumeꞌj: “¡Quin! ¡Kabenk tan oyintziꞌ scyeꞌj yi eꞌ aj Edom!”b chij yi jun ẍchakumaꞌtz.
Nchaꞌtz Kataj Ryos na tzan iꞌ tan talcheꞌn scyetz yi eꞌ aj Edom:
2 “Quiꞌct mas ixoneꞌn sbneꞌ cyen waꞌn ẍchiwutz yi eꞌchk mas nación, nin tzꞌelpon cunin itxꞌix waꞌn.
3 Na iteꞌn nin yi inimel ja xcyeꞌ tan lamcheꞌn iwutz. Na taneꞌn tziwutz itetz, yi tan paj yi choꞌn najlquix tulak eꞌchk picy wiꞌwtz, cyaꞌl nin tzun jun nink xcyeꞌ-tz tan ixiteꞌn cuꞌn.
4 Poro quiꞌc na ban, na mpe nink cxnajeꞌ kale na cweꞌt chisoc yi eꞌ qꞌuilqꞌuitx, nka penink cxnajeꞌ tcyaꞌj teꞌj jun txꞌuml, quil cxeꞌl liwr tinkꞌab, nin xcopon incꞌoxol wuxtxꞌotxꞌ.”
5 Je yol Kataj Ryoseꞌj yi tzꞌelpon cuꞌn teꞌj: “Yi nink choꞌc cobox alkꞌom tan talkꞌeꞌn len eꞌchk itakleꞌn, quil chixcyeꞌ tan telseꞌn len tircuꞌn. Nchaꞌtz kol chopon yi eꞌ aj jeꞌsanl cosech uva txoꞌl icosech, ilen nin scyajk cyen cobox chꞌuyuj cyaꞌn. Poro yi eꞌ icontr chixcyek tan itelseꞌn cunin swutz, quiꞌct nin muꞌẍ isenil lcyaj cyen.
6 Axwok xonl kꞌajtzun Esaú,c je cuꞌn ẍchibneꞌ icontr tziteꞌj. Tircuꞌn imeꞌbiꞌl tzꞌelepon cyaꞌn. Txoyiꞌn cuꞌn lcyulej. ¡Quiꞌc imeꞌbiꞌl scyajk cyen!
7 Tircuꞌn yi eꞌ, yi junit mban itajtzaꞌkl scyuchꞌ tan ichꞌeyal itib tzitibil itib, quiꞌt lcheꞌl cuꞌn te chiyol yi nchisuk tzitetz, na chixcyek tan ilajeꞌn len swutzak eꞌchk icojbil. Nin tircuꞌn yi eꞌ itajwutz, eꞌ teꞌn chocopon tan contriꞌn tziteꞌj, nin yi eꞌ itamiw yi nternin kꞌuklij icꞌuꞌl scyeꞌj, eꞌ teꞌn lcuꞌsan eꞌchk tramp tziwutz. ¡Poro quil tzꞌicyꞌ tzitetz!” chij Kataj Ryos.
8 Je yol Kataj Ryoseꞌj yi tzꞌelpon cuꞌn teꞌj: “Yil tzꞌopon yi tiemp yil noꞌc tan chicawseꞌn yi eꞌ aj Edom, chicopon imbiyol cyakil yi eꞌ yi chin tzꞌaknak cuꞌn cyajtzaꞌkl,d nin tzꞌelpon incyꞌal yi cyajtzaꞌkl yi eꞌ yi najlcheꞌ wutz wutz cwent yi amaꞌl yi wakꞌnak tetz Esaú tu yi eꞌ tetz xonl. Cyaꞌl nin jun sclaxk cyen.
9 Na yi eꞌ sanlar cwent Temán,e wiꞌnin chilucneꞌ tan xoꞌw. Nin tul yi eꞌchk amaꞌl yi wakꞌnak tetz Esaú yi at xoꞌl wutz, cyaꞌl nin jun nink tzꞌitzꞌij cyen.
Yi quil yi eꞌ aj Edom
10 ”Tircuꞌn axwok tzꞌelpon itxꞌix nin cxelponwok waꞌn swutz, tan paj yi ja cxoꞌcwok tan chibuchleꞌn nin tan chibiyleꞌn cuꞌn yi eꞌ ixonl, yi eꞌ xonl kꞌajtzun Jacow.f
11 Na te yi cyoqueꞌn yi eꞌ contr tan majleꞌn len tircuꞌn yi meꞌbiꞌl yi at Jerusalén, nin yi cyoqueꞌn yi eꞌ sanlar yi eꞌ len cuꞌn awer nak tan pokꞌleꞌn eꞌchk puertil yi tnum, yi ax itetz quiꞌc nin jun takleꞌn iban tan chicolcheꞌn yi eꞌ yi najlcheꞌ-tz, ma na nin jeꞌ itancꞌul itib tbeꞌ. Nin te yi cyoqueꞌn tan txꞌiluꞌn te yi eꞌchk takleꞌn yi baj chicambal, nin yi beneꞌn cyekal tircuꞌn yi meꞌbiꞌlaꞌtz le chitanum, jalcunin xomeꞌn iwiꞌ scyeꞌj.g
12 Lastum yi wiꞌnin acxtzatzineꞌnwok yi itilol yi cyeleꞌn cuꞌn yi eꞌ ixonl swutz, yi eꞌ aj Judá. Lastum yi yaꞌtz mmibanwok yi cyeleꞌn cuꞌn swutz. Lastum yi ja cxtzeꞌenwok scyeꞌj te yi ateꞌ tul bis oꞌkl.h
13 Lastum yi ja cxoꞌcwok le intanum, te yi na chitzan yi eꞌ intanum tan tijleꞌn qꞌuixcꞌuj. Lastum yi ja cxtzatzin te yi il yi na bajij ẍchixoꞌl. Lastum yi ja cxoꞌcwok tan talkꞌeꞌn len eꞌchk chimeꞌbiꞌl tul yi jun kꞌejaꞌtz yi chin xoꞌwbil nin ban tetz cyetz.
14 Lastum yi ja cxcyeꞌ cuꞌnwok tan chichꞌiweꞌn lakak ẍchꞌicyꞌ beꞌ tan chibiyleꞌn cuꞌn yi eꞌ yi ja cheꞌl ojk tan coloꞌn ib.
15 Ma jaluꞌ, iteꞌn nin xtxolbilaꞌtz sbajok tziteꞌj itetz, quib yi ibanak scyeꞌj yi eꞌ-aꞌtz. Iteꞌn nin qꞌuixcꞌujaꞌtz na chꞌiwan tan tuleꞌn tziwutz, poro ipaj nin iteꞌtz.
Yil jalt chikꞌej yi eꞌ xonl Israel
”Tzꞌul chan yi kꞌejlalaꞌtzi yil ticyꞌsaj cunin cꞌuꞌl Ryos scyeꞌj cyakil yi eꞌchk tnum beneꞌn tziꞌn wi munt.j
16 I bin jaluꞌ axwok jun cꞌoloj aj Israel, chin cꞌaꞌ nin yi aꞌ yi mbaj itaꞌnk wiꞌ weri injuꞌwtz, yi wiꞌnin xanil. Nchaꞌtz iteꞌn nin cꞌaꞌalaꞌtz sbneꞌ yi aꞌ yi sbajk cyaꞌn yi eꞌ mas tnum yi ateꞌ beneꞌn tziꞌn wi munt. Jepon chicꞌajol yi aꞌaꞌtz jalen yil chijeꞌ tzipt. Nin yil baj yi jun aꞌaꞌtz cyaꞌn, tircunin tzun eꞌ ẍchisotzoktz.
17 Poro yi jun juꞌwtz yi na biꞌaj Sión, tzꞌocpon tetz jun amaꞌl yi chin xan nin. Nin at eꞌ yi choꞌn ẍchiclaxok ẍchikꞌab chicontr.l Na at eꞌ xonl Jacow ẍchicambajeꞌ junt tir yi eꞌchk amaꞌlaꞌtz yi cyetz nin.
18 Na yi eꞌ xonl kꞌajtzun Jacow chocpon chi ik jun chin kꞌakꞌ. Nin yi eꞌ xonl kꞌajtzun Ẍep chocpon chi ik xuꞌm kꞌakꞌ yi na tincꞌuꞌn. Ma yi eꞌ xonl Esaú chocopon chi taneꞌn jun bocꞌoj chꞌim yi na oc kꞌaꞌkl. Ẍchitzꞌeꞌok len cuꞌn, nin ẍchibajk tan yi kꞌakꞌaꞌtz. Quiꞌc nin jun nink clax cyen, na yaꞌstzun yi xtxolbil yi walnak yi tzꞌelpon cuꞌn teꞌj.”
19-20 Ej nin yi eꞌ xonl Israel yi najlcheꞌ Néguev scyetzajeꞌm yi eꞌchk chiꞌamaꞌl yi eꞌ xonl Esaú yi at wiꞌwtz.n Nin yi eꞌ xonl Israel yi najlcheꞌ xe wutz, scyetzajeꞌ yi eꞌchk amaꞌl tzi mar kale najlcheꞌt yi eꞌ filistey. Nchaꞌtz scyetzajeꞌ yi amaꞌl yi at tzaj ẍchikꞌab yi eꞌ xonl kꞌajtzun Efraín, tu yi amaꞌl cwent Samaria. Ej, nin yi eꞌ xonl kꞌajtzun Benjamín scyetzajeꞌ yi amaꞌl Galaad. Ej nin yi jun cꞌoloj xonl Israelaꞌtz yi najlcheꞌ tzajleꞌn jeꞌn tziꞌn ẍchipakxok junt tir le cyetz chitanum, nin scyetzajeꞌ cyakil yi amaꞌl kale najlcheꞌt yi eꞌ aj Canaán tentz. Tircuꞌn yi amaꞌlaꞌtz jalen te yi tnum Sarepta scyetzajeꞌ. Nin yi eꞌ aj Jerusalén yi eꞌ pres sajleꞌn le tnum Sardis, scyetzajeꞌ yi eꞌchk amaꞌl cweꞌn tziꞌn cwent Judá.
21 Cyakil cuꞌn eꞌ xonl Israelaꞌtz chijepon wi yi juꞌwtz Sión, na ẍchitxꞌaconk scyeꞌj chicontr. Nin chocpon tan talcheꞌn yi mbi sbajok scyeꞌj yi eꞌ yi najlcheꞌ le amaꞌl cwent Esaú, yi amaꞌlaꞌtz yi at wiꞌnin wutz tul. Ej nin yi Kajcaw yaꞌstzun yi jun yi scawunk scyeꞌj cyakil jilwutz wunak.o