Yi bnol Jonás taneꞌn yi caꞌwl Ryos
3
1 I tzun bantz nintzun jilon junt tir Kajcaw tetz Jonás, i tzun taltz: 2 “Jonás, or tzabeneꞌn le chumam tnum Nínive, nin txolaj scyetz cyakil wunak yi xtxolbileꞌj yi swaleꞌ nin tzatz.”3 Beneꞌn tzun Jonás jalen Nínive, chi tal Kajcaw tetz. Nin yi Nínive iꞌtz jun chumam tnum yi na taj ox kꞌej tan xajseꞌn tircuꞌn.
4 Yi toponeꞌn Jonás tul yi jun tnumaꞌtz, baj cuꞌn tzun jun kꞌejtz taꞌn tan txoliꞌn. Nin chin wiꞌ nin iꞌ na bantz. I tzun na taltz: “Caꞌwunakt cuntuꞌ kꞌej at yi tnumeꞌj tan Kataj Ryos, nin tircuꞌn tzꞌelpon cuꞌn swutz taꞌn,” stzun Jonás na bantz.
Yi chijakol yi eꞌ aj Nínive cuybil chipaj
5 I tzun yi eꞌ wunak yi najlcheꞌ-tz Nínive, tircunin tzun eꞌ cyocsaj len yi yol Ryos yi tal Jonás. Nintzun cuꞌ chitziꞌ-tz tetz Ryos tan jakleꞌn cuybil chipaj. Nin eꞌ octz tan mucꞌleꞌn weꞌj, nin oc cyakꞌol jun jilwutz beꞌchok scyeꞌj yi na ẍchaj yi na chibisun tan quil.a 6 Nchaꞌtz yi tbital yi rey yi xtxolbil yi tal Jonás ninin tzun cyaj cyen tilol yi cꞌolchbiltz kale na cawuneꞌt, nin el tcyꞌal yi beꞌch tetz yi na ẍchaj yi at wiꞌnin kꞌej, nin oc tkꞌol yi beꞌchok teꞌj yi na ẍchaj yi na bisun tan til. Nchaꞌtz nin cuꞌ cꞌolchoktz tul tzaꞌj. 7 Cawuneꞌn nintzun scyetz yi eꞌ mas ajcaw yi na chicawun xlaj, tan talcheꞌn yi caꞌwleꞌj scyetz cyakil wunak: “Eꞌuꞌ aj Nínive, tajweꞌn chibanuꞌ taneꞌn yi caꞌwleꞌj: Cyaꞌl jun nink wan, nka nink tzꞌucꞌaꞌ, mpe ik yi cyawunuꞌ chi taneꞌn wacẍ nka cneꞌr. 8 Quiꞌc cuj tan waneꞌn jun, ma na oken yi beꞌch cyeruꞌ scyeꞌjuꞌ yi na ẍchaj yi na kabisun tan kil. Nin cuk len chitziꞌuꞌ tetz Kataj Ryos tetz cuꞌn cyalmaꞌuꞌ. Chitxꞌipeꞌnuꞌ cyajtzaꞌkluꞌ yi chin juntlen nin. Quiꞌt choyintzinuꞌ chi sajleꞌn tunintz. 9 Na kol katxꞌixpeꞌn yi kajtzaꞌkl, quicunin batz xtxꞌixpuj Ryos tajtzaꞌkl skeꞌj, nin scuy iꞌ kapaj tan qui kaquimeꞌn taꞌn,” chij yi jun caꞌwlaꞌtz yi el ẍchiwiꞌ cyakil yi eꞌ aj Nínive.
10 Yi tilol Ryos yi jeꞌn chitxꞌixpul yi eꞌ aj Nínive cyajtzaꞌkl, nin yi quiꞌt na chixom te yi cyajtzaꞌkl cachiꞌ, nintzun bixeꞌtz taꞌn tan quiꞌt tkꞌol chicaws, chi yi bixeꞌ taꞌn le xeꞌtzbil tzaj.